Prof. Harelimana areganwa na Hakizimana Clever wari Ushinzwe Amasoko muri iki kigo na Gahongayire Liliane ushinjwa gutanga inyungu zidafite ishingiro.

Prof Harelimana ashinjwa ibyaha birimo gutanga isoko rya Leta mu buryo bunyuranyije n’amategeko; kutubahiriza ihame ryo kuzigamira Leta n’iryo gukorera mu mucyo mu itangwa ry’amasoko ya Leta bigateza Leta igihombo no gukoresha nabi umutungo ufitiye rubanda akamaro; gufata icyemezo gishingiye ku itonesha, ubucuti, urwango, ikimenyane cyangwa icyenewabo no gukoresha igitinyiro.

Hakizimana Clever ashinjwa gutanga isoko rya Leta mu buryo bunyuranyije n’amategeko; gukoresha nabi umutungo ufitiye rubanda akamaro no gutanga inyungu zidafite ishingiro mu gihe cy’ishyirwa mu bikorwa ry’amasezerano.

Ni mu gihe Gahongayire Liliane ashinjwa gutanga inyungu zidafite ishingiro mu gihe cyo gushyira amasezerano mu bikorwa.

Ubushinjacyaha bwabaregeye Urukiko rw'Ibanze rwa Nyarugenge, busaba ko bakurikiranwa bafunzwe by’agateganyo ariko ku wa 4 Ukwakira 2023 rutegeka ko bakurikiranwa badafunzwe.

Ubushinjacyaha ntibwanyuzwe n'icyemezo cy'Urukiko rw'Ibanze ruhita rukijuririra mu Rukiko Rwisumbuye rwa Nyarungege.

Uhagarariye Ubushinjacyaha, Sibomana Stanislas, yavuze ko bajuririye Prof Harelimana kubera ko ikimenyetso cy'amajwi cyari cyatanzwe urukiko rwagaragaje ko cyafashwe binyuranyije n'amategeko.

Yavuze ko uwafashe ayo majwi, yabikoze mu buryo bwemewe kuko atari ibyafashwe mu buryo bwo kumviriza ahubwo ari ibiganiro byafashwe n'uwo baganiraga.

Yavuze ko ibiganiro byabaye hagati ya Prof. Harelimana n’uwitwa Kubwayo Elisephane, byaba ikimenyetso cy'icyaha kuko muri ayo majwi yagiye agaragaza uburyo yirukanishije abandi bakozi batavugaga rumwe.

Muri ayo majwi Harelimana yategekaga Kubwayo guhindura raporo bari bakoze kuri koperative ya KIAKA kandi yaragombaga gutangwa uko yakozwe nta gihinduye.

Impamvu ya kabiri ni uko Urukiko rwagaragaje ko nta mpamvu zikomeye zituma akekwaho icyaha cyo gukoresha igitinyiro. Rubishingira ku majwi yari yatanzwe nyamara ngo ntihasuzumwe izindi mpamvu zari zatanzwe.

Bwanenze ko Urukiko rw'Ibanze rwa Nyarungege rwasuzumye urubanza mu mizi kandi rutaraburanishwa.

Ubushinjacyaha buvuga ko nubwo Urukiko rwari rwemeje ko iperereza ryarangiye rwarengereye kuko atari rwo rwagombaga gukora iperereza.

Bwagaragaje kandi ko Urukiko rutitaye ku buremere bw'ibyaha akurikiranyweho ahubwo bugashingira ku kuba hari abanyeshuri ari gukurikirana.

Bwavuze ko kuba afite ibyo akora bitatuma adakurikiranwa afunzwe kuko umuntu ufite akazi akora bitamubuza gukurikiranwa afunzwe.

Bwasabye Urukiko Rwisumbuye rwa Nyarungege kwemeza ko hari impamvu zikomeye zituma akekwaho icyaha, rugategeka ko akurikiranwa afunzwe mu gihe rugikora iperereza.

Kuri Hakizimana Claver, bushingiye ku byo urukiko rwatangaje ko rwamaze gukora iperereza, atari byo ahubwo ari nko kubwambura inshingano zabwo zo gukora iperereza.

Bwagaragaje ko hari impamvu zari zatanzwe zituma Hakizimana akekwaho ibyaha ariko Urukiko rw'Ibanze rwa Nyarungege ntirwazisuzuma.

Bwagaragaje kandi ko icyaha cyo gutanga inyungu zidafite aho zihuriye n'ibikubiye mu masezerano Urukiko rutigeze rugira icyo rugikoraho.

Ubushinjacyaha kandi bwasabye Urukiko ko rwabikosora agakurukiranwa afunzwe.

Kuri Gahongayire, Ubushinjacyaha busanga kuba urukiko ruvuga ko atagomba gukurikiranwa atari byo kuko ibyo yakoze byo gusinya ku nyandiko izwi nka 'delivery notes' ko yakiriye ibikoresho ari byo byatumye amafaranga asohoka muri RCA.

Bwavuze ko kuba yarasinyiye ko hinjiye intebe za ribuyu kandi yinjije MDF ari byo byatumye izo nyungu zinyuranye n'ibikubiye mu masezerano zitangwa kuko ibyishyuwe byashingiraga kuri ya nyandiko Gahongayire yashyizeho umukono.

Ubushinjacyaha buvuga ko yari afite inshingano zo gusuzuma neza ibyo yakiriye n'ibyari byasabwe cyane ko ari na we wari ushinzwe ikurikiranwa n'ishyirwa mu bikorwa ry'ayo masezerano.

Bwasabye ko yafungwa by'agateganyo kuko bigaragara ko yagize uruhare mu cyaha cyo gutanga inyungu zinyuranyije n'ibiteganywa mu masezerano.

Icyo abaregwa babivugaho

Ku ruhande rwa Gahongayire Liliane yavuze ko we inshingano ze zari izo kwakira ibikoresho byinjiye hanyuma, abandi bagakora igenzura kuri byo kandi ko ibyo yakoze ari byo yari afitiye ububasha.

Umwunganira mu mategeko yavuze ko hari akanama gashinzwe amasoko ari nako kari gashinzwe gukurikirana ibyavuye mu masezerano kuko bitari biri mu nshingano z'umukiliya we.

Yavuze ko ibipiganirwa n'ibyatsindiwe byandikwa mu nyandiko kandi iba ifitwe n'akanama gashinzwe gukurikirana iryo soko.

Prof. Harelimana yavuze ko ayo majwi Ubushinjacyaha buvuga yafashwe bitubahirijwe amategeko.

Yagaragaje ko uwo Kubwayo yemeye ko yasabye ruswa anabyirukanirwa mu kazi ka Leta ariko aho gukurikiranwa ni we uri kuba umutangabuhamya mu Bushinjacyaha.

Prof. Harelimana yavuze ko ibivugwa ko hari abakozi birukanwe mu buryo bunyuranyije n'amategeko atari ukuri kuko nta wigeze atanga ikirego.

Yavuze ko icyo kiganiro cy'amajwi yafashwe nyuma y'uko Prof. Harelimana agiriwe inama yo gushaka ibimenyetso birenze kimwe byerekana ko Kubwayo yasabye ruswa muri koperative KIAKA.

Abajijwe impamvu atari we wafashe amajwi kandi yari ari gushaka ibimenyetso, ahubwo uwo ayashakaho akaba ari we uyamufata, Prof. Harelimana yavuze ko yanze kuyafata kuko yari atarabona uburenganzira bwo gufata amajwi kandi yari azi ko bitemewe mu mategeko.

Yasabye ko mu bushishozi bw'Urukiko rwazategeka ko akurikiranwa adafunzwe kuko ibyo akurikiranyweho atabikoze.

Umwunganira mu mategeko yavuze ko nta mpamvu zihari zo gufunga Prof. Harelimana ngo kuko uyu munsi iperereza ryakagombye kuba ryararangiye. Yasabye Urukiko rwatesha agaciro ubujurire bw’Ubushinjacyaha, umukiliya we agakomeza gukurikiranwa ari hanze.

Ku rundi ruhande, Hakizimana Claver, yavuze ko kuba Ubushinjacyaha bufite inyandiko zose zashingiweho butanga ikirego kandi gutanga amasoko bikaba byarakorerwaga ku ikoranabuhanga adashobora kubangamira iperereza.

Yavuze ko ibyo Urukiko rwamutegetse yabyubahirije kandi nta n'igihe umushinjacyaha yamushakiye ku biro by'Ubushinjacyaha yamubonaga.
Yanagaragaje ko ubusabe bw'Ubushinjacyaha bwo kumufunga by'agateganyo budakwiye guhanwa ishingiro.

Icyemezo kizafatwa ku itariki ya 9 Ugushyingo 2023, saa kumi z'umugoroba.