00:00:00 IGIHE NETWORK KN KINYARWANDA EN ENGLISH FR FRANCAIS

Uko Cameroon na Perezida Paul Biya babaye icyanzu cy’abajenosideri

Yanditswe na Mwene Ndabarasa
Kuya 5 Ukwakira 2022 saa 10:49
Yasuwe :

Ubwo u Rwanda rwari rumaze kubohorwa, ubuyobozi bwakoraga Jenoside bukameneshwa, umubare munini bahungiye muri Zaire, abandi berekeza muri Tanzania. Ni aho bavuye bakwira mu bihugu byinshi byo muri Afurika, benshi baza kwisanga i Burayi.

Kuri iyi nshuro turarebera hamwe uburyo abanyarwanda benshi bari bahunze igihugu bisanze muri Cameroon, mu ntera y’ibilometero 2015.

Ku wa 19 Gashyantare 1995, Col Theoneste Bagosora ufatwa nk’umwe mu bacurabwenge b’umugambi wa Jenoside yakorewe Abatutsi, yuririye indege ya Air Cameroun i Kinshasa yerekeza Douala, umwe mu mijyi minini muri Cameroun.

Ni igihugu yari asanzwe agendamo cyane. Yari asanze abandi bajenosideri bageze muri icyo gihugu n’imiryango yabo mu gace gatuwe n’abifite mu majyepfo ya Doualano muri Yaoundé, aho babaga mu nzu zihenze, bakoresheje umutungo wa Leta y’u Rwanda basahuye.

Abo bose bashakishwaga kubera uruhare bakekwaho muri Jenoside yakorewe Abatutsi hagati ya tariki 7 Mata kugeza tariki ya 4 Nyakanga 1994. Barimo abari abasirikare bo ku rwego rwo hejuru n’abaminisitiri muri Leta y’abajenosideri.

Abenshi bafatanywe inyandiko zigaragaza uruhare rwabo muri Jenoside yakorewe Abatutsi, zirimo amalisiti y’abatutsi bishwe ndetse n’izigaragaza uko Jenoside yateguwe.

Ubwo Bagosora yageraga i Douala, yaje kumenywa n’umunyarwanda w’umuganga bari mu ndege imwe, wari witabiriye inama mpuzamahanga yo kurwanya icyorezo cya SIDA.

Uyu munyarwanda yaje kubibwira Minisiteri y’ububanyi n’amahanga ya Cameroun, ariko igaragaza kutabyitaho.

Uko iminsi yagendaga niko abajenosideri n’imiryango yabo bakomeje gushinga imizi muri iki gihugu, abana babo batangira kujya mu mashuri ahenze muri iyo mijyi.

Batangiye gushinga ubucuruzi, cyane cyane aho bafunguye amaduka ndetse na kompanyi zo gutwara abantu. Ariko bakirinda kugaragara cyane mu ruhame.

Ibi ariko ntibyaje gutinda. Tariki ya 25 Nyakanga 1995, ikinyamakuru La Nouvelle Expression cyasohokaga kabiri mu cyumweru cyasohoye inkuru ivuga ku bajenosideri bihishe muri icyo gihugu, n’umugereka uriho urutonde rw’amazina yabo 44.

Urwo rutonde kandi rwavugaga icyo buri umwe yari ashinzwe muri Leta y’abajenosideri ndetse n’ibyaha bakekwaho. Ikinyamakuru cyasoje inkuru gishinja Perezida Paul Biya gukingira ikibaba abajenosideri bashakishwa n’ubutabera mpuzamahanga.

Uwa mbere ku rutonde yari Col Theoneste Bagosora, wigize umuyobozi w’igisirikare Jenoside igitangira, akaba afatwa nk’ubwonko bwa Jenoside.

Undi yari Major Protais Mpiranya wari umukuru w’ingabo zarindaga Perezida Habyarimana, na we wagize uruhare rukomeye muri Jenoside yakorewe Abatutsi cyane cyane mu kwica abanyapolitiki.

Hari kandi Jean Bosco Barayagwiza, umwe mu bashinze ishyaka ry’intagongwa ry’abahutu, CDR, n’umucurabwenge wa Hutu Power, Ferdinand Nahimana.

Ikinyamakuru La Nouvelle Expression cyongeyeho ko abo bajenosideri bakomeje ibikorwa bya politiki muri Cameroon, aho bari mu ishyaka RDR (Retour de Refugies et la Democratie au Rwanda).

Bagendaga bavuga ko baharanira demokarasi, ko ari yo bazira, naho ko ibyabaye mu Rwanda ari abaturage barakaye kubera urupfu rw’umukuru w’igihugu, bakicana.

Bagosora muri Cameroun yabonye umwanya wo kwandika inyandiko zihakana Jenoside yakorewe Abatutsi. Hari inyandiko y’impapuro 33 yanditse maze ayikwirakiza ahari impunzi zose zari zarahunze mu 1994 no mu miryango mpuzamahanga, yitwa ko asobanura ibyabaye mu Rwanda.

Muri iyo nyandiko, Bagosora yavuzeko amahoro ashoboka ari uko u Rwanda ruyobowe n’abahutu, kandi ko abatutsi batigeze bagira igihugu mu karere k’ibiyaga bigari.

Nyuma yaho itsinda rya LONI ryemeje ko mu Rwanda habaye Jenoside yakorewe Abatutsi, hemejwe ko hajyaho n’Urukiko Mpuzamahanga Mpanabyaha, rujyaho ku wa 8 Ugushyingo 1994.

Nubwo ibiro bya Amerika bishinzwe ubutasi byemeje ko abakekwaho Jenoside benshi bari mu Bufaransa, byongeyeho ko no muri Cameroun bariyo.

Kuki Cameroon yaryamye ku bajenosideri?

Impamvu nyamukuru ni umubano w’u Rwanda n’u Bufaransa. Nk’igihugu cyakolonijwe n’u Bufaransa, Cameroon n’u Rwanda byafashwaga cyane nicyo gihugu ndetse binafitanye ubutwererane mu bya gisirikare. Bityo, abasirikari bakuru nka Bagosora babaga bafite abo biganye muri Cameroun, bakagirana ubushuti.

Tariki ya 13 Mata 1995, nibwo inzego za Amerika zatangaje abajenosideri bane bari muri Cameroun.

Ambasaderi wa Amerika muri Cameroun icyo gihe, Harriet Winsar Isom, yahaye Leta ya Cameroun amazina y’abajenosideri bari muri icyo gihugu, iyisaba kubafata byihuse kuko nibatabikora bazaba bishe umwanzuro w’Akanama k’Umuryango w’Abibumbye gashinzwe amahoro ku isi. Cameroun yavuniye ibiti mu matwi, ntiyabafata.

Ubwo u Rwanda rwibukaga ku nshuro ya kabiri Jenoside yakorewe Abatutsi, tariki ya 1 Mata 1996, Akanama k’Umuryango w’Abibumbye kari kagiye gufatira ibihano Perezida Paul Biya kubera gukingira ikibaba abajenosideri.

Icyo gihe kandi Cameroun yiteguraga kwakira inama ya 33 y’Umuryango wa Afurika yunze Ubumwe. Igitutu cyakomeje kwiyongera kuri Paul Biya, abuze icyo avuga asaba ko ibimenyetso bishinja Bagosora byahabwa igihugu cye.

Amaherezo y’inzira ni munzu; Bagosora yaje gufatwa ari kubikuza amafaranga hamwe n’abandi bajenosideri 11, bajyanwa muri gereza ya Kondengui.

Bakigera muri gereza, Bagosora na bagenzi be bashatse ubuvugizi mu itangazamakuru, maze ikinyamakuru "The Cameroun Tribune" cyandika inkuru kiti "Imfungwa 11 z’Abanyarwanda zagize icyo zitangaza"’. Ifoto yakoreshejwe muri iyi nkuru yagaragazaga ba Bagosora inyuma y’inkingi za gereza, baseka cyane.

Iyi nyandiko yashinjaga Abatutsi kuba barikoreye Jenoside. Nyuma yaho ikindi kinyamakuru kibogamiye kuri Leta, "Africa International" cyanditse inkuru kivuga ko ba Bagosora ari impunzi zifungiwe impamvu zitazwi.

Umwanditsi w’urukiko mpuzamahanga mpanabyaha rwashyiriweho u Rwanda, Andronico Adede, yagiye muri Cameroun gusaba ko Bagosora na bagenzi be bakoherezwa i Arusha.

Yashatse kubonana na Minisitiri w’Ubutabera, ategereza iminsi itatu ntiyabonana na we.

Nyuma y’igitutu cy’amahanga, Paul Biya yasinye impapuro zitanga Bagosora na bagenzi be mu mwaka wakurikiye, mu 1997.

Col Bagosora, Andre Ntagerura, Col Anatole Nsengiyumva boherejwe i Arusha tariki ya 23 Mutarama 1997. Abandi umunani basigaye barekuwe nyuma y’ukwezi kumwe, ariko Jean Bosco Barayagwiza afatwa nyuma y’igihe gitoya.

Gukingira ikibaba abajenosideri muri Cameroun byatumye abenshi bacika ubutabera, harimo n’abapfuye bataburanishijwe nka ruharwa Maj Protais Mpiranya.

Bagosora we yaje gukatirwa gufungwa burundu, ariko mu bujurire igihano cye kiragabanywa kiba imyaka 35.

Bagosora yafatiwe muri Cameroon, akatirwa gufungwa imyaka 35
Bagosora afatwa nk'umwe mu bacurabwenge ba Jenoside yakorewe Abatutsi mu 1994

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .