Yavuze ko ari amakuru yabwiwe n’abandi ndetse ko umugabo witwa Safari Gaspard wari uturanye na Basabose warokokeye kuri Paruwasi ya Gikondo yabitanzemo ubuhamya mu gihe cyo Kwibuka ku nshuro ya 29 Jenoside yakorewe Abatutsi.

Uyu mutangabuhamya yabwiye Urukiko ko uwo mugabo Safari yavuze ko Jenoside itangiye Basabose atongeye gukorera mu bwihisho yahise agaragara mu matsinda yajyaga kwica Abatutsi.

Uwo mugabo mu buhamya bwe yasobanuye uko Basabose yajyanye n’itsinda ry’Interahamwe bagiye kwica umusaza witwa Sengabo Alexis wari Sekuru wa Safari, bakica Gashumba ndetse na Dr Rudasingwa.

Uyu mutangabuhamya yasabye urukiko ko mu gihe rwakenera kumenya neza byinshi rwazatumaho Safari akaza kubibasobanurira kuko we afite amakuru menshi ku bijyanye na Basabose.

Uyu ni umwe mu batangabuhamya bake bakomoje ku ruhare rwa Pierre Basabose muri uru rubanza kuko abenshi bagaragazaga ko nta bintu byinshi bamuziho bakavuga kuri Twahirwa Séraphin bareganwa.

Me Jean Flamme wunganira Basabose Pierre yagaragarije urukiko ko ibyo umutangabuhamya avuga byose ari ibyo yabwiwe n’uwitwa Safari.

Umutangabuhamya yasobanuye ko mu gihe cyo kwibuka Jenoside yakorewe Abatutsi abantu baba bibuka ibyo banyuzemo muri Jenoside bakavuga n’ababigizemo uruhare, ariko bitaba ari ugushinja ahubwo ari ukugira ngo hasobanuke neza ibyabaye no kugira ngo bitazasubira ukundi.

Umutangabuhamya ati "Basabose wari uzwi i Gikondo wari umucuruzi, ukomeye, wari ufite amafaranga ari umuvunjayi. Ntabwo rero yari umuntu wakwitiranya n’undi muntu wese."

Me Flamme yavuze ko uyu mutangabuhamya atizewe kubera ko mu buhamya yari yatanze mu nyandiko atari yarigeze avuga kuri Basabose, undi asubiza ko ari uko bari bamubajije kuri Twahirwa gusa.

Ubushinjacyaha bubwiye Urukiko ko Safari watanze ubuhamya mu kwibuka, umutangabuhamya yagarutseho, bibaye ngombwa bwamureba kugira ngo agire amakuru atanga.

Imikoranire ya Basabose na Twahirwa

Uyu mutangabuhamya yasobanuye ko Twahirwa yari inshuti ya Se ariko nyuma y’ihanurwa ry’Indege ya Habyarimana yahise ahinduka umuntu mubi cyane kuko yagiye no mu gitero cyagabwe iwabo ayoboye Interahamwe.

Icyo gihe se yabahaye ibihumbi 500 Frw ngo bamurekere abana ariko bahita batangira kumukubita, bamuhondagura inyundo, imihoro n’ibindi nubwo atahise apfa yaje kugwa mu bitaro bya Nairobi muri Kenya nyuma ya Jenoside.

Yavuze ko abantu bakundaga kuvuga ko Pierre Basabose yateraga inkunga Interahamwe kandi ko n’amafaranga Twahirwa yakoreshaga yayakuraga kwa Basabose.

Abagize inteko iburanisha bamubajije niba yaba yarabonye Twahirwa na Basabose bari kumwe, asubiza ko uko ari inama yabereye Gikondo Nyenyeri Basabose na Twahirwa bombi bari bayirimo.

Avuga ko Basabose atagiye mu gitero cyagabwe iwabo ariko yatangaga inkunga y’ibikoresho n’amafaranga kuko na Hilux Interahamwe zakoreshaga yari iye.

Ku rundi ruhande ariko Twahirwa yashinjwe na muramu we mu Rukiko, avuga ko ubwo umugore wa Twahirwa yari yarahungiye iwe, umugabo [Twahirwa] we yageze muri urwo rugo yambaye imyenda ya gisirikare afite n’imbunda.

Yavuze ko imodoka ya Hilux Interahamwe zari zifite zanayitundishaga imibiri y’Abatutsi bishwe bakajya kuyita mu byobo bari baracukuye ku gice cya Murambi ku irimbi ryo mu Gatenga.

Yavuze kandi ko azi Basabose kuko yari umucuruzi wari utuye mu nzu yari yaguze yahoze ari iya Pasiteri Bizimungu.