top_leaderboard
top_leaderboard
00:00:00 IGIHE NETWORK KN KINYARWANDA EN ENGLISH FR FRANCAIS

Urubanza rurapfundikiwe: Ibyatangajwe ku bihano Rusesabagina na bagenzi be bahawe

Yanditswe na Musangwa Arthur
Kuya 22 September 2021 saa 11:58
Yasuwe :
Yavuzweho:

Tariki ya 20 Nzeri 2021 wari umunsi umaze hafi amezi abiri utegerezanyijwe amatsiko adasanzwe ku bakurikiraniye hafi urubanza Paul Rusesabagina yareganwamo n’abandi 20 ku byaha by’iterabwoba.

Ni ibyaha byakozwe mu bihe bitandukanye bigizwemo uruhare n’umutwe w’abarwanyi wa FLN wari ushamikiye ku Mpuzamashyaka ya MRCD, yari iyobowe na Rusesabagina. Hari ibindi birimo guhakana no gupfobya Jenoside yakorewe Abatutsi no kuba mu Ishyirahamwe ry’Iterabwoba rya FDLR-FOCA byahamijwe bamwe mu baburanyi.

Rusesabagina yakatiwe imyaka 25 y’igifungo (nubwo yikuye mu rubanza mbere y’uko rutangira mu mizi), Nsabimana Callixte alias Sankara na Nsengimana Herman babaye abavugizi ba FLN bakatirwa gufungwa imyaka 20 n’itanu uko bakurikirana.

Abandi bareganwa muri urwo rubanza bakatiwe gufungwa imyaka iri mu byiciro bitatu birimo 20, itanu n’itatu. Nta n’umwe wagizwe umwere.

Nyuma y’isomwa ry’urubanza ryamaze amasaha atandatu, hirya no hino mu bitangazamakuru no ku mbuga nkoranyambaga ni yo nkuru igezweho dore ko FLN izwi n’abatari bake kubera uko yagiye yigamba ibitero yagabye ku Rwanda.

Kuva mu 2018 yigambye gutera u Rwanda “ishaka kubohora Abaturarwanda” inyuze muri Nyungwe.

Ikirenze kuri ibyo, Rusesabagina arazwi cyane kubera Filime yiswe “Hotel Rwanda” imugaragaza nk’intwari yarokoye Abatutsi bahungiye muri Hôtel des Mille Collines mu 1994, nubwo abaharokokeye babinyomoje.

Imyaka 25 Rusesabagina yakatiwe amaze guhamywa ibyaha by’iterabwoba ni yo yagarutsweho cyane n’abo mu ngeri zitandukanye biganjemo abanyepolitiki.

Twitter yabaye isibaniro kubera guterana amagambo kwa bamwe bashimangira ko nubwo inzirakarengane zaguye mu bitero FLN yagabye ku Rwanda zitagaruka ariko hatanzwe ubutabera bukwiye, abiganjemo abanyamahanga bo bagashaka kugaragaza ko batanyuzwe n’imikirize y’urubanza.

Umuvugizi wa Guverinoma y’u Rwanda muri Minisiteri y’Ububanyi n’Amahanga, Yolande Makolo, yanditse kuri urwo rubuga ati “Uru rubanza rumaze igihe kirekire rw’abanyamuryango 21 ba FLN rwagaragaje ibikorwa by’iterabwoba by’uwo mutwe witwaje intwaro uyobowe na Rusesabagina. Ibimenyetso bishinja abaregwa ntibyashoboraga guhakanwa, kandi Abanyarwanda ubu barumva batekanye kuko ubutabera bwatanzwe.”

“Uru rubanza rwabaye rurerure ndetse ruba uburibwe bw’igihe kinini ku bagizweho ingaruka n’ibitero bya FLN, by’umwihariko abagiye bahamagazwa ngo batange ubuhamya. Uyu munsi intekerezo zacu ziri kuri aba banyamurava bahamije ibyo babonye, n’imiryango n’inshuti z’abagizweho ingaruka na byo.”

Abaregwa muri uru rubanza bategereje kumva umwanzuro, niba bagirwa abere cyangwa bagakatirwa
Icyumba cyasomewemo uru rubanza cyarimo abantu batandukanye barimo n'abadipolomate

Umuvugizi wa Leta Zunze Ubumwe za Amerika, Ned Price, yanditse ko icyo gihugu gitewe impungenge no kuba Rusesabagina yahamijwe ibyaha.

Yagize ati “Dutewe impungenge n’uko Guverinoma y’u Rwanda yahamije ibyaha Paul Rusesabagina, wemerewe n’amategeko ya Leta Zunze Ubumwe za Amerika kuhatura burundu. Ibyo yavuze ko nta butabera buboneye yiteze biteye ukwibaza ku kuba umwanzuro w’Urukiko waba unyuze mu mucyo.”

Umwanditsi ukomoka muri Cameroun uherutse guhabwa ubwenegihugu bw’u Rwanda akaba n’umwarimu muri Kaminuza y’u Rwanda, Yann Gwet, yifashishije amafoto y’Abanyamerika bari guhondagura impunzi z’Abanye-Haïti kuko zarenze umupaka wa Mexique zikabagerera ku butaka, agaya uko bigaragaza nk’abahirimbanira uburenganzira bwa muntu mu mahanga kandi iwabo byabananiye.

Yanditse ati “Bita cyane ku ‘burenganzira bwa muntu’ bakiriza umunsi bashyigikira umunyabyaha barengeje ingohe ibiri kubera mu gihugu cyabo ubu ngubu.”

Kayitesi yavuze ko ahorana ihungabana ry'ibyo yaboneye mu ishyamba rya Nyungwe bikozwe na FLN

Saa yine n’iminota 16 z’amanywa yo ku wa 20 Nzeri 2021, habura iminota mike ngo isomwa ry’urubanza ritangire, BBC yashyize kuri Twitter inkuru yanditse mu mwaka ushize ubwo Kanimba Carine wa Rusesabagina yavugaga ko azi ko se “azahamwa n’ibyaha”, bityo ko “niba Amerika, u Bubiligi n’imiryango itandukanye byizera ko biharanira uburenganzira bwa muntu bigomba kugira icyo bikora akarekurwa.”

Benshi bafashe ubwo butumwa bakora “quote” babusubiza (reply) bifashishije inkuru BBC yiyandikiye ubwayo mu 2018, Sankara avuga ko “MRCD/FLN imaze ukwezi igaba ibitero muri Nyungwe”.

Bagiye kandi bakora “reply” bifashishije indi nkuru BBC yanditse mu 2019 ivuga ko “Paul Rusesabagina yatangaje ko ataciwe intege n’ifatwa rya Sankara” wari umuvugizi wa FLN.

Ukubazanya no kwibutsanya ku bikorwa bya FLN nyuma y’imikirize y’urubanza, byabaye nko gukozanya isoni ku buryo uri kugaragaza aho abogamiye wese ari kuzana ibihamya, byaba bitagira shinge na rugero akarutanga dore ko imbuga nkoranyambaga zabaye ku karubanda.

Sena ya Amerika na yo yavuze ko itewe impungenge n’imikirize y’urubanza bityo ko icyo gihugu n’u Rwanda “bikeneye gukorana bigakemura icyo kibazo”.

Bamwe mu bakoresha Twitter bakoze “Quote” kuri ubwo butumwa babaza impamvu Amerika ivuga ko “uburyo bukwiye bwo guha agaciro ababuriye ubuzima mu bitero by’iterabwoba yagabweho ku wa 11 Nzeri 2001 ari ukudatuma ikintu nk’icyo gisubira”; ikarengaho igashyigikira Rusesabagina wakoze iterabwoba mu Rwanda.

Senateri Rubio Press na we w’Umunyamerika yanditse agira ati “Paul Rusesabagina warokoye ubuzima bw’abagera ku 1,268 muri ‘Jenoside yo mu Rwanda’ yafunzwe bidakwiye ndetse ahamywa ibyaha mu rubanza rw’amafuti.”

Umwe yakoze “quote” amubaza niba ibitero Rusesabagina yagabye mu Rwanda iyo biza kuba ari mu gihugu cye byagabwe yari kwivugisha ayo.

Minisitiri w’Intebe wungirije w’u Bubiligi akaba na Minisitiri w’Ububanyi n’Amahanga, Sophie Wilmès, yasohoye itangazo avuga ko nyuma y’inshuro nyinshi u Bubiligi bwagaragaje impungenge ku kibazo cy’uko “Rusesabagina atigeze yungukira ku ihame ry’ubutabera buboneye by’umwihariko ku ngingo y’uburenganzira bwo kunganirwa”.

Wilmès yavuze ko azagirana ibiganiro n’u Rwanda mu biganiro bishamikiye ku Nama y’Inteko Rusange y’Umuryango w’Abibumbye i New York muri iki cyumweru, ndetse ko “u Bubiligi bukomeje kuba hafi ya Rusesabagina”.
img436242|center>
Guverinoma y’u Rwanda yahise itangaza ko amagambo ya Sophie Wilmès, agaragaza uruhande u Bubiligi bwari bwarafashe kuva ku ntangiriro z’urubanza bunenga ubutabera bw’u Rwanda, nubwo hari uruhare bwagize mu iperereza ku byaha Rusesabagina yashinjwaga ryakozwe n’inzego zabwo.

Yahise isubika ibiganiro byari biteganyijwe ku rwego rwa ba minisitiri b’ububanyi n’amahanga b’impande zombi.

Uretse icyo umuntu yakwita kwigiza nkana k’u Bubiligi na Amerika, Martin Ngoga wahoze ari Umushinjacyaha Mukuru mu Rwanda, yagaragaje uburyo inzego z’iperereza za Leta Zunze Ubumwe za Amerika zirimo FBI, kuva kera na kare zari zizi ibikorwa bya Paul Rusesabagina byo gutera inkunga imitwe y’iterabwoba ndetse ko mu myaka 11 aribwo zatangiye kumukoraho iperereza zifatanyije n’iz’u Rwanda.

Umwarimu muri Kaminuza ya SOAS yo mu Bwongereza, Phil Clark, yanditse ko “amakuru Ngoga yagaragaje ku ruhare rwa FBI mu kibazo cya Rusesabagina ari ingenzi cyane.’’

Ati “Izi ni imbaraga mpuzamahanga zirimo inzego z’u Bubiligi, Amerika n’u Rwanda.”

Mu gihe ibyo bihugu byakabaye mu mwanya mwiza wo gushimirwa bikomeye uruhare byagize mu gutahura imigambi mibisha ya Rusesabagina kuri Leta y’u Rwanda, bigaragara ko byahisemo kujya ku ruhande rwo kwiyerekana nk’aho bimushyigikiye.

Paul Rusesabagina yakatiwe gufungwa imyaka 25. Mu iburanisha rya none ntiyigeze yitaba urukiko

Tom Ndahiro uzwiho kutarya indimi ku baharabika u Rwanda, yashyize kuri Twitter ye amashusho ya Rusesabagina yivugira ati “Urubyiruko rwacu rwa FLN rwatangije ibitero ku ngabo za Kagame kugira ngo zibohore Abanyarwanda.”

Yayaherekeresheje amagambo agira ati “Murebe n’aya mashusho ya Rusesabagina ubwo yitwaraga nka Osama Bin Laden.”

Osama wari Umuyobozi w’Umutwe w’Iterabwoba wa Al-Qaeda yahigishijwe uruhindu na Amerika kugeza zimwivuganye, nyuma y’ibitero yazigabyeho ku wa 11 Nzeri 2001 bigahitana abasaga ibihumbi bitatu.

Imbamutima zagaragajwe n’abo mu nguni zose ni nyinshi ariko abenshi bakomeje kugaragaza ko ubutabera bukwiye ari bwo bwahawe Rusesabagina n’abo bareganwa, bakanifashisha ibimenyetso bamaganira kure abavuga ko urubanza rutaciwe mu mucyo.

Hari n’abandi bagaragaje “cartoon” yo gutebya berekana ko Rusesabagina aho ari ashobora kuba ari kwicuza ibikorwa by’iterabwoba yishoyemo.

Umushakashatsi mu Karere k’ibiyaga bigari, Jonathan Beloff, we yabajije impamvu Amerika n’u Burayi bihitamo abakwiriye ubutabera.

Ati “Ibitero bya FLN byagizwemo uruhare na Rusesabagina, byahitanye abantu icyenda. Imiryango yabo ikwiye ubutabera. Buri gihugu ni byo cyakora mu rwego rwo kurinda abaturage bacyo.”

Paul Rusesabagina ni we wahawe igihano kiri hejuru [imyaka 25] mu bandi 20 bareganwa. Abahawe igihe gito ni imyaka itatu
Kwamamaza
Kwamamaza

Izindi nkuru wasoma

Inkuru ziheruka - Ubutabera

Nyanza: Umugabo wakekwagaho kwica umugore we yafunguwe by’agateganyo
13/09/26 - 02:50
Rusizi: Abasore bakekwaho kwica se bapfuye 40.000 Frw basabiwe gufungwa burundu
13/09/26 - 07:07
Gisagara: Gitifu uregwa kwakira ruswa ya 200.000 Frw yigaramye ‘komisiyoneri” we
12/09/26 - 08:03
Ni icyemezo tutashimye nk’ubutabera bw’u Rwanda- Mukantaganzwa ku Bufaransa bwejeje abasirikare babwo
12/09/26 - 11:50
Hari igihe bafunga umuntu mu nyungu ze- Perezida w’Urukiko rw’Ikirenga
11/09/26 - 05:41
Jean Paul Micomyiza woherejwe mu Rwanda na Suède yarangije kwiregura
10/09/26 - 09:35
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Inkuru zamamaza

SOMA IBINDI

Amatangazo

SOMA IBINDI

IGIHE Documents

SOMA IBINDI

Kwamamaza

Kwamamaza

SkyScraper

Kwamamaza

Kwamamaza

Kwamamaza

Kwamamaza

Kwamamaza

Kwamamaza

Kwamamaza

Special pages

Contact us

Marketing : 0788 89 59 53
Editor : 0788 27 26 21
Management : 0788 74 29 08
Emails : [email protected] / [email protected]

Serivisi Dutanga

- Kwamamaza
- Video Production
- Photography
- Web Development
- Hosting
- Domain Registration
- Abo Turi bo
- Twandikire
- Ibibazo bikunze kwibazwa
Copyright 2009 - 2026 | IGIHE Ltd | All Rights Reserved
Amategeko agenga ubwanditsi