Aba bose uko ari batatu bagejejwe ku Rukiko rw'Ibanze rwa Kicukiro kuri uyu wa 14 Ugushyingo 2023, ngo baburane Ku ifunga n'ifungurwa ry'agateganyo.

Urubanza rwasubitswe kubera ko Leon Nisunzumuremyi wari Umutoza w’abana Ishimwe atari afite umwunganira mu mategeko. Nisunzumuremyi yagaragarije Urukiko ko rwamusubikira kuko atunganiwe.

Yagaragarije Urukiko ko yari afite umwavoka bavuganye ariko kubera ubushobozi bananiranwe, avuga ko yamaze kubona undi ugomba kumwunganira ariko yari atarasoma dosiye ukubiyemo ibyo aregwa.

Uwunganira Karorero yabwiye Urukiko ko rwasubika iburanisha agahabwa umwanya wo gushaka umwunganira hanyuma yazongera kwitaba adafite umwunganira, urubanza rukaburanishwa atunganiwe.

Uwunganira Rugendoruhire na we yagize ati "Kunganirwa ni uburenganzira ntayegayezwa bw'umuburanyi, rero twumva na we yabuhabwa."

Uhagarariye Ubushinjacyaha yavuze ko urubanza koko rwasubikwa ariko hagatangwa itariki ya hafi.

Umucamanza yahise yemeza ko urubanza ruzaburanishwa ku wa Kane, tariki ya 16 Ugushyingo 2023, saa Tatu za mu gitondo.

Ubushinjacyaha bwabaregeye Urukiko ngo rubaburanishe ku ifunga n’ifungurwa ry’agateganyo.

Aba bose uko ari batatu bakurikiranyweho ibyaha birimo kwakira cyangwa gutanga indonke, guhimba no guhindura inyandiko cyangwa gukoresha inyandiko mpimbano no guhindura amakuru yo muri mudasobwa cyangwa urusobe rwa mudasobwa utabyemerewe.

Ibi byaha bikekwa ko babikoze ubwo bashakaga guhindura imyaka y’abana ngo bemererwe kujya muri Academy ya Bayern Munich.

Icyo gihe hatoranyijwe abana 43 n’abandi barindwi bari ku rutonde rw’umugereka bashobora gusimbura uwagize ikibazo. Harebwe abafite hagati y’imyaka 12 na 13. Nyuma byaje kugaragara ko hari ababeshye imyaka bakurwa ku rutonde ndetse hatangira iperereza.

Ku wa 30 Ukwakira 2023 ni bwo RIB yohereje dosiye y’abatawe muri yombi mu Bushinjacyaha na bwo buyiregera urukiko tariki ya 6 Ugushyingo 2023.