Igitabo ngarukamwaka kigaragaza ubuzima bw’igihugu mu mibare (Statistical Yearbook 2022) cyasohotse uyu mwaka cyerekana ibijyanye n’indwara kimwe n’impfu zagiye zibera mu bitaro n’ibigo nderabuzima hirya no hino mu gihugu.

Muri rusange kuva mu 2019 kugeza mu 2021, Abanyarwanda 22.409 ni bo baguye mu bigo nderabuzima n’ibitaro.

Mu 2019 hapfuye 4417 bigeze mu mwaka wakurikiyeho bariyongera baba 8333, mu 2021 bakomeza kwiyongera baba 9659.

Ibyavuye mu ibarura rusange ryo mu 2022 byo bigaragaza ko umubare w’abapfa wagiye ugabanuka hagati y’umwaka wa 1978 na 2022 kuko bavuye kuri 17,1 ku bantu 1000 ugera kuri 6,3. Igipimo cy’igabanuka kingana na 63% mu myaka 44 yari ishize.

Impfu z’impinja na zo zaragabanutse ziva ku 144 ku bihumbi 100 bavutse ari bazima mu 1978 zigera kuri 28,9 mu 2022 nubwo mu 2002 biyongereye.

Impfu z’abana bari munsi y’imyaka itanu zaragabanutse hagati y’umwaka wa 1987 na 1991, ziyongera hagati ya 1991 na 2002; hagati ya 2002 na 2022 ziramanuka mu buryo bugaragara.

Mu mwaka ushize Abaturage bose bose b'u Rwanda bari 13.246.394 nk’uko byagaragajwe n'ibarura rusange. Mu 2021 havutse abana 364.549 baruta abaturage b’Akarere ka Nyaruguru kuko kugeza ubu gatuwe na 318.126.

Indwara zishe abantu benshi mu 2021

Statistical Year Book igaragaza ko indwara z’abana b’impinja ni zo bahitanye abantu benshi kuko bangana na 4259 bahwanye na 44% by’abapfuye bose mu mwaka wa 2021. Ibibazo bifitanye isano no kubyara byahitanye 1088, indwara z’ibihaha 721, indwara zifata mu myanya y’ubuhumekero zishe 388 bangana na 4%, malaria yica 56 mu gihe izindi ndwara zahitanye 3147.

Abantu bagannye ibigo nderabuzima bafite indwara zifata mu myanya y’ubuhumekero mu 2021 barengaga miliyoni 2,8 bavuye kuri miliyoni 2,4 mu mwaka wabanje; miliyoni 2,3 mu 2019 na miliyoni 2,7 mu 2018.

Abivuje inzoka zo mu nda bari 836.026 ugereranyije na 412,093 mu 2020 na 1.054.137 mu 2019.

Indwara zifata umuyoboro w’inkari zavuwe abagera ku 547.705; iz’amenyo n’ishinya ziba 586.587 mu gihe abivuje indwara z’amaso bari 558.523.

Izindi ndwara zirimo malaria aho abagera kuri 217.577 ari bo bakiriwe, ibikomere byo ku mubiri, indwara z’uruhu, impiswi, indwara z’amatwi n’izindi aho muri rusange abarwayi 10.295.628 ari bo bakiriwe mu bigo nderabuzima n’abarenga ibihumbi 500 mu bitaro bitandukanye.