00:00:00 IGIHE NETWORK KN KINYARWANDA EN ENGLISH FR FRANCAIS

Abasaga miliyoni barayirwaye; Abaturage bongeye kwibutswa ubukana bwa malariya basabwa kuyirandura

Yanditswe na Ntabareshya Jean de Dieu
Kuya 2 July 2022 saa 08:37
Yasuwe :

Hambere aha by’umwihariko mu bihe iby’imvura, iyo wageraga ku kigo nderabuzima cyangwa ibitaro wasanganirwaga n’umurongo w’abaturage bivuza malariya. Iyi ndwara yari ihangayikishije cyane Abaturarwanda n’Isi muri rusange, ku buryo n’uwafatwaga n’ubundi burwayi yabanzaga gutekereza ko ari yo.

Hari abahitagamo kwahira imiti ya kinyarwanda ngo ivura malariya, bamwe muri aba yarabahitanye abandi bamara iminsi kwa muganga bitabwaho.

Ku ruhande rw’u Rwanda rwafashe ingamba nyinshi zigamije guhashya iyi ndwara no kuyirandura ku buryo byatanze umusaruro ufatika mu kugabanya umubare w’abahitanwa nayo muri iki gihe.

Nubwo kuri ubu isa n’iyacogoye ntabwo yarangiye kuko n’imibare y’Ikigo cy’Igihugu cy’Ubuzima, RBC, igaragaza ko mu mwaka wa 2021 abantu bagera kuri 69 bishwe nayo mu gihe abayirwaye bageze kuri miliyoni 1,1 mu gihe bari bavuye kuri miliyoni 4 mu 2017.

Kubera iyo mpamvu umuryango ugamije kurwanya malariya n’ibindi byorezo, ASOFERWA ku bufatanye n’Ikigo cy’Igihugu cy’Ubuzima, RBC, batangije ubukangurambaga bugamije guhashya iki cyorezo cyane cyane mu bantu bafite ibyago byinshi byo kurumwa n’umubi.

Ubu bukangurambaga bwatangiriye muri Kigali, mu Karere ka Kicukiro ariko gahunda ni uko imiryango itandukanye binyuze muri RBC izabukora mu gihugu hose mu guhangana na malariya no kuyihashya burundu mu Rwanda.

RBC ivuga ko Akarere ka Kicukiro ari aka 17 mu kurwaza malariya cyane ko mu mwaka ushize habonetse ibihumbi 23 bityo atari umwanya mwiza wo kwishimira ari nayo mpamvu hatangijwe ubwo bukangurambaga kugira ngo bikemurwe.

Mu 2021, mu baturage 1000, abarwaye malariya ni 85 mu gihugu hose mu gihe 55/1000 ari bo bayirwaye muri Kicukiro. RBC igaragaza kandi ko abarwaye malariya y’igikatu mu ari 1900 mu gihe mu Karere ka Kicukiro bari 59 umwe ikamuhitana

Umuyobozi ushinzwe ibikorwa byo kurwanya Malariya muri RBC, Dr Aimable Mbituyumuremyi, yavuze ko nubwo ari imibare igaragaza intsinzi ku Rwanda ariko hakiri byinshi byo gukora ku buryo umubare w’ubwandu ugera kuri 0/1000.

Ati “Uretse na RBC, n’undi wese arabibona ko bihangayikishije kuko harimo ubuzima bw’abaturage bugenda. Abantu 69 bapfuye umwaka ushize ni imbaraga z’igihugu kandi ni imbaraga z’imiryango. Aho rero ni ikibazo gikomeye cyane ku bijyanye n’impfu ariko na wa wundi waryaye iy’igikatu ntabwo aba akibasha gukora akandi kazi.”

Yavuze ko kuba abanyarwanda bangana na 1.100.000 bararwaye maraliya mu mwaka ushize ari ibintu bihangayikishije kuko bagize hafi kimwe cya 10 cy’abaturage u Rwanda rufite kugeza ubu bityo ko ibibatangwaho biba ari byinshi.

Ati “Hari amafaranga agenda mu kuvura izo ndwara, hari atakara kuri ba bantu baba batabasha gukora ngo bateze imbere igihugu n’imiryango yabo. Nubwo wenda intambwe yatewe ari nini kuko atari ko byari bimeze mu myaka itanu ishize. Ubu byagabanyutseho hafi 80%, ni intambwe ishimishije ariko inzira iracyari ndende.”

Uyu muyobozi yavuze ko uretse inzego z’ubuvuzi zikwiye kugira impungenge ku kwiyongera kwa malariya ariko bikwiye kuba ibya buri wese guharanira kurwanya malariya nk’imwe mu ntego u Rwanda rufite.

Umunyamabanga Nshingwabikorwa wa ASOFERWA, Appolonaire Nshimiyimana, yavuze ko ari inshingano za buri wese zo kurwanya malariya by’umwihariko mu byiciro byihariye by’abantu bafite ibyago byinshi byo kwayandura.

Bamwe mu bafite ibyago byinshi byo kwandura malariya ni nk’abakora imirimo y’ijoro nk’abamotari, abacunga umutekano ku nyubako n’umutekano w’abantu n’ibintu n’abandi bafite aho bahuriye n’akazi k’ijoro kuko kabakururira kurumwa n’umubu.

Bimwe mu bikorwa Leta y’u Rwanda yari isanzwe ikora birimo gutanga inzitiramibu iteye umuti mu miryango itandukanye mu rwego rwo guhangana nayo gusa kuri ubu ibyo bikorwa byasaga n’ibyagabanyije umurindi biturutse ahanini ku cyorezo cya Covid-19 cyari kimaze igihe gishegesha Isi n’u Rwanda.

Ubushakashatsi bwa gatandatu ku buzima n’imibereho bwashyizwe ahagaragara mu mpera z’umwaka ushize, bwerekanye ko ingo zifite inzitiramibu ziteye umuti zagabanutse zikava kuri 84% mu mwaka wa 2014-2015 zikagera kuri 66% mu mwaka wa 2019-2020.

Bwagaragaje ko 34% by’ingo mu Rwanda zidatunze inzitiramibu, ariko kandi ngo n’ingo nyinshi zizifite ziri mu Mijyi kuko zihariye 76%, mu gihe ingo zo mu cyaro zifite inzitiramibu ziteye umuti ari 64% by’umubare w’abazifite wagaragajwe n’ubushakashatsi.

Inzego z’ubuzima zisobanura ko imibare y’abatunze inzitiramibu yiyongereye kuko ubushakashatsi bwakozwe mbere y’uko zitangwa mu 2020, bityo bukaba butarafashe iyi mibare.

Igikorwa cyo gutera umuti wica imibu itera malariya cyakozwe mu bice bitandukanye by’igihugu
Drone yifashishwa mu gutera umuti wica imibu mu ndiri yayo mu bishanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .