Ku va tariki ya 1 Nyakanga 2015, ibikoresho bifasha abantu kwipima virusi itera Sida bizatangira gucuruzwa mu maguriro y’imiti (pharmacies).

Ikinyamakuru MSN kivuga ko ibi bikoresho bifasha umuntu kwipima virusi itera Sida, bizajya bigaragaza ko umuntu afite virusi itera Sida yifashishije igitonyanga cy’amacandwe cyangwa icy’amaraso, igisubizo kigaragare mu minota itarenze icumi.

Ibi Minisitiri w’Ubuzima mu Bufaransa Marisol Touraine yabitangarije mu bitaro bya Saint Louis ku munsi mpuzamahanga wo kurwanya Sida.

Abantu bazajya bipima sida bakoresheje igitonyanga cy'amacandwe cyangwa icy'amaraso

Ibi bikoresho bifasha kwipima SIDA bizacuruzwa mu buryo butandukanye n’ubw’imiti isanzwe kuko bitazasaba urupapuro ruvuye kwa muganga (ordonnance).

Igiciro gishobora kuzaba kiri hafi y’amayero 20 ndetse imwe mu miryango yita ku buzima ishobora gufasha bamwe kuyibona ku buntu.

Ibi bikoresho bizatuma abantu batinyaga kwipimisha virusi ya Sida kwa muganga no mu bindi bigo bitanga izi serivisi, barushaho kumenya uko ubuzima bwabo buhagaze.

Ibi bikoresho bipima Sida byagombaga kugera ku masoko y’u Bufaransa mu mpera za 2014, ariko haracyategerejwe ikirango cy’ubuziranenge kibiha agaciro mu Burayi bwose.