Abaturage bo mu murenge wa Rutare bamaze igihe basaba ko ikigo nderabuzima bafite cyahabwa ubushobozi bwisumbuyeho nko kubakirwa ibyumba by’abarwayi no guhabwa abaganga b’inzobere.

Iki kigo nderabuzima gitanga serivisi ku mirenge byegeranye ya Gicumbi ari yo Rwamiko, Bukure, Muko, Nyamiyaga na Giti. Giha serivisi abo mu tundi turere nk’abava mu Karere ka Gatsibo mu murenge wa Gasange bajya kuhivuriza aho kujya ku bitaro bya Kiziguro.

Abo mu Karere ka Gasabo mu murenge wa Rutunga, ndetse nabo mu karere ka Rulindo bava ahitwa Ntarabana bajya kuhivuriza kuko ariho hafi.

Akarere ka Gicumbi Gafite imirenge 21 irimo ibigo nderabuzima 24, bavuga ko bitewe n’uko kagizwe n’imisozi n’utubande, usanga hari aho bisaba abaturage kuzenguruka umusozi ugakora urugendo runini ushaka kujya kwaka serivisi runaka.

Abaturage ba Rutare bavuga ko kubakirwa ibitaro mu gihe kitarenze imyaka ibiri bizabafasha kuko bakoraga urugendo rurerure cyane banyura mu mirenge ya Rutare, Nyamiyaga, Rukomo na Kageyo bagiye kwivuriza ku bitaro bikuru biherereye mu murenge wa Byumba.

Abadafite ubushobozi bahagendaga n’amagurubakagerayo barushijeho kuremba , abafite amikoro nabo bakavuga ko bibateza igihombo kuko kugenda no kugaruka bigusaba gutanga amafaranga agera ku bihumbi 10Frw wateze Moto, wabasha kubona imodoka igutwara bikagusaba amasaha menshi.

Nyiraneza Clarisse utuye muri uyu murenge avuga ko imvugo ari yo ngiro. Ati “Twabisabye umukuru w’igihugu none koko imvugo niyo ngiro, ubwo batwemereye kubona ibitaro bikuru nubwo bizatwara imyaka igera kuri ibiri, ariko turabyishimiye, gukora ingendo nini ku barwayi byari bigoranye”.

Ubwo Perezida Paul Kagame yasuraga Umurenge wa Rutare, yasize asabye inzego zishinzwe ubuzima ko bagomba kubikurikirana, bakareba niba ubusabe bw’abaturage bufite ishingiro, bakitegereza niba hari ubuso buhagije bwo kwagura inyubako zigenewe ibyumba by’abarwayi, kongeramo serivisi zidakorerwa ku bigo nderabuzima ndetse n’abaganga bisumbuyeho ariko bagasubiza ikibazo cy’abaturage.

Mu kwezi gushize Minisitiri w’Ubuzima Dr Ngamije Daniel yakoze uruzinduko yitegereza niba ubusabe bw’ abaturage ba Rutare bufite ishingiro, asanga ari byo, abasezeranya ko bagiye gukora ibishoboka kandi ko batarenza imyaka ibiri batubakiwe ibitaro bikuru bemerewe n’Umukuru w’Igihugu.

Dr Ngamije yitegereje inyubako z’ikigo nderabuzima bafite, areba ibikoresho ndetse n’abaganga bahari, avuga ko mu gihe kitarenze imyaka ibiri haraba hahindutse ibitaro bikuru.

Ati “Nababwiye ko ikigo nderabuzima cya Rutare kigomba kuba ibitaro byuzuye, nk’uko byatanzweho umurongo na Nyakubahwa Perezida wa Repubulika, ikibura ntabwo ari ikintu kinini, kuko duherutse no kubongerera abaganga, harimo na serivisi zo kubaga abarwayi, kwita ku bana batoya bakongererwa ibyumba byabo, bigiye gukorwaho umukoro, kandi nibura ntibirenze imyaka ibiri”.

Ubusanzwe ikigo nderabuzima cya Rutare cyari cyanahinduriwe izina kubera ubushobozi bwisumbuyeho gifite kurusha ibindi bigo nderabuzima, aho cyari gisigaye ku izina rya Rutare Medicalise Center. Iki kigo kandi cyakira abaturage bari hagati ya 3000 na 5000 ku kwezi

Ikigo nderabuzima cya Rutare cyakira abaturage bari hagati y'ibihumbi bitatu n'ibihumbi bitanu ku kwezi

Ubwo Minisitiri w'Ubuzima Dr Ngamije yasurage ikigo nderabuzima cya Rutare

Hari inyubako zikeneye kuvugururwa

Abaturage bakora urugendo rurerure iyo bashaka kujya ku bitaro i Byumba