Iki gikorwa cyatangajwe kuri iki cyumweru mu gihe hizihizwa umunsi mpuzamahanga wo gutanga amaraso, uba tariki ya 14 Kamena buri mwaka.
Umuyobozi w’Ikigo cy’Igihugu cyo gutanga amaraso, Dr. Gatare Swaibu, yavuze ko ubu mu maraso hazajya hafatwa icyo umurwayi akeneye gusa.
Yagize ati “Ubu mu maraso dukuramo igice dukeneye. Niba ari udufashi, nitwo twonyine dukuramo. Ibindi bice nk’umushongi, insoro zitukura n’ibindi bigasubiramo. Uburyo twakoreshaga uyu munsi, kugera ngo tubone dose (ingano) y’udufashi(Plaquette) twahereza umuntu mukuru, byadusabaga abantu batanga amaraso batandatu. Noneho iri koranabuhanga, umuntu umwe wenyine ashobora gutanga dose zigera kuri eshatu, ni ukuvuga ngo twagombaga gukenera abantu 18 kuri dose eshatu.”
Umunyamananga wa Leta muri Minisiteri y’ubuzima, Patrick Ndimubanzi, yavuze ko u Rwanda ruri gukora ibishoboka ngo rugere ku ngingo ya 4 mu ntego z’ikinyagihumbi, igena ibijyanye no kugabanya imfu z’ abagore n’ abana bapfa buri munsi kubera kubura amaso.
Ishami ry’Umuryango w’Abibumbye ryita ku buzima, OMS, rigaragaza ko abagore 800 bapfa buri munsi ku Isi babyara cyangwa batwite kubera kubura amaraso.
Yagize ati “Amaraso ahagije kandi azira inenge ni kimwe mu bifasha u Rwanda gukumira imfu z’ababyeyi n’abandi batakaza amaraso menshi ku mpamvu zinyuranye, nk’izo kubagwa, impanuka zo mu muhanda, uburwayi nka malariya, kanseri n’izindi zinyuranye.”
Ikigo cy’Igihugu cyo gutanga amaraso kivuga ko ku mwaka cyakira udupaki, ibihumbi 51 tw’amaraso aba yatanzwe n’abagiraneza.
Ikoreshwa ry’izi mashini nshya rizagabanya akazi n’umwanya gutandukanya ibikenewe mu maraso byafataga muri Laboratoire, kuko izi mashini zizajya zibyikorera.
Imashini zatangijwe ni ebyiri zatanzwe ku nguzanyo y’Ikigo cy’Abanyamerika kirwanya indwara, CDC, zikazajya zishyurwa buhoro buhoro.
TANGA IGITEKEREZO