Byinshi ku ndwara y’ibibyimba byo mu bwonko irangwa n’ibirimo gutakaza ubushobozi bwo kureba

Yanditswe na Evariste Nsengimana
Kuya 12 Ukwakira 2019 saa 07:34
Yasuwe :
0 0

Inzobere mu by’ubuzima zigaragaza ko ibibyimba byo mu bwonko ari indwara ibaho igihe habayeho ikosa mu kwirema cyangwa kwiyegeranya k’uturemangingo tw’umubiri, bikabyara ikibyimba kigenda gikura buhoro buhoro, kigashegesha igice cy’imbere mu mutwe.

Ni indwara yica, ibarirwa mu zitandura. Ishobora kwizana cyangwa ikagira isano ya hafi na kanseri, ikibasira cyane abanywa itabi ryinshi kurusha abandi kuko ryifitemo ubumara bwangiza uturemangingo tw’umubiri.

Umuganga w’inzobere mu kubaga indwara z’ubwonko n’uruti rw’umugongo mu bitaro bya Kaminuza bya Kigali (CHUK), Dr Muneza Severien, avuga ko umuntu ashobora kugira ibibyimba mu bwonko byizanye cyangwa bifitanye isano na kanseri.

Ati “Umuntu yavuga ko byizana kuko ntibyandura ariko hari izindi mpamvu ziterwa n’imiterere y’umubiri we ishobora gutuma umuntu agira ikibyimba mu mutwe ariko hakabanaho n’izindi mpamvu zishingiye ku mirimo abantu bakora.”

Aha atanga urugero nk’abantu bakora mu birombe by’amabuye y’agaciro bikoresha imirasire yangiza, ahari ibyuka bihumanya n’ibindi, Ati “Bigatera umuntu kurwara nka kanseri yo mu bihaha, ikahava ijya mu bwonko, cyane cyane nk’abanywa itabi.”

Dr Muneza avuga ko inshuro nyinshi iyo umuntu agiye kurwara ikibyimba mu bwonko hari ibimenyetso biburira yakwibonaho akihutira kwivuza.

Ati “Hari ibimenyetso bitatu bikunze kuhaho, cyane cyane kubabara umutwe udakira, kugenda utakaza ubushobozi bwo kureba, bigaragaza ko hari ikintu kiyongereye mu bwonko, ushobora no kugira ibintu byo kugagara atari ibintu byatangiye kukugaragaraho ukiri muto.”

Ibibyimba byo mu bwonko bivurwa mu buryo butatu birimo kubibaga, kubishiririza no gufata imiti ibivura isanzwe, butangwa bitewe n’ubukana muganga w’inzobere yabonye bifite cyangwa icyiciro bigezeho.

Abaganga ni mbarwa

Dr Muneza avuga ko muri rusange abaganga babaga mu Rwanda atari benshi by’umwihariko ababaga indwara z’umutwe akaba ari mbarwa.

Ishami ry’umuryango w’Abibumbye ryita ku buzima riteganya ko umuganga w’inzobere umwe muri iki cyiciro akwiye kwita ku barwayi ibihumbi 100 ariko u Rwanda rutuwe na miliyoni zisaga 12 rufite abaganga batandatu.

Dr Georgios Tremoulas uri kuvurira muri CHUK muri gahunda y’umuryango ‘Rwanda Legacy of Hope’ washinze n Pasiteri Ntavuka Osée, avuga ko kuvura abarwaye ibibyimba byo mu mutwe mu Rwanda bikiri ikibazo.

Binyuze muri iyo gahunda babaze abantu 16 mu gihe abakeneye kubagwa barenga 250.

Ati “Ni ikibazo ariko ntekereza ko birimo gutera imbere, turimo gukorana n’urubyiruko rw’abaganga babaga hano tubahugura, bamwe bakajya no kubyiga mu mahanga, bakagaruka bagakorera hano ku buryo bitanga icyizere ku buvuzi bwabyo mu gihe kiri imbere.”

Dr Georgios avuga ko ufite ikibyimba mu mutwe bimugiraho ingaruka zirimo impinduka mu mitekerereze, kwitiranya ibintu, kunanirwa, agahinda gakabije, kudafata ibintu mu mutwe n’ibindi.

OMS igaragaza ko indwara zifata ubwonko ziza ku mwanya wa 10 mu zica abantu benshi ku Isi.

Abaganga babaga indwara zo mu mutwe ntabwo ari benshi mu Rwanda

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza