Ku wa 2 Nyakanga 2013, IGIHE twasohoye inkuru ifite umutwe ugira uti “Abafashwaga na Global Fund binyuze muri MINISANTE baranenga igenzura bakorewe”. Muri iyo nkuru umunyamakuru yagaragaje uburyo bamwe mu bahagarariye imishinga yafashwaga na Global Fund muri gahunda yo kurwanya SIDA, batishimiye uburyo bakuwe ku rutonde rw’abagomba gusigara bafashwa muri iyi myaka ibiri (2013-2015), banenga n’uburyo isuzumwa ryakozwe. Minisiteri y’ubuzima yagize icyo ivuga ku birebana n’inkuru yatangajwe.
Imiterere y’ikibazo
Mu mpera z’ukwezi kwa Kamena uyu mwaka ni ho Imishinga iterwa inkunga n’ikigega cy’isi gishinzwe Kurwanya SIDA Malariya n’igituntu yagombaga kurangira. CCM Rwanda yasabye GF ko hakongerwaho igihe cy’imyaka ibiri (2013-2015) kugira ngo hashobore kurangiza ibikorwa byatangiye kandi hategurwe n’indi mishinga yo gushyikiriza GF.
Ariko bitewe n’uko amafaranga yagenewe icyo gihe cy’inyongera ari make byabaye ngombwa ko imiryango itegemiye kuri Leta (local NGO) yashyiraga mu bikorwa umushinga SSF/HIV igabanuka ikava kuri 87 ikagera kuri 30.
Ku itariki ya 10 Ukuboza 2012 imiryango yose yakoranaga n’ishami rya Minisiteri y’Ubuzima rishinzwe gukurikirana imishinga (SPIU/MOH ) yagejejweho itangazo riyihamagarira gukora imishinga y’ipiganwa.
CCM yateganyaga ko gukomeza ibikorwa byashingira ku isuzuma ry’imiryango yose yashyiraga mu bikorwa umushinga SSF/HIV, bityo imiryango 30 ya mbere ikaba ari yo ikomeza kubona inkuga ya GF mu gihe cy’imyaka 2 y’inyongera.
Ibyagendeweho muri iryo suzuma byemejwe n’inama ya CCM kandi hemezwa ko ONU SIDA ari yo ishingwa igikorwa cyo gutoranya iyo miryango.
Uburyo Bwakoreshejwe
Habayeho inama zitandukanye zo gutegura uburyo bwakoreshwa, hanyuma itsinda ryagombaga gukora isuzuma ryemeza ko igenzura ryagendera ku bintu bitatu: Isuzuma ry’imikorere mu biro, isuzuma ry’uko umushinga wagejejwe ku bagenerwabikorwa n’isuzuma ry’imishinga y’ipiganwa.
1. Isuzuma ry’imikorere mu biro
CCM yasanze iri suzuma ryahabwa agaciro kugira ngo hizerwe ishyirwa mubikorwa ry’umushinga ku buryo burambye kabone n’iyo inkunga ya GF yahagarara.
Mu biro harebwaga ibintu bitatu
– Uburyo umuryango washoboye gushaka abandi baterankunga mu gihe cy’imyaka itatu ishize kandi ukerekana impapuro zibyemeza. Iyi ngingo yagenewe amanota 60 ku buryo bukurikira:
Umuterankunga umwe : amanota 20
Abaterankunga 2 :amanota 30
Abaterankunga 3 : amanota 40
Abaterankunga 4 : amanota 50
Hejuru y’abaterankunga 5 amanota 60
Kuba nta muterankunga: amanota 0
– Hagendewe kandi no kureba umubare w’amafaranga umuryango washoboye gushakisha buri mwaka. Iyi ngingo yahawe amanota 30 ku buryo bukurikira:
Kuva ku madolari y’amanyamerika 5000 kugeza ku bihumbi 20000 amanota 5
Kuva ku madolari 20001 kugeza ku 30000 amanota 15
Kuva ku madolari 30001 kugeza ku 50000 amanota 20
Hejuru y’amadolari 50000 amanota 30
Harebwe kandi n’uburyo abakozi bashyizwe mu myanya bigenerwa amanota 10 ku buryo bukurikira: hashingiwe ku masezerano y’akazi ,ifishi abakozi bahemberwaho n’impamyabushobozi bafite nk’uko byasabwa na GF.
Umukozi 1 niba ari we wujuje ibyangomba bisabwa hatangwaga amanota 2.5
Abakozi 2 bujuje ibyangombwa bisabwa hatangwaga amanota 5
Abakozi 3 bujuje ibyangombwa bisabwa hatangwaga amanota 7.5
Abakozi 4 bujuje ibyangombwa bisabwa hatangwaga amanota 10
2. Isuzuma ry’uko umushinga wagejejwe ku bagenerwabikorwa
Hemejwe ko imiryango yahabwaga inkuga yasurwa ku buryo butunguranye kugira ngo iryo suzuma rirusheho kugenda neza.
Hari ibibazo by’uburyo butatu
Hari ibibazo byabazwaga abagenerwabikorwa: amanota 15; ibyabazwaga abayobozi b’inzego z’ibanze: amanota 15; n’uko ugenzura yabonaga uko umushinga washyizwe mu bikorwa: amanota 15.
Nyuma yo gusuzuma ibyo mu biro n’uko umushinga wagejejwe ku bagenerwabikorwa, hashyizweho uburyo bwo kureba abashobora gukomeza mu kindi cyiciro.
Hemezwa ko kugira ngo umuryango ukomeze ugomba kuba ufite nibura manota 60% ku bijyanye n’ishyirwa mu bikorwa ry’umushinga, n’amanota 70% ku isuzuma ryakorewe mu biro. Bivuze ko utaragezaga ku manota asabwa hombi yahitaga abura amahirwe yo gukomeza. Ibyo bigatuma umushinga w’ipiganwa udakomeza mu cyiciro gikurikira. Bityo imiryango igera kuri 29 ntiyashoboye gukomeza mu cyiciro gikurikira.
Twakwibutsa ko imiryango 2 ari yo : Profemmes-Twese Hamwe na Rwanda Women Community Development Network itatanze imishinga.
Imiryango 41 ni yo yashoboye gukomeza mu cyiciro cyakurikiye.
3. Isuzuma ry’imishinga: Kuri iki cyiciro hagendewe kuri ibi bikurikira
Igice kirebana na Tekiniki: Iki gice cyagombaga kuba kitarengeje ipaji imwe (amanota2), ibirebana no kwandura Virusi itera SIDA biciye mu mibonano mpuzabitsina (amanota 6),Kuzamura imibereho myiza y’ababana na Virusi itera SIDA (amanota 6), imicungire no guhuza ibikorwa bigomba kutarenza ipaji imwe (inota1), gukurikirana no guhuza ibikorwa ku rwego rw’Akarere (amanota 8), gahunda y’ikurikiranabikorwa (amanota 3), Uburyo bunoze bwo gutanga amakuru (amanota 3), Kwerekana ibipimo by’isuzuma (amanota 3), Ubushobozi bw’umuryango n’aho ibikorwa byawo bigarukira ntibyagombaga kurenza ipaji imwe (amanota 3), Uko umuryango usanzwe ukurikirana ibikorwa (amanota3), amashuri abakora mu muryango bafite n’uburambe ku kazi (amanota 3), Ubunararibonye mu gushakisha amafaranga no gukorana n’indi miryango ntibyagombaga kurenza ipaji (inota 1), Ubunararibonye mu gushakisha amafaranga no gucunga imishinga (amanota 9), Uruhare rw’umuryango mu ishyirwa mu bikorwa ry’umushinga (amanota 5), Gahunda y’ibikorwa n’ingengo y’imari bikubiyemo ingengabihe y’ibikorwa (amanota 2) n’ingengo y’Imari mu mwaka umwe (amanota 8).
Ibindi bibazo
– Kuba umushinga Access Project warasuzumwe inshuro 2 aho ushyirira mu bikorwa umushinga byatewe n’uko mu gihe cyo kwandika amanota ONUSIDA yasanze hari ifishi imwe gusa mu gihe abakoze isuzuma bari 2. Itsinda ryari rishinzwe isuzuma ryahisemo kohereza abandi bagenzuzi bahitamo ahandi hantu hatandukanye n’aho aba mbere bari bagiye mu rwego rwo kwirinda guteguza nk’uko byagenze ahandi.
– Ku byavuzwe na ASSOCIATION IGIHOZO ko umushinga SSF/HIV wagomba kwita ku babana na Virusi itera SIDA, Urugaga rw’amashyirahamwe y’ababana na Virusi itera SIDA ku rwego rw’Igihugu na rwo ni abagenerwabikorwa b’uyu mushinga kandi mu gutoranya abagenerwa bikorwa ku nzego z’ibanze bahera ku bantu b’abakene babana na Virusi itera SIDA.
– Nyuma yo gutangaza amanota yavuye mu isuzuma CCM yatanze igihe cy’iminsi irindwi kugira ngo umuryango utaranyuzwe ubigaragaze.
Ubunyamabanga bwa CCM byakiriye ibibazo byo kutanyurwa by’imiryango 15 kandi byose byarashubijwe bimenyeshwa abagize CCM.
TANGA IGITEKEREZO