Guhera muri Mutarama uyu mwaka imibare y’abandura iki cyorezo muri iki gihugu yagiye igabanuka aho yavuye ku bantu 8000 ikagera ku bantu bari munsi y’igihumbi ku munsi.

BBC itangaza ko ibi byatewe ahanini na gahunda yo gukingira abaturage, aho kugeza ubu ari cyo gihugu cya mbere ku Isi gifite umubare munini w’abantu bakingiwe Covid-19. Muri miliyoni 9 z’abaturage ba Israël, abarenga miliyoni eshanu bamaze guhabwa dose ebyiri z’urukingo rwa Pfizer-BionTech.

Minisitiri w’Ubuzima w’iki gihugu, Yuli Edelstein, ku wa 23 Mata yanditse ku rukuta rwe rwa Twitter ati “Iyi ni intambwe ikomeye ku nzego z’ubuzima za Israël no ku baturage bayo. Twese hamwe turi kurandura icyorezo cya Covid-19.”

Muri iki gihugu ubuzima burasa nk’ubwenda gusubira mu buryo, kuko uko abaturage benshi bakingirwa bagahabwa ubudahangarwa bwo kurinda ko virus, bituma igenda icika intege ntiyongere kubona uko ikwirakwira.

Inzobere z’Ishami ry’Umuryango w’Abibumbye ryita ku buzima, OMS, zitangaza ko kugira ngo icyorezo gicike intege ku rwego kitabasha gukwirakwira mu bantu, hasabwa ko nibura hagati ya 65% na 70% by’abaturage bakingirwa.

Mu Cyumweru gishize, Eyal Leshem, Umuyobozi w’Ibitaro Bikuru muri Israël, Sheba Medical Center, yatangaje ko iki gihugu kiri hafi kugera kuri uru rwego.

Ati “Impamvu rukumbi y’igabanuka ry’icyorezo cya Covid-19 muri Israël ni uko abaturage bafite ubudahangarwa. Ibi bitubwira ko n’iyo umuntu yakwandura Coronavirus, atakwanduza abo yahura nabo aho ajya hose.”

Iki gihugu cyatangiye gahunda yo gukingira abaturage mu mpera za Ukuboza mu 2020. Kuva ubwo cyakomeje kuyobora Isi mu bihugu bifite abaturage benshi bakingiwe ndetse kirateganya no gukingira abana bari hagati y’imyaka 12 na 15, nibimara kwemezwa.

Ku wa Gatanu, muri Israël handuye abantu 85 gusa, 272 barakira, mu gihe abakirwaye Covid-19 ari ibihumbi umunani. Abamaze guhitanwa nayo ni 6346.

Israël ni cyo gihugu cya mbere ku Isi kimaze gukingira abaturage benshi