00:00:00 IGIHE NETWORK KN KINYARWANDA EN ENGLISH FR FRANCAIS

Legacy Clinics yatangije ikoreshwa ry’imashini ya ‘MRI’

Yanditswe na Kanamugire Emmanuel
Kuya 19 January 2022 saa 07:31
Yasuwe :

Ivuriro ryigenga, Legacy Clinics ryamuritse imashini kabuhariwe yifashishwa mu gupima indwara zinyuranye z’imbere mu mubiri w’umuntu, izwi nka MRI (Magnetic Resonance Imaging).

Iyi mashini yamuritswe kuri uyu wa 19 Mutarama 2022, yaguzwe miliyoni 1,3 z’amayero (agera kuri miliyari 1,480 z’amafaranga y’u Rwanda). Uretse muri Legacy Clinics, imashini nk’izi ziboneka mu Bitaro byitiriwe Umwami Faisal no muri Medi Heal.

Ifite ubushobozi bwo gusuzuma indwara z’umugongo, umutima, impyiko, umwijima n’izindi ikaba yitezweho gutuma serivisi zitangwa mu buryo bwihuse kandi bunoze kuko ibizamini byihuta bizajya bibonerwa ibisubizo mu masaha atarenze atatu mu gihe ibihanitse bitazajya birenza amasaha 24.

Umuyobozi uhagarariye abashoye imari muri Legacy Clinics, Kalima Jean Malic, yavuze ko iyi mashini yaguzwe mu rwego rwo gufasha Leta gukemura ibibazo by’ubuvuzi no kugera ku ntego yayo yo kubaka ubukerarugendo bubushingiyeho.

Yagize ati “Ubuvuzi bw’ubu bukeneye ko hakoreshwa MRI kugira ngo icyo umuntu arwaye kibashe kumenyekana bitagoranye. Ni ikintu cy’ingenzi muri aka karere kuko ubuvuzi budafite ibikoresho ntacyo buvuze. Mu kuvugurura uru rwego ni ngombwa gushoramo imari igaragara. Leta yabishoyemo amafaranga ariko biracyakenewe ko urwego rw’abikorera na rwo rubyitabira.”

Yakomeje ati “Mu rwego rw’ubukerarugendo bushingiye ku buvuzi, turimo turarwanya ko twakomeza kohereza abarwayi mu bihugu by’amahanga ahubwo tukagerageza gushakira ibisubizo ibibazo bimwe na bimwe.”

Umuyobozi w’ishami rishinzwe ubuvuzi rusange muri Minisiteri y’Ubuzima, Dr Ntihabose Corneille, yavuze ko abagana amavuriro yigenga biyongereyeho 30% ugereranyije umwaka ushize n’uwabanje bitewe n’uko agenda afungura serivisi nshya cyangwa akavugurura izisanzwe.

Nubwo bimeze bityo ariko, Dr Ntihabose yavuze ko MRI mu Rwanda zikiri nk’igitonyanga mu nyanja ugereranyije n’izikenewe.

Ati “Iyo ugiye kureba MRI zikenewe turacyari kure kandi ari byo bifasha mu mitangire ya serivisi nko kugabanya umwanya umurwayi amara ategereje ibisubizo by’ibizamini, impfu kimwe n’ibishobora gutuma umuntu azahara.”

Dr Ntihabose yakomeje avuga ko hakiri n’ibindi bikoresho bikenewe mu buvuzi butandukanye bisabwa ko abikorera bashoramo imari.

Ati “Igihugu cyacu nta mabuye y’agaciro menshi kigira, cyihaye intego yo gushora muri serivisi, byose bigomba kunoga kandi bitanga ibisubizo by’ibibazo dufite. Haracyari ibindi byinshi bikenewe twifuza ko mukomeza gufashamo Abanyarwanda. Turacyakeneye ‘Super Speciality’, ‘Cath Lab,… turabizi ko mubizi kandi ari umukoro dufitanye.”

Abakoresha ubwishingizi bw’indwara bemerewe kwisuzumisha hakoreshejwe MRI muri Legacy Clinics. Ibi byatumye mu Ukuboza 2021 bumaze kwemerwa hasuzumwa abagera ku 103 bavuye kuri 30 mu Ukwakira na 32 mu Ugushyingo.

Ikiguzi cyo gukorerwa ikizamini hifashishijwe MRI kiri hagati y’ibihumbi 120 na 200 by’amafaranga y’u Rwanda bitewe n’igice cy’umubiri umurwayi yisuzumisha n’ubwishingizi bw’indwara akoresha.

Legacy Clinics ifite abaganga 53 b’inzobere mu nzego zitandukanye. Abayigana bagera ku bihumbi 30 buri kwezi barimo Abanyarwanda, abanyamahanga baba mu Rwanda n’abaturuka mu Karere u Rwanda ruherereyemo.

Ubukerarugendo bushingiye ku buvuzi ni kimwe mu byo igihugu cyifuza ko bukomeza kwaguka bugafasha mu kwinjiza amadovize.

Ibyo bizagerwaho mu gihe ubuvuzi buzazamurwa bukagezwa ku rwego rwo hejuru. Nk’ubuvuzi bwa kanseri i Butaro mu Ntara y’Amajyaruguru bukenerwa n’Abanyarwanda ndetse n’abaturutse mu bindi bihugu nka RDC, u Burundi, Uganda n’ahandi kimwe n’uko Ibitaro byitiriwe Umwami Faisal byakira n’abanyamahanga.

Ubuyobozi bwa Legacy Clinics ubwo bwamurikiraga MRI abafatanyabikorwa n'abayigana
MRI ifite ubushobozi bwo gusuzuma indwara zirimo iz'umugongo, umutima, impyiko n'izindi igatanga ibisubizo mu gihe gito
Umuyobozi ushinzwe ibikorwa by'ubuvuzi muri Legacy Clinics, Dr Yves Bizimana asobanura uko MRI izafasha kunoza serivisi batanga
Umuyobozi Mukuru w'Ishami ry'Ubuvuzi muri Minisante, Dr Corneille Ntihabose, yahamagariye abikorera gushora imari mu bikorwa biteza imbere ubuvuzi
Umuyobozi uhagarariye abashoye imari muri Legacy Clinics, Kalima Jean Malic, yavuze ko iyi mashini yaguzwe mu rwego rwo gufasha leta gukemura ibibazo by’ubuvuzi
Bamwe mu bitabiriye umuhango wo kumurika MRI muri Legacy Clinics
Legacy Clinics iherereye mu Karere ka Kicukiro mu Mujyi wa Kigali

Amafoto: Nezerwa Salomon


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .