RBC yatangaje ko ibinini bya Coartem bizakomeza gukoreshwa mu kuvura Malaria

Yanditswe na Muhonzire Sylvine
Kuya 19 Mata 2021 saa 10:32
Yasuwe :
0 0

Ikigo cy’Igihugu gishinzwe Ubuzima, RBC, cyatangaje ko ibinini bikoreshwa mu Rwanda mu kuvura indwara ya Malaria, Coartem, bizakomeza gukoreshwa nubwo byagaragaye ko byacitse intege ku buryo bitakibasha gukiza umuntu vuba nk’uko byari bisanzwe.

Umuyobozi w’Ishami rishinzwe indwara ya Malaria n’izindi ziterwa n’udukoko muri RBC, Dr Aimable Mbituyumuremyi, yabwiye The New Times ko nta mpamvu yatuma u Rwanda ruhagarika ikoreshwa ry’ibi binini mu gihe bigifite ubushobozi bwo kuvura Malaria ku kigero kirenga 96%.

Yasobanuye ko buri mwaka hakorwa igenzura ku barwayi barwaye Malaria bahawe Coartem, bakareba niba koko igifite ubushobozi bwo kuvura iyi ndwara.

Yagize ati “Dufata itsinda ry’abarwayi tukabakurikirana, tukanareba uko bamera mu gihe bari kunywa ibi binini. Iyo tubonye ko biri gukora neza, dukomeza kubikoresha twabona bitagikora neza turahindura tugakoresha undi muti mushya.”

Ubusanzwe ibinini bya Coartem bigizwe n’imiti ibiri, umwe witwa Artéméther uba ufite miligarama (mg) 20 n’uwitwa Luméfantrine wa mg 120. Ibi nibyo byica agakoko gatera Malaria mu maraso gakwirakwizwa n’umubu w’ingore witwa Anopheles.

Dr Mbituyumuremyi yavuze ko mu bushakashatsi bwakorewe mu Murenge wa Rukara ho mu Karere ka Kayonza, mu wa Bugarama mu Karere ka Rusizi no mu Murenge wa Masaka ho mu Karere ka Gasabo, basanze uwitwa Artéméther ariwo utagishoboye guhangana bihagije n’agakoko gatera Malaria.

Nubwo ariko Coartem yacitse intege, byagaragaye ko ifite ubushobozi buhanitse mu kuvura Malaria. Ati “Mu Rwanda uyu muti uhabwa abantu kandi ugakora neza ku kigero kirenze 96%. Nta kimenyetso kigaragaza ko uyu muti udakora akazi kawo, rero iyo umuti ufite ubushobozi burenze 95% mu kuvura bifatwa ko nta kibazo ufite.”

Yongeyeho ko Guverinoma y’u Rwanda izakomeza kubikurikiranira hafi, kugira ngo mu gihe bikomeje kugaragara ko uteje ikibazo harebwe icyakorwa.

U Rwanda rumaze imyaka igera ku icumi rukoresha Coartem mu kuvura indwara ya Malaria, bigafatanywa na gahunda ya leta yo gutera umuti wica udukoko mu nzu z’abantu nka bimwe mu birinda ko Malaria yakwiyongera. Gusa kubera icyorezo cya Covid-19, uyu mwaka ntibyigeze bikorwa kubera ingamba zo kukirinda.

Nubwo uyu muti utatewe mu mwaka ushize wa 2020, Minisiteri y’Ubuzima itangaza ko Malaria yagabanutse, kuko mu mwaka 2017-2018, mu bantu igihumbi harimo 401 barwaye Malaria, mu gihe mu 2019-2020 byagaragaye ko mu bantu 1000 haba harimo 200 bayirwaye.

RBC yavuze ko Coartem izakomeza gukoreshwa mu kuvra Malaria

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .