Ku wa 23 Nzeri nibwo umuntu wa mbere yagaragayeho iyi virusi mu Mujyi wa Jaipur muri Leta ya Rajasthan iri mu Burengerazuba bw’u Buhinde.

Umuyobozi ushinzwe ubuzima rusange muri Leta ya Rajashtan, Dr V.K. Mathur, yavuze ko itsinda ry’abaganga 330 boherejwe mu gace kagaragayemo iyi virusi, mu rwego rwo kurwanya ko yakomeza gukwirakwira.

Amakuru CNN ikesha Minisiteri y’Ubuzima mu Buhinde avuga ko abantu bagera ku 434,515 bari gukurikiranirwa hafi, mu gihe ingo 86,903 arizo zimaze gusuzumwa.

Ni mu gihe abagore bose batwite bari gukurikiranirwa hafi, bane muri bo bamaze kubyara abana bazima. Umwana uvutse ku mubyeyi uyirwaye ashobora kuvukana umutwe muto, urimo ubwonko budakora neza “Microcephaly”.

Imbaraga nyinshi kandi zikomeje gushyirwa mu gutera imiti yica imibu, aho leta imaze gushoramo ibihumbi 147 by’ama-rupees (hafi miliyoni ebyiri z’Amanyarwanda).

Ni ku nshuro ya gatatu u Buhinde bwibasiwe na Zika kuva mu 2017, aho muri uriya mwaka yagaragaye muri Mutarama na Nyakanga.

Virusi ya Zika isakazwa n’imibu yo mu bwoko bwa Aedes aegypti, ifite inkomoko mu ishyamba ryo muri Uganda, ikaba yarabonetse bwa mbere mu maraso y’inkende yabaga muri iryo shyamba mu 1947.

Yabonetse bwa mbere mu maraso y’umuntu muri Nigeria mu 1958. Ishami ry’Umuryango w’Abibumbye ryita ku Buzima, OMS, ryavuze ko Virusi ya Zika yanduzwa n’ubu, kandi ikaba ishobora no guhererekanywa binyuze mu mibonano mpuzabitsina.

Muri Werurwe 2018, Ikigo gishinzwe ibirebana no kurwanya ibyorezo muri Leta Zunze Ubumwe za Amerika, CDC, cyagaragaje ko ibihugu bigera kuri 90 birimo imibu ishobora kwanduza Zika.

Virusi ya Zika isakazwa n’imibu yo mu bwoko bwa Aedes aegypti