Ni umuti bivugwa ko ushobora kuvura umuntu ukuze cyangwa umwana wagaragaje ibimenyetso bya Monkeypox. Igeragezwa ryatangiriye muri RDC rigamije gusuzuma ubudahangarwa bwawo n’uburyo ushobora guhangana n’ibimenyetso by’iyo ndwara.

Ikigo cy’igihugu gishinzwe kugezenzura indwara zandura (NIAID), Ikigo cya Leta zunze ubumwe cyita ku buzima n’Ikigo cya RDC gishinzwe ubushakashatsi ku buzima (INRB) ni byo biri mu bufatanye bw’igeragezwa ry’uyu muti.

Uyu muti wakozwe n’Ikigo gisanzwe gikora imiti cyo muri Amerika cya SIGA Technologies.Inc wemezwa n’ikigo gishinzwe ubugenzuzi bw’ibiribwa n’imiti muri iki gihugu nk’ushobora gukiza uduheri duto ku mubiri.

Witezweho kugabanya ikwirakwira rya Virus mu mubiri binyuze mu kuyibuza kuva ku tunyangingo iriho ngo ikwirakwire. Ni umuti ugizwe n’ibiboneka muri virusi itera ubushita (smallpox) n’ubushita bw’inguge (Monkeypox).

Imibare y’Ikigo gishinzwe gukumira indwara muri Afurika (Africa CDC), igaragaza ko mu bantu 3326 baketsweho iyi ndwara 160 bayisanzwemo inahitana 120 muri Repubulika Iharanira Demokarasi ya Congo guhera muri Mutarama kugera muri Nzeri 2022.

Ubu bushakashatsi buzakorerwa ku bantu 450 barimo abakuru n’abana bafite nibura ibiro bitatu nkuko byemezwa n’ibisubizo muri Laboratwari. Abazabukorerwaho bazashyirwa mu bitaro iminsi 14 bitabwaho ariko bagasezererwa ari uko ibisubizo bigaragza ko bakize.