Kuva muri Nyakanga 2021, hagaragaye umubare munini w’abandura n’abahitanwa n’icyorezo cya Covid-19, aho byageze aho abandura ku munsi barenga 1000 n’abapfa bakagera kuri 15 ndetse byageze mu mpera za 2021 virusi yihindurije ya Omicron igiteye impungenge.

Byageze mu ntangiriro z’uyu mwaka hatangiye kugaragara impinduka, ibyemezo byo koroshya ingamba zo kwirinda bitangira gufatwa.

Ku ikubitiro muri Werurwe amasaha y’ingendo yakuweho nyuma y’imyaka irenga ibiri yari amaze yubahirizwa mu gihugu hanafungurwa imipaka y’u Rwanda yo ku butaka.

Nyuma y’amezi abiri gusa, Guverinoma yemeje ko bitakiri itegeko kwambara agapfukamunwa mu mwanzuro wafatiwe mu Nama y’Abaminisitiri yo ku wa Gatanu, tariki ya 13 Gicurasi 2022.

Igihugu gihagaze he?

Kuva ku mwaduko wa Covid-19 mu Rwanda hafashwe ingamba zitandukanye zirimo gufunga ibikorwa bihuza abantu benshi no gushaka uko inkingo zagezwa ku bantu benshi mu gihe gito.

Ibikorwa byo gukingira Covid-19 byatangijwe muri Gashyantare 2021 haherewe ku baturage bafite ibyago byo kwandura kurusha abandi.

Imibare ya Minisiteri y’Ubuzima yo mu Cyumweru cyo kuva ku wa 12-18 Ukuboza 2022 igaragaza ko Abanyarwanda bahawe doze ya mbere y’urukingo rwa Covid-19 bageze ku 10.313.434 naho abahawe ebyiri bakaba 9.897.876.

Abahawe doze ishimangira barenga miliyoni 5,6 mu gihe doze ya kabiri ishimangira yahawe abarenga ibihumbi 366. Muri rusange 71,6% bakingiwe mu buryo bwuzuye mu gihe abahawe urukingo rushimangira ari 45,39%.

Mu banduye bose abagore ni bo benshi ariko na none mu bagabo ni ho hapfuyemo benshi. Abagore bapfuye ni 678 (46,83) ugereranyije na 780 b’abagabo bangana na 53,17%.

Mu 2022 handuye abagera ku 2000 bakuye ubwandu hanze y’igihugu n’abandi nk’abo banduriye imbere mu gihugu.

Iyi mibare ya Minisiteri y’Ubuzima igaragaza ko abari mu kigero cy’imyaka iri hagati ya 30 na 39 ari bo banduye ari benshi aho barenga ibihumbi 34 mu gihe abo mu kigero cy’imyaka kuva kuri 80 gusubiza hejuru baranduye ari bake (abarenga 2000) ari cyo cyapfuyemo benshi.

Akarere ka Gasabo ni ko kagize abantu benshi banduye aho barenga ibihumbi 16 mu gihe Nyarugenge ari yo yapfushije benshi, barenga 500 mu barenga ibihumbi 13 banduye.

Mu tundi turere twapfushije benshi harimo Huye ifite 92 mu5 444banduye; Nyagatare ifite 44 mu banduye 3249 na Gasabo yapfushije 91 mu barenga ibihumbi 16 banduye.

Akarere ka Ngororero ni ko kari inyuma y’utundi mu gukingira doze ya mbere. Abayihawe bagera kuri 77,1%; abakingiwe byuzuye ni 75,7% mu gihe abahawe urukingo rushimangira ari 52,7%.

Muri Nyamasheke abahawe doze ya mbere ni 85%; abakingiwe byuzuye bakaba 80,6% mu gihe abahawe dose ishimangira bageze kuri 50%.

Mu Karere ka Nyabihu abitabiriye kwikingiza ni 87,2% kuri doze ya mbere; 91,6% kuri zombi na 49,8% kuri doze ishimangira.

Nyuma yo gutera intambwe ikomeye mu gukingira abakuze, u Rwanda rwatangiye no gukingira abana bari munsi y’imyaka 12 y’amavuko.

Kugeza ubu bigaragara ko abamaze gufata doze ya mbere (mu bari hagati y’imyaka itanu na 11) barenga miliyoni 1,1 na ho abahawe doze ya kabiri barenga ibuhumbi 933.

Imiterere y’ubwandu muri aya mezi ya nyuma y’umwaka wa 2022

Raporo ya Minisiteri y’Ubuzima igaragaza imiterere y’ubwandu itangazwa buri cyumweru yerekana ko mu cyumweru cyo ku wa 1-6 Ukwakira habonetse abantu 27 banduye ariko nta n’umwe wapfuye.

Mu cyumweru cyakurikiyeho handuye 32 ntihagira uhitanwa na Covid-19 mu gihe hagati y’itariki ya 14-20 Ugushyingo hiyongereyeho batandatu, ubwandu bugera kuri 0,4%.

Hagati y’itariki ya 21-27 handuye 81 bongera kugabanuka mu cyumweru cyakurikiyeho baba 49 ariko mu cyumweru gishize bongeye kwiyongera baba 80 ariko nta wapfuye.

Kuva ku mwaduko wa Covid-19 mu Rwanda, abapfuye bose ni 1467; abanduye ni 132 811. Abakize bose hamwe ni 131.060 bahwanye na 98,9%. Abamaze gupimwa bangana na 5.929.914.

Leta y’u Rwanda ikomeje ibikorwa byo kongera kubaka ubukungu bwazahajwe na Covid-19 aho n’ikigega nzahurabukungu cyongewemo miliyoni 250 z’amadolari.

Ni amafaranga yakusanyijwe bigizwemo uruhare n’ibigo birimo Ikigega Mpuzamahanga cy’Imari (IMF), Banki y’isi, Ikigega cy’Umuryango Mpuzamahanga w’Ibihugu bicuruza Peteroli (OFID), Banki ya Aziya y’ishoramari mu bikorwa remezo, USAID n’ibindi.

Ku ikubitiro cyashyizwemo miliyoni 100 z’amadolari hagamijwe gufasha mu kurenga ingaruka z’icyorezo cya Covid-19 ku bukungu bw’igihugu. Muri Gicurasi uyu mwaka ni bwo Guverinoma yatangije icyiciro cya kabiri cy’iki kigega ishyiramo miliyoni 250 z’inyongera.

Umwaka wa 2022 usize Abanyarwanda bakabakaba miliyoni 10 bahawe doze ebyiri za Covid-19