Abarwayi bashya basanganywe COVID-19 iterwa n’agakoko ka Coronavirus ku butaka bw’u Rwanda barimo abakuwe muri Rusizi iri no mu duce tukibonekamo ubwandu ndetse n’Abanyarwanda batashye bava hanze y’igihugu.

Itangazo rya Minisante rivuga ko abo barwayi ‘‘Bashyizwe mu kato, abo bahuye bakurikiranwe.’’

Umurwayi wa mbere wa Coronavirus yagaragaye mu Rwanda ku wa 13 Werurwe 2020, kuva icyo gihe hamaze kuboneka 494 [barimo 18 bashya] bayanduye mu bipimo 84 029 bimaze gufatwa, 313 [barimo batandatu bashya] barayikize mu gihe 179 bakirwaye naho babiri barimo umushoferi w’imyaka 65 n’umupolisikazi bitabye Imana.

Coronavirus yagaragaye bwa mbere mu Mujyi wa Wuhan mu Bushinwa mu Ukuboza 2019; kuri ubu 7 546 393 bamaze kuyandura ku Isi yose, barimo 421 668 yahitanye mu gihe 3 824 024 bamaze kuyikira.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

11.06.2020 – Covid-19 Coronavirus
Amakuru Mashya | Update | Mise à Jour

*Abarwayi bashya bagaragaye muri Rusizi & mu Banyarwanda batashye. Bashyizwe mu kato, abo bahuye bakurikiranwe

*New cases are Rusizi cluster & repatriated Rwandans. They have been isolated & contacts traced pic.twitter.com/y2GgAeo0QZ

— Ministry of Health | Rwanda (@RwandaHealth) June 11, 2020

Abantu 18 barimo abo mu Karere ka Rusizi n’Abanyarwanda bavuye hanze basanganywe Coronavirus, abayikize mu masaha 24 yashize ni batandatu