Abantu 42 barimo imfungwa 17 z’i Nyabihu banduye Coronavirus

Yanditswe na Ishimwe Israel
Kuya 10 Nyakanga 2020 saa 10:34
Yasuwe :
0 0

Minisiteri y’Ubuzima yatangaje ko abantu 42 barimo imfungwa 17 zo mu Karere ka Nyabihu basanganywe Coronavirus mu bipimo 3898 byafashwe kuri uyu munsi mu gihe 12 aribo bakize basezererwa mu bitaro.

Itangazo rya Minisante ryo kuri uyu wa 10 Nyakanga 2020, rigaragaza ko abarwayi bashya bakuwe ahantu hatandukanye mu gihugu.

Rivuga ko i Nyabihu hakuwe imfungwa 17, mu Mujyi wa Kigali havanwa abarwayi 16 barimo abatashye n’itsinda ryitabwaho by’umwihariko, i Rusizi habonetse batanu mu gihe muri Nyamagabe ari bane.

Ni ku nshuro ya kabiri mu Rwanda habonetse abarwayi ba Coronavirus barimo abafunzwe, baherukaga kugaragara mu Karere ka Ngoma. Tariki ya 29 Kamena 2020, Minisiteri y’Ubuzima yatangaje ko abantu 101 barimo itsinda ry’abantu 72 bari muri kasho muri Ngoma bahuye n’abanduriye i Rusumo basanganywe Coronavirus.

Kuri uyu wa Gatanu, abantu 42 basanzwemo Coronavirus mu bipimo 3898 byafashwe bituma umubare w’abamaze kwandura uba 1252 mu gihe 12 ari bo bayikize, abamaze gukira, bagasezererwa mu bitaro baba 635.

Kuva umurwayi wa mbere wa COVID-19 iterwa n’agakoko gashya ka Coronavirus agaragaye mu Rwanda ku wa 14 Werurwe 2020, hamaze gufatwa ibipimo 176 260; abantu batatu nibo bitabye Imana bazize iki cyorezo.

Kugeza ubu nta muti n’urukingo bya Coronavirus biraboneka, hakoreshwa uburyo bwo kuvura ibimenyetso by’iki cyorezo gusa, kugeza umubiri w’umuntu wubatse ubudahangarwa, virus igashira ityo mu maraso.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda, abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi mu nsisiro cyangwa ahatuye imiryango myinshi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .