00:00:00 IGIHE NETWORK KN KINYARWANDA EN ENGLISH FR FRANCAIS

Abantu 89 banduye COVID-19 mu Rwanda, babiri yabahitanye

Yanditswe na IGIHE
Kuya 3 Ukwakira 2021 saa 11:44
Yasuwe :
0 0

Abantu 89 basanganywe ubwandu bwa COVID-19 mu bipimo 13.289 byafashwe mu gihe babiri ari bo bahitanywe n’iki cyorezo, bituma umubare w’abo kimaze kwambura ubuzima ugera ku 1.283.

Itangazo rya Minisiteri y’Ubuzima ryo kuri uyu wa 3 Ukwakira 2021, rigaragaza ko abishwe na COVID-19 ari abagore babiri barimo uw’imyaka 79 wo mu Karere ka Nyamasheke n’ufite imyaka 65 w’i Gicumbi.

Kuri iki Cyumweru kandi abantu 89 ni bo banduye, umubare uri hasi ugereranyije no mu bihe byatambutse aho wasanga bari hejuru y’ijana. Ubwandu bushya buri ku ijanisha rya 0.7%.

Akarere ka Burera ni ko kabonetsemo abarwayi benshi [15], Gicumbi ni 13, Rubavu ni 12 mu gihe Rulindo na Gisagara buri hose habonetse umunani.

Nko mu Mujyi wa Kigali ho habonetse abanduye barindwi gusa.

Mu mpera z’iki cyumweru, muri Kigali by’umwihariko hafashwe ibipimo ahantu hatandukanye harimo mu tubari no mu nsengero.

Ikigo cy’Igihugu cy’Ubuzima (RBC) cyatangaje ko ku wa 2 Ukwakira 2021 abantu 672 barimo abakozi b’utubari n’abakiliya batugana bapimwe COVID-19 bose basangwa ari bazima ndetse kuri iki Cyumweru, mu bipimo 655 byafashwe mu nsengero enye zo mu Mujyi wa Kigali, byose byasanzwe ari bazima.

Kuri iki Cyumweru kandi nta barwayi bashya binjijwe mu bitaro mu gihe umwe gusa ari we wasezerewe nyuma yo gukira. Abarwayi icyenda ni bo barembye, bakaba bari guhabwa ubuvuzi bwihariye.

Igabanuka ry’abarwayi ahanini rinagendana n’imbaraga zashyizwe mu gukingira umubare w’abantu benshi uko inkingo zigenda ziboneka.

Kuva ibikorwa byo gutanga inkingo za COVID-19 byatangira ku wa 5 Werurwe 2021, abaturarwanda 1.680.361 bamaze gukingirwa mu buryo bwuzuye [ubariyemo 887 bahawe dose ya kabiri uyu munsi] mu gihe 2.131.766 bamaze guhabwa dose imwe barimo 2.050 bahawe dose ya mbere uyu munsi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .