00:00:00 IGIHE NETWORK KN KINYARWANDA EN ENGLISH FR FRANCAIS

Abaturarwanda 41.608 bahawe dose ya mbere y’urukingo rwa COVID-19

Yanditswe na IGIHE
Kuya 3 Nzeri 2021 saa 11:53
Yasuwe :
0 0

Minisiteri y’Ubuzima mu Rwanda yatangaje ko kuri uyu wa Gatanu, abantu 41.608 bahawe dose ya mbere y’urukingo rwa COVID-19 bituma umubare w’abamaze kuyibona ugera kuri 1.634.013.

Itangazo rya Minisante ryo kuri uyu wa 3 Nzeri 2021, rivuga ko muri rusange abamaze guhabwa inkingo ebyiri, bakingiwe byuzuye ari 869.915. Abahawe dose ya kabiri uyu munsi ni 87.081.

Kuri uyu munsi kandi abanduye Covid-19 bashya ni 490 mu bipimo 12.737. Mu masaha 24 yashize abantu barindwi barimo abagore babiri n’abagabo batanu ni bo bishwe na Covid-19 mu gihe abarembye ari 25.

U Rwanda rukomeje gushyira imbaraga mu bikorwa byo gukingira abaturage barwo. Kuri uyu wa 3 Nzeri 2021, rwakiriye dose 200.000 z’inkingo za Covid-19 zo mu bwoko bwa AstraZeneca rwahawe n’u Bugereki biturutse ku mubano mwiza ibihugu byombi bifitanye mu bya gisirikare.

Zakiriwe hashize amasaha make u Rwanda rwakiriye dose 108.000 za Johnson & Johnson rwaguze binyuze muri gahunda ya AVAT yo kugura no gukwiza inkingo mu bihugu bya Afurika.

Umunyamabanga wa Leta muri Minisiteri y’Ubuzima, Dr Mpunga Tharcisse, yavuze ko abagera kuri 50% muri Kigali bamaze gukingirwa byuzuye, naho 80% bahawe dose imwe.

Yakomeje ati “Mu ntara turacyari kuri 20%, biradufasha rero kuzamura umubare w’abakingirwa no gukomeza guhangana na COVID-19 muri rusange.”

Kugeza ubu u Rwanda rukingira COVID-19 rwifashishije AstraZeneca, Johnson & Johnson, Pfizer ndetse na Sinopharm.

U Rwanda rukomeje gushyira imbaraga nyinshi mu bikorwa byo gukingira COVID-19 ku buryo nibura uyu mwaka uzarangira hakingiwe 30% by’Abaturarwanda. Ni mu gihe umwaka utaha byitezwe ko hazaba hakingiwe nibura 60%.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .