Batandatu banduye Coronavirus mu Rwanda, babiri barayikira

Yanditswe na Ishimwe Israel
Kuya 29 Gicurasi 2020 saa 08:13
Yasuwe :
0 0

Abantu batandatu basanganywe Coronavirus mu bipimo 1340 byafashwe mu masaha 24 yashize, bituma umubare w’abayanduye mu Rwanda ugera kuri 355 mu gihe babiri basezerewe mu bitaro.

  • Abanduye ni 355 (Barimo batandatu bashya)
  • Abakize ni 247 (Barimo babiri bashya)
  • Abakirwaye ni 108
  • Nta muntu uritaba Imana
  • Ibipimo bimaze gufatwa ni 65 608 (Birimo 1340 bishya)

Itangazo rya Minisiteri y’Ubuzima ryo kuri uyu wa Gatanu, tariki ya 29 Gicurasi 2020, ryerekanye ko umubare w’abagaragayeho Coronavirus mu Rwanda umaze kugera kuri 355 ’ubariyemo batandatu bashya’ kuva umurwayi wa mbere abonetse mu gihugu ku wa 14 Werurwe 2020.

Rikomeza rivuga ko “Abarwayi bashya bose bahise bashyirwa mu kato bakihagera.’’

Abantu bari gusanganwa ubwandu bushya muri iyi minsi biganjemo abakurwa mu bashoferi b’amakamyo yambukiranya imipaka n’abo bakorana.

Icyizere cyo guhashya Coronavirus kiriyongera cyane ko kuva mu minsi isaga 11 ishize, nta murwayi n’umwe urakurwa hagati y’abaturage.

Mu bantu 65 608 bose bamaze gupimwa Coronavirus mu Rwanda, 355 barayanduye mu gihe 247 basezerewe mu bitaro nyuma yo gukira. Abakirwaye ni 108, muri bo nta we uraremba. U Rwanda ruri mu bihugu bitarabonekamo umuntu witabye Imana azize Coronavirus.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

Coronavirus yagaragaye bwa mbere mu Mujyi wa Wuhan mu Bushinwa mu Ukuboza 2019; kuri ubu 5 974 553 bamaze kuyandura ku Isi yose, barimo 364 430 yahitanye na 2 631 165 bamaze kuyikira.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .