OMS itangaza ko kuri uyu wa Gatatu abantu 5 270 aribo bapfuye, abandi 86 991 baranduye.

Kuri uyu wa Gatatu, Leta Zunze Ubumwe za Amerika zapfushije abantu 1 772 n’aho abandi 21 712 bafatwa n’iki cyorezo.

Iki gihugu kandi nicyo gikomeje kuza imbere mu kugira umubare w’abanduye n’abamaze gupfa ku Isi, abanduye ni 1 430 348 abamaze gupfa ni 85 197.

Dr Anthony Fauci, Umuyobozi w'ikigo cy'Abanyamerika cyita ku ndwara zandura, yavuze ko igihugu kitagomba gukora amakosa yo kurekura abaturage ngo bakomeze imirimo, kuko iki cyorezo gishobora guhitana abaturage benshi.

Aya magambo yahise yamaganwa na Perezida Donald Trump, wavuze ko ibivugwa na Dr Fauci nta shingiro bifite, ko ahubwo ashaka gushimisha impande zitandukanye mu gihugu.

Yavuze ko ibivugwa n’iyi nzobere mu by’ubuzima nta gaciro bigomba guhabwa, ko leta zigomba kurekura abaturage bagakomeza ibikorwa.

Kugeza ubu Espagne iraza ku mwanya wa kabiri mu banduye kuko ari abantu 269 271 095, hamaze gupfa 27 104, u Burusiya buraza ku mwanya wa Gatatu kuko bufite abanduye 242 271 hamaze gupfa 2 212, mu Bwongereza handuye 229 705, hamaze gupfa 33 186, mu Butaliyani handuye 222 104, hamaze gupfa 31 106.

Ku mugabane wa Afurika wose hamaze kugaragara abantu 73 974 banduye Coronavirus, abamaze gupfa basaga 2 507 naho abakize ni 26 250.

Afurika y’Epfo iri imbere mu kugira abafite ubwandu bwinshi kuko ari 12 074, abamaze gupfa ni 219, ikurikirwa na Misiri ubu ifite abamaze gupfa benshi kuri uyu mugabane, kuko bageze kuri 556 naho abamaze kwandura ni 10 431.

Muri Afurika y’Iburasirazuba, kugeza ubu igihugu kiza imbere mu bwandu bwinshi ni Kenya kuko hamaze kwandura 737 hapfuye 40, Tanzania iza ku mwanya wa kabiri, kuko handuye 509 hapfuye 21, u Rwanda rufite abanduye 287 abamaze gukira ni 164, muri Uganda ho hamaze kwandura 139, mu Burundi handuye abantu 15 hapfa umwe naho muri Sudani y’Epfo hamaze kwandura abantu 203.