Coronavirus mu gitondo cyo ku wa 3 Mata: Abanduye barenze miliyoni, imfu ziyongereye muri Amerika na Espagne

Yanditswe na IGIHE
Kuya 3 Mata 2020 saa 08:46
Yasuwe :
0 0

Ubu ku Isi harabarurwa abantu 1016401 bamaze kwandura icyorezo cya Coronavirus biganjemo abo muri Leta Zunze Ubumwe za Amerika bagera 245559 mu gihe abamaze gupfa muri rusange ari 53160.

Imibare y’ubwiyongere bw’abandura igaragaza ko mu gihe cy’amasaha atageze kuri 24, abantu barenga ibihumbi 78 banduye bigaragaza uburyo iki cyorezo kiri gufata indi ntera. Ni nako bimeze ku mibare y’abahitanwa nacyo kuko mu minsi ibiri bamaze kwiyongeraho ibihumbi birenga bitandatu.

Ku munsi w’ejo muri Leta Zunze Ubumwe za Amerika ahari ubwandu bwinshi ku Isi bwari 216 721, imibare mishya yo muri iki gitondo igaragaza ko bwiyongereye bukagera ku 245559.

Abapfa nabo bakomeje kwiyongera aho bikomeje ku ntera ibintu biriho, Amerika ishobora guca ku Butaliyani mu kugira abantu benshi bahitanwa n’iki cyorezo.

Mu gitondo cyo ku wa Kane bari 5138, gusa ubu bageze ku 6057 bigaragaza ko abagera kuri 919 bapfuye ku munsi umwe.

Mu Butaliyani naho umubare w’abanduye ukomeje kwiyongera kuko mu gitondo cyo ku wa Kane bari 110574, ubu muri iki cyo ku wa Gatanu bamaze kugera ku 115242 bigaragaza ko abantu barenga 4600 banduye iki cyorezo.

Abapfuye bo bari 13155 ubu bageze ku 13915 bigaragaza ubwiyongere bw’abantu 760.

Muri Espagne nk’igihugu cya gatatu cyibasiwe cyane n’iki cyorezo, abanduye bari 104118 , ubu ni 112065 mu gihe abapfuye bo bari 9387 ubu bakaba bageze ku 10348 bigaragaza ko 961 bapfuye mu gihe kitageze ku masaha 24.

Muri Afurika, Afurika y’Epfo iracyafite umubare mwinshi w’ubwandu aho bamaze kuba 1462 mu gihe ku wa Kane mu gitondo bari 1380; abapfuye bo baracyari batanu.

Ni mu gihe umubare w’abapfa wakomeje gutumbagira muri Algeria aho bavuye kuri 58 bakagera kuri 86 naho ubwandu bwo bugera kuri 986 buvuye kuri 847.

Muri Afurika y’uburasirazuba, Kenya imaze kugira abantu 110 banduye bavuye kuri 81 bariho kuri uyu wa Kane mu gitondo ndetse ubu abamaze gupfa bavuye kuri umwe baba batatu.

U Rwanda rumaze kugira abantu 84 biyongereyeho babiri ugereranyije n’uko byari bimeze mu gitondo cyo ku wa Kane. Muri Uganda ho hiyongereyeho umuntu umwe baba 45, Tanzania ho abamaze kwandura ni 20 mu gihe umwe ariwe umaze gupfa.

Mu Burundi naho abantu banduye bamaze kuba batatu mu gihe bari babiri mu gitondo cyo ku wa Mbere.

Ku Isi, mu basaga miliyoni banduye, 211775 nibo bamaze gukira.

Ushobora kubona amakuru yose ajyanye na Coronavirus kuri IGIHE unyuze hano

Imibare y'abapfa muri Leta Zunze Ubumwe za Amerika ikomeje kwiyongera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .