Hari gutegurwa uko abajyanama b’ubuzima bakwinjizwa mu rugamba rwo guhashya COVID-19

Yanditswe na Twarabanye Venuste
Kuya 24 Nyakanga 2020 saa 08:34
Yasuwe :
0 0

Ikigo cy’Igihugu cy’Ubuzima, RBC, cyatangaje ko hari gutegurwa uburyo abajyanama b’ubuzima bakwinjizwa mu rugamba rwo kurwanya COVID -19 nyuma yo kubona ko icyorezo kizamara igihe kirekire kandi abajyanama b’ubuzima bakaba baragaragaje uruhare rukomeye mu gufasha urwego rw’ubuzima harimo guhangana na Malariya.

Umuyobozi wa RBC, Dr Nsanzimana Sabin, yabigarutseho ubwo yakiraga inkunga y’udupfukamunwa n’amazuru 71 477 twatanzwe n’Ikigega cy’Umuryango w’Abibumbye cyita ku Baturage (UNFPA).

Yavuze ko nyuma yo kubona ko icyorezo cya COVID-19 kizamara igihe kirekire hari gahunda irambye yo kureba uburyo cyavurirwa ku nzego zitandukanye harimo n’urw’abajyanama b’ubuzima.

Muri iyi gahunda yavuze ko basanze abajyanama b’ubuzima bashobora kuzajya bita ku bantu batarwaye bikabije cyangwa badafite ikimenyetso na kimwe, kandi ko bafite icyizere ko bizatanga umusaruro nk’uko babikora ku zindi ndwara n’izindi serivisi z’ubuzima.

Ati “Abantu dutekereza cyane yuko ibi bikoresho bizabafasha harimo kugera no ku rwego rw’abajyanama b’ubuzima. Kuko icyorezo tubona ko kizatinda tugomba kubana nacyo igihe kirekire. Turategura uburyo cyajya kivurirwa no ku zindi nzego bitari ngombwa ko abantu bose bavurirwa ahantu hamwe, ndetse n’abatarwaye cyane badafite n’ikimenyetso na kimwe bakaba babasha kuvurirwa no ku rwego rw’umudugudu.’’

“Abajyanama b’ubuzima basanzwe babikora ku ndwara zisumbuyeho. Turi kubitegura bimwe rero muri ibi bikoresho nicyo bizakora. Abantu barwaye koko akaba aribyo bazajya bashyirwa ahantu havurirwa ariko abatarembye n’ubundi ubona icyo tumukeneyeho ari uko yaguma aho ari nta bandi bantu akwirakwije ubwo burwayi iyo niyo nzira turi kwerekezamo mu buryo bwihuse mu minsi iri imbere.”

Dr Nzansimana yabwiye IGIHE ko abajyanama b’ubuzima bazagira uruhare mu kwita ku bamaze gusuzumwa na RBC ndetse nabo bakagira uruhare mu gusuzuma ariko ko byose bikiri gutegurwa neza uburyo bizakorwa, bamaze guhabwa ibikoresho n’amahugurwa ahagije.

Ati “Abajyanama b’ubuzima uyu munsi tuvugana barapima indwara nka Malariya, bagapima umuriro bagatanga ibinini ndetse hari n’aho batera urushinge rero COVID-19 yo abanahura nayo nta nubwo bakeneye ibyo byose. Aba ari ukugira gusa ngo yumve ko ari bugume mu rugo nagira ikimenyetso akeneye kujya kuvurwa abe yajyanwa, ibyo nibyo turi gutegura bazakora ariko igihe cyo kubitangira tuzabamenyesha tumaze kubahugura twabahaye n’ibikoresho bibarinda n’amahugurwa.”

Kugeza ubu hari abajyanama b’ubuzima basaga ibihumbi 60 mu gihugu hose bavura abarwayi ba Malariya ku kigero cya 70% kuko abajya kuyivuza kwa muganga bari hagati ya 30 na 40%.

Mu Rwanda, abamaze kwandura Coronavirus ni abantu 1710, abagera kuri 889 barayikize naho batanu yarabahitanye kuva ku wa 14 Werurwe 2020 icyo cyorezo kigaragaye mu Rwanda.

Kugeza ubu nta muti nta n’urukingo. Kwirinda ni ugukaraba intoki kenshi hakoreshejwe amazi meza n’isabune ndetse umuntu akambara agapfukamunwa n’amazuru igihe agiye ahahurira abantu benshi.

Abajyanama b'ubuzima mu minsi iri imbere bashobora gutangira gutanga umusanzu wabo mu guhangana na Coronavirus
Umuyobozi w’Ikigo cy’Igihugu cy’Ubuzima, RBC, Dr Nsanzimana Sabin, yatangaje ko hari gutegurwa uburyo abajyanama b’ubuzima bakwinjizwa mu rugamba rwo kurwanya COVID -19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .