Igisobanuro cy’ubwiyongere bw’imibare y’abarwayi ba Coronavirus mu Rwanda

Yanditswe na Cyprien Niyomwungeri
Kuya 2 Mata 2020 saa 10:27
Yasuwe :
0 0

Mu gitondo cyo kuwa 14 Werurwe 2020, nibwo Minisiteri y’Ubuzima, yatangaje ko hari Umuhinde wageze mu Rwanda ku wa 8 Werurwe 2020 avuye i Mumbai, agatahurwaho Coronavirus, akaba ari we wa mbere wari usanzwemo iki cyorezo.

Icyo gihe hari hashize iminsi 74 u Bushinwa bumenyesheje Ishami ry’Umuryango w’Abibumbye ryita ku buzima (OMS) ko hari icyorezo cyateye mu baturage, mu mujyi wa Wuhan, ari cyo Coronavirus.

Umuntu wa mbere wanduye akimara kugaragara mu Rwanda, ingamba n’imbaraga zarongerewe mu gushaka buri wese waba yarahuye na we kugira ngo bapimwe ndetse babe bashyizwe mu kato nk’uko biteganyijwe.

Ni igikorwa kigirwamo uruhare n’itsinda ry’abantu bagera kuri 220 bakurikirana umuntu wese wahuye n’uwanduye, kandi rigizwe n’abantu bo mu nzego zinyuranye baba mu nzego z’ubuzima n’abamenyereye guperereza nko mu nzego Polisi n’Ingabo.

Kugeza ubu izi nzego zirimo gukurikiranira hafi abantu basaga 1,200 bagize aho bahurira na bamwe mu barwayi ba Coronavirus bamaze kuboneka mu Rwanda.

Izi ngamba n’izindi nyinshi cyane zatumye hatahurwa abanduye Coronavirus, aho kugeza ubu abagera kuri 82 bamaze gusanganwa iki cyorezo mu Rwanda ndetse iyi mibare ikaba ishobora gukomeza kwiyongera.

Imibare yerekana ko kuva kuwa 14-21 Werurwe 2020, hari hamaze kwandura abantu 17. Mu cyumweru cyakurikiyeho imibare yarazamutse kuko byageze kuwa 28 Werurwe, bageze kuri 60 harimo umunsi wa tariki 24 Werurwe, wabonetseho abarwayi bashya 17.

Mu minsi ine ishize abarwayi ba Coronavirus mu Rwanda biyongereyeho 22, bava kuri 60 bariho kuwa Gatandatu w’icyumweru gishize bagera kuri 82 kuri uyu wa 1 Mata 2020.

Ubwiyongere bw’imibare y’abanduye Coronavirus mu Rwanda, hari ababigaragaza nk’impungenge z’uko iki cyorezo cyaba kirimo kwiyongera. Minisiteri y’Ubuzima isobanura ko nta gitangaza kirimo kuko biterwa n’umubare w’abantu bapimwe n’uw’abanduye muri bo.

Minisitiri w’Ubuzima, Dr Ngamije Daniel, avuga ko mbere na mbere gutangaza imibare y’abanduye ari inshingano yo kugaragariza abanyarwanda aho ikibazo gikomeye kigeze kugira ngo bamenye ko ari ikibazo bagomba guha agaciro kandi ari ibihe bidasanzwe.

Ati “Icya kabiri ni uko dukurikirana abantu bahuye na bariya banduye umunsi ku wundi, duhura nabo tukabasuzuma bityo rero hari umunsi tugira abarwayi bake dutangaza hari umunsi mushobora kumva dutangaje benshi, nta gitangaza kirimo biterwa n’umubare w’abantu twahuye na bo, umubare w’abo twapimye n’umubare w’abanduye muri abo twapimye”.

“Nta gitangaza ko muzajya mwumva rimwe ari babiri, undi munsi batatu, bashobora no kurenga batatu cyangwa bane, ibyo mu gihe turi muri iki gihe cyo kumenya neza uko ikibazo giteye nta cyatangaza ko imibare yajya ihindagurika kugeza igihe tuzagera ku gipimo aho icyorezo tumaze kukimenya neza tuzi ngo abanduye baranduye kandi turi kubabuza kwanduza abandi”.

Minisitiri Dr Ngamije, avuga ko ingamba zafashwe nka Guma mu rugo, gufunga imipaka, guhagarika ingendo z’indege, gufunga amashuri n’insengero, guhagarika ubucuruzi butari ubw’ibiribwa n’izindi zizatuma hari igihe imibare izagabanuka.

Ati “Turi gufata ingamba zo kugira ngo tutanduza utarandura, ibi bizatuma rero imibare itangira kugabanuka, ni ukuvuga ngo igihe kizagera mubone tutacyongera kuvuga abantu umunani, icyenda se...kugeza igihe buri munsi tutagira abarwayi bashya tugomba gutangariza igihugu”.

Umuyobozi Mukuru w’Ikigo cy’Igihugu cy’Ubuzima (RBC), Dr Nsanzimana Sabin, avuga ko gukomeza gutahura abanduye iki cyorezo ari intambwe iganisha ku kugitsinda burundu, bityo ntawe ukwiye gutera impungenge n’imibare itangazwa.

Avuga ko kubona imibare y’abapimwe izamuka ntawe bikwiye gukura umutima, ahubwo icyagateye ubwoba ari ukuba ntawabonetse kandi harabayeho guhura k’uwanduye n’abandi bantu.

Ati “Twebwe rero iyo tumubonye biradushimisha ahubwo ko iyo virusi ivuye mu baturage yari gukwirakwira. Iyo imibare ibonetse ari myinshi mu gihe gito, ni ukuvuga ngo ikibazo twakivanye aho cyari kiri hanyuma ejo, ejobundi ubuzima bugakomeza nta Coronavirus ihari”.

Dr Nsanzimana asobanura ko kuboneka kw’imibare myinshi y’abanduye Coronavirus ari ikimenyetso cy’uko urwego rw’ubuzima n’abandi bafatanya mu kurwanya iki cyorezo barimo gukora neza.

Izamuka ry’imibare y’abanduye Coronavirus riherutse kugarukwaho na Perezida Kagame, mu ijambo yagejeje ku banyarwanda n’abaturarwanda muri iki gihe kidasanzwe.

Umukuru w’Igihugu yavuze ko ‘uyu mubare uzakomeza uzamuke kuko hakomeje gushakishwa abahuye n’abarwayi b’iyo ndwara kugira ngo bapimwe ndetse abagaragayeho uburwayi bavurwe’.

Muri Afurika y’Uburasirazuba, u Rwanda nirwo rufite umubare munini w’abanduye kuko ari 82, Kenya na 81, Uganda na 44, Tanzania na 20 mu gihe u Burundi bufite abantu babiri.

Umubare w’abamaze kwandura icyorezo cya Coronavirus ku Isi umaze kugera ku 937 567.

Abarwayi ba Coronavirus mu Rwanda bageze kuri 82 mu minsi 19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .