Umuyobozi w’Ikigo cya Afurika gishinzwe gukurikirana no gukumira ibyorezo (CDC), John Nkengasong, yavuze ko ubwo icyorezo cyari kigitangira, imibare y’abahitanwa nacyo muri Afurika yari iri hasi cyane ugereranyije n’abo ku Isi muri rusange, none ubu ngo imibare ikomeje kuzamuka mu buryo buteye inkeke.

Ati “Imibare y’abahitanwa n’icyorezo itangiye kuzamuka cyane mu buryo buduhangayikishije twese. Ibihugu biri kugira ijanisha ry’abahitanwa nacyo riri hejuru y’abo gihitana muri rusange ku Isi yose, biri kwiyongera.”

Hari ibihugu bigera kuri 21 byo muri Afurika bifite umubare w’abahitanwa n’icyorezo bagera kuri 3%, harimo Misiri, Repubulika Iharanira Demokarasi ya Congo, Sudani n’ibindi.

Mu Cyumweru gishize, umubare w’abandura wagabanutseho 7% ugereranyije n’icyumweru cyabanje mu gihe umubare w’abo gihitana wazamutseho 10%.

Imibare ya CDC igaragaza ko abanduye mu cyumweru gishize bari 207.000, Afurika y’Epfo yonyine ifitemo abagera ku 100.000.

Inzego z’Ubuzima zitangaza ko kuva icyorezo cya COVID-19 cyagera muri Afurika, kugeza kuri uyu wa kane hamaze kwandura abantu miliyoni 3,3, mu gihe kimaze guhitana abarenga 81.000.