Imbamutima z’imiryango yahawe inkunga y’ibiribwa mu bihe bya Coronavirus

Yanditswe na Twarabanye Venuste
Kuya 6 Mata 2020 saa 09:19
Yasuwe :
0 0

Imiryango yagizweho ingaruka n’amabwiriza yo kwirinda ikwirakwira rya Coronavirus iri guhabwa ibiribwa, yashimye Leta yayitekerejeho, ishimangira ko inkunga yahawe ituma iminsi yicuma.

Hashize icyumweru Leta itangiye gutanga inkunga y’ingoboka ku miryango itishoboye yagizweho ingaruka n’amabwiriza arimo iryo kuguma mu rugo mu kwirinda ikwirakwira rya Coronavirus. Ni igikorwa cyatangiye nyuma y’ijambo rya Perezida Kagame ryo ku wa 27 Werurwe 2020 rihumuriza Abanyarwanda.

Umukuru w’Igihugu yasabye Abanyarwanda kubahiriza amabwiriza yo kwirinda ikwirakwira rya Coronavirus, anizeza ko leta izakora ibishoboka byose mu gusigasira imibereho myiza y’abaturage by’umwihariko abatishoboye.

Abari guhabwa inkunga mu Mujyi wa Kigali baganiriye na IGIHE barimo abamaze kwakira ibiribwa inshuro zirenze imwe bagaragaje ko biri kubafasha mu mibereho yo kwirinda itoroshye.

Kabujyojyo Yusuf utuye mu Mudugurdu wa Umunyinya mu Murenge wa Kicukiro mu Karere ka Kicukiro yari asanzwe ari umukanishi. Yashimye icyemezo cya leta cyo kubunganira ibashyira ibiribwa mu ngo zabo.

Ati “Icyemezo cya leta ni cyiza kubera ko yita ku baturage bayo kuko iyo umuntu atagenda ngo ajye gushakisha ubuzima buba bukomeye, kuri ubu tukaba dushimira leta yita ku baturage bayo ikabaha amafunguro ikabitaho kuko nta kuntu itagira, reba nk’ubu baba babituzaniye no mu rugo.”

Uwizeye Sarah wakoraga mu Kabari yavuze ko iyo nkunga iri gufasha benshi nkawe bafite ishoramari ryafunze.

Ati “Leta yakoze ikintu cyiza kuko yatekereje ku baturage bayo kuko hari abo bifasha. Uwaburaye ejo ntabwo uyu munsi yaburara.”

Mukakabano Marie Console utuye mu Mudugudu w’Indatwa mu Kagari ka Nyabugogo mu Murenge wa Muhima yavuze ko iyo nkunga yaziye igihe kuko icyumweru cya mbere cyo kuguma mu rugo cyasize bameze nabi.

Ati “Mu minsi ishize nka nyuma y’icyumweru twari tumeze nabi cyane imfashanyo baduhaye twarayibonye. Numvise nishimye cyane kuko badutekerejeho kandi baracyadutekerezaho. Nkatwe twagize icyo tubona twarishimye cyane kuko nta kintu twari dufite.”

Umunyamabanga Nshigwabikorwa w’Umurenge wa Kicukiro, Murebwayire Alphonsine, yavuze ko bamaze gutanga iyo mfashanyo mu byiciro bitatu, birimo icya mbere cyari kigizwe n’ingo 30, icya kabiri cy’ingo 684 mu gihe kuri uyu wa 6 Mata 2020 imiryango yose yahawe ibiribwa birimo umuceri, ibishyimbo n’akawunga.

Ati “Ni ibiribwa bishobora gufata iminsi itatu, tukongera tukagaruka.”

-  Abaturage banenze abagaye inkunga

Mu minsi ishize hagaragaye abanenga ko inkunga y’ingoboka bahabwa ari nkeya. Hari ababwiye IGIHE ko basanga abantu bakwiye kuzirikana ko igihugu gisaranganya abaturage ibyo gifite kandi bakizera leta kuko yavuze ko abatishoboye bazafashwa bityo ko ntawe uzicwa n’inzara.

Minani Frodouard utuye mu Mudugudu w’Iriba mu Kagari ka Kagina mu Murenge wa Kicukiro, yashimye inkunga bahawe ariko anenga abayigaye.

Yagize ati “Ni abantu nakwita indashima kuko Abanyarwanda niba turi abantu benshi babashije kugerwaho n’icyo kibazo tugomba kubisaranganya uko bingana ntabwo rero hari hakwiye kugaya ahubwo twese twari dukwiriye gushima icyo tubonye cyose.”

Bagira Sam utuye mu Mudugudu w’Indatwa mu Kagari ka Nyabugogo, wari utunzwe n’ibiraka byo gusiga amarangi, na we amaze kwakira inkunga inshuro zirenze imwe.

Yavuze ko abanenga inkunga bahabwa hari icyo bagomba gutekereza kijyanye no gushyira mu bikorwa ingamba zo kwirinda kugira ngo icyorezo gicike vuba basubire mu mirimo.

Ati “Mbese niba ushaka umufuka w’umuceri undi azabona iki? Dusaranganye kandi ntabwo ari bike [...] bihangane bagume mu rugo nidukira iki cyorezo bazongera bakore bigezeho ibyo byose twifuza.”

Hashize icyumweru Leta itangije gahunda yo guha ibikenerwa by’ibanze birimo ibiribwa n’ibindi bikoresho, abaturage basabwe kuguma mu rugo mu gukumira Coronavirus ariko bikabagiraho ingaruka kuko baryaga bakoze ku munsi.

Umuntu umwe mu bagize umuryango ari kubarirwa ibiro bitatu by’umuceri, bitatu by’ibishyimbo na bitanu by’akawunga. Igihe cyo kuguma mu rugo kizageza ku wa 19 Mata 2020. Abanyarwanda basabwa gukomeza kuguma mu ngo no gukaraba intoki kenshi nka zimwe mu ngamba zikomeye zo gutsinda Coronavirus.

Mu Murenge wa Kicukiro hatanzwe ibiribwa ku miryango itishoboye n'iyagizweho ingaruka n'ingamba zo guhangana na COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .