Impamvu Coronavirus ishobora kwica abagabo benshi kurusha abagore

Yanditswe na Twarabanye Venuste
Kuya 25 Werurwe 2020 saa 04:04
Yasuwe :
0 0

Abashakashatsi bavuze ko kunywa itabi, inzoga n’ubuzima bubi muri rusange, ari bimwe mu bishobora gusobanura impamvu abagabo aribo basa n’abazicwa na coronavirus kurusha abagore.

Mu bihugu nk’u Butaliyani, abagabo bagera kuri 60% mu basanzwemo coronavirus ndetse abarenga 70% by’abo yahitanye ni abagabo, nkuko imibare y’ikigo cy’ubuzima muri icyo gihugu (ISS) ibyerekana.

Muri Koreya y’Epfo, imibare yerekana ko abagore aribo benshi banduye coronavirus, ariko abagera kuri 54% mu bo yahitanye ni abagabo.

Dr. Deborah Birx, ushinzwe ibikorwa byo kurwanya coronavirus muri Leta Zunze Ubumwe za Amerika, yavugiye mu Kiganiro n’itangazamakuru cyabereye muri White House ku wa Gatanu ko bagendeye ku Butaliyani basanga imibare y’abagabo bapfa iruta iy’abagore.

Ati “Dufatiye mu Butaliyani turabona ikindi kibazo, umubare w’abagabo bapfa usa n’aho ukubye kabiri uw’abagore mu byiciro bitandukanye by’imyaka barimo.”

Hagendewe kuri iyo mibare yo mu Butaliyani, Brix yabwiye CNN ko ‘Kubimenya bibafasha kumenya ibyo babwira abaturage ba Amerika, ku bo bagomba kurinda n’uburyo bagomba kubarinda’.

CNN yatangaje ko yasabye Ikigo cya Amerika gishinzwe kurwanya no kwirinda indwara (CDC) imibare yayo yerekena abanduye hagendewe ku bagore n’abagabo cyirinda kuyigaragaza.

Iyo mibare ngo yafasha ibihugu byinshi mu gutanga amakuru aruseho mu kurwanya icyo cyorezo, ariko abashakashatsi bavuze ko iyo igihugu nka Amerika kitayitanze bibagora kumenya ibiri kuba.

Imibare y’Umuryango mpuzamahanga ugenzura ubusumbane bw’abagore n’abagabo mu rwego rw’ubuzima Global Health 50/50 yo mu bihugu 20, yerekana ko abagabo bagera kuri 50% mu bandura, bapfa kurusha abagore.

Umuyobozi muri Global Health 50/50 akaba n’umwalimu muri kaminuza y’i Londres, Sarah Hawkes yavuze ko abagabo bapfa baba bari hagati ya 10% na 90% kurusha abagore.

Uburyo abagabo n’abagore bitwara mu buzima bwabo ngo nibyo bitanga itandukaniro ku bijyanye no gufatwa n’indwara z’ubuhumekero. Ubushakashatsi bwa OMS bwo mu 2015 bwerekana bishobora guterwa n’uburyo kunywa inzoga n’itabi bitandukanye hagati y’abagore n’abagabo.

Imibare yabwo yerekana abagabo banywa itabi bakubye ishuro eshanu abagore. Abagabo bari hejuru y’imyaka 15 banywa itabi ni 36% mu gihe abagore bo muri icyo kigero bari 7%. Abagabo kandi ngo banywa inzoga bikubye inshuro eshanu abagore. Ku mwaka umugabo anywa litiro 11 mu gihe umugore anywa ebyiri gusa.

U Bushinwa nibwo bufite abaturage benshi banywa itabi barimo miliyoni 316 z’abantu bakuze. Abagabo barenga 50% muri icyo gihugu bararinywa mu gihe abagore bari munsi ya 3%.

Mu Butaliyani abagabo bagera kuri miliyoni zirindwi banywa itabi naho abagore ni miliyoni 4.5 nk’uko imibare y’Ikigo cy’Ubuzima muri icyo gihugu (ISS) yo mu 2020 ibigaragaza. Iki gihugu cyatangaje ko kimwe cya gatatu cy’abanduye barembye cyane, banywa itabi.

Ibi ni byo byatumye iki gihugu cyikorera ibyuma bitanga umwuka ku barwayi kwa muganga (ventilation) bikibana bike kuko abo banywa itabi babikenera inshuro ebyiri z’abatarinywa.

Amateka yerekana ko n’izindi coronavirus zibaho zirimo SARS na MERS, zibasira abagabo cyane kurusha abagore. Abashakashatsi bavuze ko ibyo byose bitiza umurindi kunegekara n’impfu z’abanduye Coronavirus.

Abamaze kwicwa na Coronavirus bamaze kurenga ibihumbi 19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza