Iyi nama yabereye muri Village Urugwiro yitabiriwe na Minisitiri mushya w’Umutekano, Alfred Gasana, umaze umunsi umwe arahiriye inshingano.

Iyaherukaga guterana ku wa 28 Ugushyingo 2021 yafatiwemo ibyemezo birimo guhagarika ingendo z’indege zerekeza mu bihugu by’Amajyepfo ya Afurika, abinjira mu gihugu bashyirirwaho akato k’amasaha 24, naho abavuye mu bihugu byagaragayemo Omicron bashyirirwaho akato k’iminsi irindwi.

Kuva iyo tariki habonetse abanduye 388, hapfa babiri naho 258 bakira iki cyorezo.

Nyuma y’iyo nama kandi ni nabwo Omicron yarushijeho kugaragara henshi ndetse aba mbere bishwe nayo mu bihugu bitandukanye.

Umurego iri gukwirakwiraho uri mu bihangayikishije Isi, kuko imaze kugaragara mu bihugu birenga 70. Yatangiye kugaragara no mu bihugu by’abaturanyi birimo Tanzania na Uganda.

Inzego z’ubuzima ntiziratangaza ko hari umurwayi wasanganywe Omicron ku butaka bw’u Rwanda.

Perezida Kagame yayoboye Inama y’Abaminisitiri yitezweho ingamba nshya za COVID-19

Iyi nama yateranye hubahirizwa amabwiriza yo kwirinda COVID-19 arimo kwambara agapfukamunwa no guhana intera

Bwa mbere, Minisitiri mushya w’Umutekano, Gasana Alfred (ibumoso) yitabiriye Inama y'Abaminisitiri. Yaganiriye n'Umunyamabanga wa Leta muri Minisiteri y'Ubuhinzi n'Ubworozi, Dr. Ngabitsinze Jean Chrysostome (uwa kabiri ibumoso); Minisitiri w’Ibikorwaremezo, Amb. Gatete Claver na Minisitiri ushinzwe Ibikorwa by’Ubutabazi, Kayisire Marie Solange