Iyi nama yateraniye muri Village Urugwiro ku Kacyiru yasuzumiwemo iyubahirizwa ku ngamba zafashwe mu iheruka ku wa 16 Kamena 2020.

Abaminisitiri bayitabiriye bicaye mu buryo bwubahirije amabwiriza yo kwirinda icyorezo cya COVID-19 giterwa n’agakoko ka Coronavirus burimo kwambara agapfukamunwa no guhana intera ya metero hagati yabo.

Ibiro bya Perezida wa Repubulika byatangaje bibinyujije kuri Twitter ko mu ngingo zagarutsweho muri iyi nama y’Abaminisitiri harimo n’ireba iyubahirizwa ry’ingamba zo kwirinda COVID-19.

Iryo tangazo rigira riti "Uyu munsi, Perezida Kagame yayoboye Inama y’Abaminisitiri yabereye muri Village Urugwiro, yiga ku ngingo zitandukanye zirimo ingamba zashyiriweho guhagarika ikwirakwira rya COVID-19.’’

Iyi nama ni iya mbere yateranye kuva imidugudu itandatu yo mu Mujyi wa Kigali isubijwe muri gahunda ya Guma mu rugo kubera ubwandu bushya bwagaragayemo ndetse yakozwe nyuma y’umunsi umwe mu Rwanda hagaragaye umubare munini w’abarwayi banduye, aho abantu 101 basanganywe Coronavirus ku wa 29 Kamena 2020.

Biteganyijwe ko iyi nama ishobora gutanga icyerekezo ku gukomorera insengero cyane ko iminsi 15 abanyamadini bari bahawe yo kugaragaza ingamba bafashe mu kwirinda ikwirakwira Coronavirus yuzuye.

Kuva umurwayi wa mbere wa COVID-19 iterwa n’agakoko gashya ka Coronavirus agaragaye mu Rwanda, hamaze kuboneka 1001 banduye mu bipimo 140 249 bimaze gufatwa, 443 barayikize mu gihe 556 bakiri mu bitaro naho babiri bitabye Imana.

Perezida Kagame yayoboye Inama y’abaminisitiri

Perezida wa Repubulika Paul Kagame yayoboye Inama y’Abaminisitiri ku wa Kabiri yize ku ngingo zitandukanye zirimo n’ingamba zo guhashya ikwirakwira rya COVID-19

Iyi nama yateraniye muri Village Urugwiro ku Kacyiru yasuzumiwemo iyubahirizwa ry'ingamba zo guhangana na Coronavirus

Amafoto: Village Urugwiro