00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rwahagaritse ingendo z’indege ziruhuza n’ibihugu byo mu Majyepfo ya Afurika

Yanditswe na Ishimwe Israel
Kuya 28 Ugushyingo 2021 saa 09:26
Yasuwe :

Inama y’Abaminisitiri idasanzwe yateranye kuri uyu wa 28 Ugushyingo 2021 yafashe ingamba nshya zo kwirinda ikwirakwira rya COVID-19 aho yanzuye ko ingendo z’indege hagati y’u Rwanda n’ibihugu byo mu Majyepfo ya Afurika zisubikwa.

Uyu mwanzuro wafashwe nyuma y’aho muri aka gace hagaragaye ubwoko bushya bwa COVID-19 bwahawe izina rya Omicron ndetse Ishami ry’Umuryango w’Abibumbye ryita ku Buzima (OMS) rikemeza ko ko buteye impungenge.

Ubwoko bushya bwa Covid-19 bwagaragaye bwa mbere muri Afurika y’Epfo, amakuru avuga ko bufite ubushobozi bwo kwihinduranya cyane, ariko imiterere n’imyitwarire yabwo ikaba itaramenyekana.

Ubu bwoko bumaze kuboneka mu bihugu bitandukanye ku Isi birimo u Buholandi, Denmark, u Bubiligi, Botswana, u Budage, Hong Kong, Israel, Butaliyani n’u Bwongereza.

Nko mu Buholandi, abagenzi 13 basanganywe Omicron nyuma yo kugera mu Mujyi wa Amsterdam bavuye muri Afurika y’Epfo mu ngendo ebyiri z’indege. Aba bakuwe mu bagera kuri 61 basanzwemo icyorezo cya COVID-19.

Inama y’Abaminisitiri yateranye kuri iki Cyumweru yayobowe na Perezida Kagame yasuzumye ku buryo bwo gukumira Omicron. Yasabye Abaturarwanda gukomeza gukaza no kubahiriza ingamba zo kwirinda.

Iyi nama yanzuye ko “ingendo hagati y’u Rwanda n’ibihugu byo mu Majyepfo ya Afurika zirasubitswe.’’

Abagenzi binjira n’abasohoka mu gihugu bakoresheje Ikibuga Mpuzamahanga cy’Indege cya Kigali i Kanombe, bagomba kuba bafite icyemezo cy’uko bipimishije COVID-19 [PCR Test] mu masaha 72 mbere yo guhaguruka.

Umwe mu myanzuro ugira uti “Abagenzi bose binjira mu gihugu bagomba guhita bashyirwa mu kato k’amasaha 24 muri hoteli zabugenewe kandi bakiyishyurira ikiguzi cya serivisi bahabwa.’’

Umwihariko wahawe abagenzi binjira mu Rwanda bavuye mu bihugu byagaragayemo ubwandu, bo bazajya bashyirwa mu kato k’iminsi irindwi.

Uwo mwanzuro ukomeza uti “Abagenzi baturutse mu bihugu byagaragayemo ubu bwoko bushya bwa COVID-19 cyangwa baherutse gukorera ingendo muri ibyo bihugu bahita bashyirwa mu kato k’iminsi irindwi, bakiyishyurira ikiguzi cya serivisi bahabwa.’’

Minisiteri y’Ubuzima ni yo izatangaza urutonde rw’ibyo bihugu nyuma yo gukora isesengura ku miterere y’ubwoko bushya bwa COVID-19.

Inama y’Abaminisitiri yananzuye ko abantu bitabira ibirori n’amakoraniro rusange bagomba kuba barikingije kandi bipimishije Covid-19.

Minisitiri w’Ubuzima, Dr Daniel Ngamije, aheruka kubwira Televiziyo Rwanda ko ubwoko bushya bwa COVID-19 bwandura cyane.

Ati “Amakuru mabi ateye impungenge ni uko ikomatanyirije hamwe izindi virusi kandi ikaba ikaze umuntu akurikije ibyo abashakashatsi bari kuyivugaho.’’

Yasobanuye ko u Rwanda rutaragera aho rwashyiraho Guma mu Rugo kuko amakuru akiri kwegeranywa n’ubushakashatsi buri gukorwa ngo hamenyekane imiterere y’iri virusi.

Ati “Iyo virusi ishobora kuba yandura cyane, ese irica cyane? Icyo kibazo ntabwo kirabonerwa igisubizo. Iyo ugupfa kw’abantu banduye kuri hejuru, biba bivuze ngo virusi ikaze cyane.’’

Abanyarwanda bashishikarijwe kwikingiza byuzuye, kwipimisha kenshi no kurushaho gushyira mu bikorwa amabwiriza yo kwirinda COVID-19 arimo gusiga intera hagati y’abantu, kwambara neza agapfukamunwa, gukingura inzugi n’amadirishya kugira ngo umwuka winjire no gukaraba intoki.

U Rwanda rwahagaritse ingendo z’indege ziruhuza n’ibihugu byo mu Majyepfo ya Afurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .