Ubushakashatsi bwagaragaje ko Coronavirus nshya yo muri Afurika y’Epfo ishobora gufata n’uwatewe urukingo rwa Pfizer

Yanditswe na Muhonzire Sylvine
Kuya 13 Mata 2021 saa 08:48
Yasuwe :
0 0

Abashakashatsi bo muri Israël batangaje ko Coronavirus yihinduranyije yagaragaraye muri Afurika y’Epfo, ifite ubushobozi bwo kwinjira mu muntu wakingiwe urukingo rwa Pfizer-BioNTech ubusanzwe rurinda uwarutewe kwandura Covid-19 ku kigero cya 94%.

Ubu bushakashatsi bwakozwe na Kaminuza ya Tel Aviv n’Ikigo cy’Ubuzima muri Israël cyitwa Clalit Health Services. Bwakorewe ku bantu 400 barwaye Coronavirus batatewe urukingo n’abandi 400 barutewe nabo bafite Covid-19.

Mu bantu 150 bakoreweho ubushakashatsi bakingiwe Covid-19 ariko bakayirwara, byagaragaye ko Covid-19 yihinduranyije yo muri Afurika y’Epfo ishobora gusakara mu bantu bakingiwe inshuro umunani kuruta abatarakingiwe.

Ubu bushakashatsi bwongeraho buti “Ibi bivuze ko urukingo rwa Pfizer-BioNtech, nubwo rurinda uwakingiwe cyane, rudashobora kurinda bihagije Coronavirus yihinduranyije yo muri Afurika y’Epfo.”

Umwe mu bashakashatsi yabwiye AFP ko Coronavirus yo muri Afurika y’Epfo ishobora kwinjira mu mubiri w’umuntu kandi yarakingiwe. Gusa avuga ko batigeze bakora ubushakashatsi ngo bareba niba umuntu wakingiwe wafashwe n’iyo virus ashobora kuremba.

Yongeyeho ati “Kuko twabonye umubare muto w’abantu bakingiwe banduye Covid-19 yo muri Afurika y’Epfo ntabwo twavuga ko ari ikindi cyorezo gishya cyateye.”

Ubu bushakashatsi bwo muri Israël nibwo bwa mbere ku Isi bugaragaje ko iyi virus yo muri Afurika y’Epfo ishobora kwinjira mu mubiri w’umuntu wakingiwe.

Kugeza ubu muri Israël 53% by’abaturage bangana na miliyoni 4.9 bakingiwe Coronavirus, mu gihe abandi miliyoni 5.3 bamaze guhabwa dose ya mbere.

Ubushakashatsi buherutse gukorwa na Clalit Health Services ku bantu miliyoni 1.2 bakingiwe muri iki gihugu, bwagaragaje ko Pfizer ifite ubushobozi bwo kurinda umuntu Covid-19 ku kigero cya 94%.

Nyuma y’uko abaturage benshi muri iki gihugu bamaze gukingirwa, zimwe mu ngamba zarorohojwe gusa kwambara agapfukamunwa byo bigumaho, ndetse hari n’ibikorwa byemerewe gukora ariko ku bantu bakingiwe.

Ubushakashatsi bwagaragaje ko uwatewe urukingo rwa Pfizer ashobora kwandura Coronavirus yihinduranyije yo muri Afurika y'Epfo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .