Umusirikare wanduriye mu butumwa bw’amahoro yabaye uwa gatatu wishwe na Coronavirus mu Rwanda

Yanditswe na Ishimwe Israel
Kuya 1 Nyakanga 2020 saa 10:07
Yasuwe :
0 0

Minisiteri y’Ubuzima yatangaje ko umusirikare wa RDF w’imyaka 51 wari mu butumwa mu mahanga wari usanzwe afite ubundi burwayi yabaye umuntu wa gatatu wahitanwe na Coronavirus mu Rwanda.

Minisante yatangaje ko kuri uyu wa 1 Nyakanga 2020, umuntu wa gatatu yishwe na Coronavirus mu Rwanda, mu gihe habonetse abarwayi 17 bashya mu gihe abayikize ari 33.

Itangazo rivuga ko “Uwitabye Imana yari umusirikare wa RDF w’imyaka 51 wari mu butumwa mu mahanga wari usanzwe afite ubundi burwayi.’’

Uyu musirikare yabaye umuntu wa gatatu mu Rwanda witabye Imana azize Coronavirus kuva iki cyorezo cyagera mu gihugu ku wa 14 Werurwe 2020.

Ku wa 30 Gicurasi nibwo hatangajwe umuntu wa mbere wahitanwe na Coronavirus, ni umushoferi w’imyaka 65 wari utuye mu gihugu cy’abaturanyi, wahisemo gutaha mu Rwanda nyuma yo kuremba mu gihe Umupolisikazi w’imyaka 24 wari waragiye mu butumwa bw’akazi mu mahanga, akaza kugarurwa mu gihugu arembye, nawe yitabye Imana ku wa 3 Kamena 2020.

Kuba abantu bicwa na Coronavirus mu Rwanda ari bake ni ikimenyetso cy’imbaraga igihugu cyashyize mu gupima, abanduye bagatahurwa hakiri kare, batararemba, bigatuma kubitaho byoroha.

Abarwayi 17 bashya basanganywe Coronavirus mu bipimo 3961 bakuwe mu bice bitandukanye birimo Kigali ifite barindwi, Ngoma: 6, Rubavu:2 na Rusizi yagaragayemo babiri.

Mu Rwanda hamaze kuboneka abantu 1042 banduye Coronavirus mu bipimo 147 904 byafashwe mu gihe abantu 480 bakize naho 559 bakaba bakiri kwitabwaho mu bitaro.

Abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi mu nsisiro cyangwa ahatuye imiryango myinshi.

Kugeza ubu nta muti n’urukingo bya Coronavirus biraboneka, hakoreshwa uburyo bwo kuvura ibimenyetso by’iki cyorezo gusa, kugeza umubiri w’umuntu wubatse ubudahangarwa, virus igashira ityo mu maraso.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .