Abahanga mu by’ubuzima bagaragaza ko imwe mu mpamvu zitera abana kudakunda kurya ari indwara "Food Neophobian". N’ubwo nta muti uyivura Dr Mugoboka Joseph avuga ko umubyeyi ashobora gufasha umwana we gakunda kurya.

Ikigo cyo mu Bufaransa cyita ku buzima (French Food and Health Fund) kigaragaza ko ubwo burwayi bwibasiye abana muri iki gihe, kuko abagera kuri 78% by’abatuye Isi bafite ikigero cy’imyaka iri hagati y’umwe kugeza kuri itatu bahura na yo.

FFHF gikomeza kivuga ko iyo ndwara iterwa n’uko imitekerereze y’umwana iba itizeye ibyo kurya bimushyizwe imbere. Ikibazo kigomba gushakirwa umuti akaba ari ukumenya uburyo umubyeyi yakwitwara kugira ngo umwana abone ibyo kurya mu buryo busanzwe.

Dr Mugoboka Joseph ukora mu ivuriro Life Clinic ribarizwa mu Kiyovu i Kigali, avuga ko n’ubwo nta bushakashatsi bwihariye yakoze kuri iyo ndwara, igaragara mu Rwanda ndetse ngo ititaweho ishobora gutera ingaruka mbi ku mikurire y’umwana.

Mu kiganiro yagiranye na IGIHE yavuze ko ari indwara ishobora kugira ingaruka mu mikurire y’umwana, aho ishobora kumutera gukura arushaho kwanga ibiryo.

Dr Mugoboka avuga ko umubyeyi asabwa kubanza gusuzumisha umwana we neza kwa muganga, kuko hari igihe usanga umwana yanga ibiryo kubera izindi ndwara.

Yongeraho ko nta muti wihariye uvura iyi ndwara kuko iri mu bwoko bw’indwara z’ubuzima mbamutima (psychologique) ariko agira inama ababyeyi kudahatiriza abana kurya ibiryo runaka ahubwo bakwiye “kubibamenyereza no kubibatoza”.

Dr Mugoboka avuga ko uburyo ushobora gutera umwana ingufu ari “Ukwita cyane ku byo akunda kurya cyane ubivanga n’ubundi bwoko butandukanye atazi; ariko mbere yo kumuvangira wowe urabanza ukamutinyura ubiryaho. Kubona ko wowe ntacyo bigutwaye kandi ubyishimiye bizamufasha kumva ko nawe atakagombye kubitinya.”

Abahanga batandukanye bakoze ubushakatsi kuri iyi ndwara, nk’ubugaragara ku rubuga destinationsanté bugaragaza ko igihe umwana adafite ikindi kibazo kwanga ibiryo bikunze ku mubaho mu myaka ibiri, atangiye kumenya guhakana, kandi izi ngufu zo kuba atangiye guhakana zihera ku biryo adakunda cyane.

Izindi nama zitangwa n’abahanga mu by’ubuzima ni ukubahiriza umuvuduko wa appétit umwana wawe afite maze ukaboneraho kumutoza gusubira ku murongo buhoro buhoro.