Abaganga icyenda batangiye igikorwa cyo kuvura abaturage mu karere ka Rulindo. Mu mpera z’icyumweru gishize Ambasaderi w’u Bushinwa, Shen YONGXIANG n’abaganga 9 basuye ibitaro bya Kinihira, hanatangizwa ku mugaragaro ubufatanye, bavura abaturage ba Kinihira ku buntu.

Ambasaderi Shen Yongxiang, atangaza ko bishimiye gufatanya n’ibitaro bya Kinihira, mu guteza imbere ubuvuzi n’ubuzima babifashijwemo n’inzobere z’Abashinwa.

Ku baganga bagera kuri 6 basanzwe bakorera muri ibi bitaro, inzobere icyenda z’Abashinwa zizafatanya na bo mu kubaga, kuvura indwara z’abagore, n’ubuvuzi gakondo bwabo.

Dr Utumatwishima Abdallah, avuga ko kuba bagiye kubafasha mu kuvura, bizabongerara ubumenyi mu gukoresha ibikoresho batamenyereye, binabafashe mu gutanga serivisi nziza, banunguke ubumenyi.

Umuyobozi w’Akarere ka Rulindo, Kangwagye Justus, yatangaje ko iki gikorwa kizateza imbere umubano w’ibihugu byombi n’imikoranire bari basanganywe.

Ati “ibitaro bya Kinihira bigiye gukorana n’abaganga b’Abashinwa, bizazamura urwego rw’ubuvuzi, bityo abaturage babigana bazajya babasha kubona serivisi bakeneye n’abaganga b’impuguke.”

Ibi bitaro bya Kinihira byatangiye gukora kuva tariki ya 3 Nzeri 2012, byubatswe ku isezerano rya Perezida wa Repuburika Paul Kagame yari yarahaye abaturage ba Kinihira.

[email protected]