Minisiteri y’Ubuzima ifatanije na UNFPA ndetse n’ikigo mpuzamahanga kita ku ubuzima bw’umuryango (FHI360), irigutanga amahugurwa y’iminsi 10 yatangiye kuva tariki ya 21 Gicurasi 2012. Aya mahugurwa agenewe abaforomo n’abaganga bo mu bigo nderabuzima n’ibitaro byo mu Karere ka Rusizi .

Aya mahugurwa abera ku Kigo nderabuzima cya St. Andre, Kuri Katedrali ya Katolika ya Kabgayi, mu Karere ka Muhanga. Iminsi 5 ya mbere (21-25 Gicurasi 2012) igenewe guhabwa inyigisho mvugo , indi minsi 5 (28 Gicurasi kugeza 01 Kamena 2012 ) ikaba iyo guhabwa amasomo ngiro mubitaro bya:Byimana,Kinazi, Gitarama, Mbuye no mu kigo nderabuzima cya Musambira .

Afungura aya mahugurwa, umuyobozi w’ibitaro bya Gitwe , Dr. Habimana Valens yaravuze ati : “Ndabasaba kwitabira aya mahugurwa kandi mwumve ko abafitiye akamaro”.

Habimana yongeyeho ati: “Tubatezeho kongera ubumenyi buruseho ku imyororokere, kuko muri aka Karere ka Rusizi iyi myumvire ikiri hasi ”. Nubwo Leta y’u Rwanda yongeyemo imbaraga mu guhugura abantu ku miyororokere mu gihe k’imyaka 5. Imyumvire yavuye ku 10% yo muri 2005 igera kuri 45% muri 2010. Kugeza ubu imyumvire ku myororokere iri kuri 35.5% mu Ntara y’Uburengerazuba, mu Karere ka Rusizi iri kuri 23,4% gusa.

Nyirasafari Daphrose Umuyobozi Mukuru muri UNFPA ushinzwe ubuzima bw’ imyororokere yavuzeko kwegereza umugore gahunda yo kuringaniza imbyaro bimutera imbaraga kandi birinda ubuzima bwe. Kuringaniza urubyaro kubushake bigabanya ku rugero rwa 1/3 cy’umubare w’imfu z’ababyeyi, no kurugero rwa 20% z’abana bapfa bakiri bato”.

Ku musozo w’aya mahugurwa, abayitabiriye batezweho ku ba bafite ubumenyi buhagije kuri gahunda yo kuringaniza urubyaro, ubumenyi no kuba abadahigwa mu gutuma habaho ubushake bwo kwitabira iyi gahunda, ndetse no kuba umuyoboro mwiza kubakeneye iyi gahunda cyane hongerwa imyumvire.

Ikindi kandi aba baganga n’abaforomo bagomba kuzatuma umubare w’abitabira gahunda yo kuringaniza imbyaro wiyongera, hifashishwa uburyo butandukanye bazigira muri aya mahugurwa.