Itsinda ry’abaganga b’inzobere mu kubaga umutima baturutse mu Bubiligi, bazabaga nibura abana 29 bavukanye indwara y’umutima, mu bitaro byitiriwe Umwami Faisal.

Inkuru dukesha The new Times ivuga ko iri tsinda ryageze mu Rwanda ku wa Gatandatu w’icyumweru gishize, bikaba biteganyijwe ko rizarangiza urugendo rwabo rw’akazi ku wa Gatanu w’icyumweru twatangiye.

Nk’uko DrJoseph Mucumbitsi, uvura indwara y’umutima yabitangaje, izo nzobere z’ abaganga bazabaga abana 29 barwaye indwara y’umutima, muri bo 13 bayivukanye.
Dr Mucumbitsi kandi avuga ko mu gihe gishize, bamwe mu barwayi b’indembe bajyanywe kuvurirwa mu Bubiligi ku buntu, bakagaruka bakize neza.
Iri tsinda ryari rimaze igihe ritera inkunga Ibitaro by’Umwami Faisal mu kubaka ikigo gishinzwe kuvura indwara z’umutima, hanahugurwa abaganga bazajya bitabazwa.

Kuri ubu umuganga wita ku bana barwaye umutima, uwita ku bakuru n’inzobere ku bijyanye n’ikinya giterwa aba barwayi, bamaze guhugurwa. Bikaba binateganyijwe ko uyu mwaka hazahugurwa uwita ku ndembe z’abarwaye indwara y’umutima.

Abaganga bo mu Bubiligi, bageze mu Rwanda bwa mbere mu mwaka wa 2005, batangiza ibikorwa byo kubaga umutima muri 2011.