Dr Kaze wa Baho Hospital yasobanuye byinshi ku ndwara y’umuvuduko w’amaraso yibasiye benshi

Yanditswe na Evariste Nsengimana
Kuya 11 Werurwe 2020 saa 09:15
Yasuwe :
0 0

Ishami ry’Umuryango w’Abibumbye ryita ku buzima rigaragaza ko umuvuduko ukabije w’amaraso ari imwe mu ndwara zihangayikishije Isi muri rusange. Imibare ryatangaje mu 2019 yerekana ko abayirwaye bari miliyari 1.13 aho 2/3 byabo bari abo mu bihugu bikiri mu nzira y’amajyambere.

Mu 2015 iryo shami ryerekanye ko umugabo umwe muri bane n’umugore umwe muri batanu bari barwaye iyi ndwara iri mu zikunze gutera abagore kubyara igihe kitageze.

Inzobere mu by’ubuzima zivuga ko indwara y’umuvuduko ukabije w’amaraso cyangwa Hypertension ari igihe ingufu amaraso agendana mu miyoboro yayo zituma abasha kugera mu bice bitandukanye by’umubiri ziyongereye zikarenga igipimo gisanzwe, bikaba byatera ingaruka zikomeye ku muntu bibayeho zirimo n’urupfu.

Ubusanzwe umutima utera wohereza mu bice bitandukanye by’umubiri amaraso meza, ubinyujije mu mijyana (arteries) ariko iyo imbaraga ukoresha ari nyinshi kuruta izisanzwe, amaraso agendera ku muvuduko wo hejuru. Igipimo gisanzwe cy’umuvuduko amaraso agenderaho (pression) ni 120/80mmHg ariko gishobora guhinduka bitewe n’impamvu runaka.

Mu kiganiro yahaye IGIHE, umuganga w’inzobere mu kuvura indwara z’umutima ukorera ibitaro bya BAHO International Hospital, Dr Kaze Yves, yavuze ko umuvuduko w’amaraso ari indwara ifata imitsi itwara amaraso igatuma umuvuduko asanzwe agenderaho (pression) wiyongera. Uko kwiyongera kubera ko kuba kutajyanye n’ingano y’amaraso imitsi yagenewe kunyuzwamo, bigira ingaruka kuko amaraso atabasha kwihuta nkuko umuvuduko (pression) wayo ungana.

Ati “Ni indwara iterwa n’uko imitsi iba yatangiye gukomera imibare y’umuvuduko w’amaraso (pression) ikazamuka ikarenga 140/90 mmHg. Ni indwara itigaragaza umuntu ashobora kugendana atabizi, ibimenyetso bitangira kuza iyo imaze gukura.”

Bimwe muri ibyo bimenyetso harimo nko kumeneka umutwe, kwiyumvamo umunaniro, kugira isereri, kuva amaraso mu mazuru, kugira ibinya n’ibindi.

Ati “Umuntu ashobora kubyiyumvaho agakeka ko ari indi ndwara. Ni indwara itagira ibimenyetso byigaragaza kandi ishobora kugira ingaruka mbi ku bwonko, ku mpyiko no ku mutima ubwawo.”

Dr Kaze avuga ko indwara y’umutima iturutse ku muvuduko ukabije w’amaraso ku kigero cya 95% ifata umuntu nta kintu gifatika kiyimuteye ariko ikunda kwibasira abantu bakuze.

Ku bantu bari munsi y’imyaka 30 iyo bagaragaje ibimenyetso byayo umuganga aramusuzuma ashakisha icyayimuteye, rimwe na rimwe gishobora guturuka ku ndwara z’impyiko n’izindi.

Iyi ndwara ibarizwa mu byiciro by’izitandura ishobora gufata abantu bose ariko cyane cyane abageze mu zabukuru.

Dr Kaze ati “Uburyo indwara y’umuvuduko ukabije ivurwa, bisaba gutangira guhindura imibereho. Icya mbere abayirwaye babuzwa kurya umunyu kuko urawongera. Amavuta nayo ashobora kuwongera kuko ajya mu mitsi, agatuma n’ingaruka zawo zishobora kuza. Banabuzwa kunywa inzoga kuko ubushakashatsi bwerekanye ko ziri mu ziwongera kandi bagasabwa gukora siporo nibura iminota 30 ku munsi.”

Umuntu kandi urwaye iyi ndwara asabwa kureka itabi kuko riri mu bituma yiyongera no kwirinda kugira ibiro byinshi cyangwa ibyatuma arwara nk’indwara y’igisukari ‘Diabetes’ n’iz’impyiko. Ni na byiza ko umuntu agomba kwisuzumisha kugira ngo nibayimusangana atangire kuvurwa kare.

Ati “Igira ingaruka ku mitsi itwara amaraso, uyifite imitsi ishobora kuziba, cyane cyane iyo mu maguru. Ni cya gihe umuntu atambuka akumva ababara. Inashobora kugira ingaruka ku mutima ukabyimba, amaraso ntabashe kugerayo neza.”

Ni indwara kandi umuntu uyirwaye ntiyivuze kare ishora no kumutera ubuhumyi. Uyu muganga avuga ko umuntu wese ubona igipimo cy’umuvuduko w’amaraso (pression) kirenze 140/90 mmHg aba akwiye kwihutira kujya kwa muganga.

Ati “Indwara y’umuvuduko w’amaraso itavuwe ishobora kwica umuntu kuko igira ingaruka mbi nk’indwara y’ubwonko ishora kwica umuntu cyangwa akaba ikimuga ubuzima bwe bwose. Ishobora kugira ingaruka ku mpyiko, iyo zidakora umuntu amererwa nabi no gupfa akaba yapfa.”

Iyo ndwara uwo bayisanganye afata imiti ubuzima bwe bwose kabone n’ubwo umuganga yamupima agasanga umutima we urimo gutera neza.

Umuganga w’inzobere mu kuvura indwara z’umutima ukorera ibitaro bya BAHO International Hospital, Dr Kaze Yves aganira na IGIHE

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .