Ishami ry’Umuryango w’Abibumbye ryita ku buzima (WHO/OMS) ku wa mbere ryatangaje ko abantu barenga 20 000 bamaze kwandura icyorezo cya Ebola, nyuma y’uko kigaragaye no mu Bwongereza mu Mujyi wa Glasgow.

Televiziyo Al Jazeera ivuga ko itangazo OMS yashyize ahagaragara, ryerekana ko kuva Ebola yagaragara mu bihugu bya Sierra Leone, Liberia, na Guinea, imaze kwandura 20, 081 igahitana abasaga 7, 842.

Indwara ya Ebola ikomeje guhitana benshi igasiga benshi mu muruho n'agahinda

OMS yatangaje ko Ebola irimo gusakara ku muvuduko ukabije muri Sierra Leone, ku buryo mu cyumweru gishize habaruwe 315 bayirwaye barimo 115 bo mu murwa mukuru w’icyo gihugu Freetown.

Uwo muryango uvuga ko Muri Guinea habaruwe abarwayi b’iyo ndwara 156, ariko ko muri Liberi abayandura Ebola bari kugabanuka kuko habonetse abarwayi 21 gusa mu cyumweru gishize.

Ibindi bihugu byagaragayemo abarwayi ba Ebola ni Nigeria, Senegal, Mali, Espagne, Leta Zunze Ubumwe za Amerika n’u Bwongereza bwiyongereyeho ubwo umuganga wari uvuye muri Sierra Leone ayigaragayeho ku cyumweru mu Mujyi wa Glasgow.

Ebola yandurira mu matembabuzi y’uyirwaye (amacandwe, amazirantoki, amaraso,…). Abita ku bayanduye nabo bakunze kuyandura cyane. Ku wa 21 Ukuboza hari hamaze kubarurwa abakozi bakumira Ebola 666 bayanduye na 366 bishwe nayo.

Umushakashatsi Peter Piot wafashije kugira ngo iyo ndwara ivumburwe bwa mbere mu 1976, avuga ko kugirango Ebola ikumirwe burundu bizafata byibuze mu mpera za 2015.

Kugeza ubu nta rukingo rwa Ebola ruraboneka, OMS yemeye ko hakoreshwa imwe mu miti ikiri mu igeragezwa ngo icyo cyorezo gikumirwe.