Ku kigo nderabuzima cya Muhima abana bahavurizwa abenshi barwaye indwara zituruka ku mwanda zirimo inzoka indwara zo mu kanwa n’ubuhumekero.

Abaganga bo ku Kigonderabuzima cyo ku Muhima, baganira na IGIHE batangarije ko raporo y’ ukwezi kwa Nyakanga igaragaza ko abana basaga 165 bavujwe indwara zikomoka ku mwanda. Abana 43 no bo bivuje indwara z’ ubuhumekekero ziterwa n’ ihindagurika ry’ ibihe n’ikirere.

Raporo y’ukwezi kwa Kanam nayo, n’ubwo ikirimo gukorwa, nayo ngo biri kugaragara ko izo ndwara zigarukamo.

Kayibanda Nkubito Jules, umuganga kuri iki kigo, yabwiye IGIHE ko bamwe mu babyeyi usanga bonsa abana batabanje gukaraba intoki, batanogeje amabere mbere yo konsa.

Kayibanda kandi yagaragaje ko hari n’ababyeyi bakunda gukinisha abana babasomagura bakaba babanduza indwara zitandukanye ziterwa n’ umwanda.

Yagize ati” umubyeyi wonsa asabwa isuku nyinshi no kumenya gukaraba intoki, koza amabere neza cyangwa akayahanaguza agasume kabugenewe n’amazi ashyushye cyangwa atetse, akirinda kwambara umwambaro w’amabere inshuro 2 yikurikiranya, kuko amabere agomba kugirirwa isuku igihe umubyeyi yonsa”.

Kayibanda kandi akangurira ababyeyi kwita ku ifunguro ry’umwana, aho avuga ko atari byiza ko abana babaha amata amaze akanya yenda kuvura, usanga abakozi barera abana, akenshi batabyitaho, kandi nabyo bya bigatera abana indwara.

Nkundunkunda Florentine, umuyobozi wungirije w’Ikigonderabuzima cya Muhima yabwiye IGIHE ko akenshi abana bahavurizwa barwaye inzoka bishobora kuba biterwa n’abakozi batabitaho uko bikwiye, yavuze ko mu gihe umwana ahuye n’ umwanda muke, byoroshye guhita yandura izi ndwara kuko ubudahangarwa buba buri ku kigereranyo kiri hasi.

Ku ifoto hejuru: Abakozi bo ku Muhima baganiriye n’IGIHE