Kuri uyu wa Gatatu Tariki ya 30 Nyakanga 2014 haratangizwa ibikorwa byo Kwizihiza Umuganura usanzwe uba buri mwaka. Muri iki gitondo nibwo hatangira umutambagiro ubanziriza ibikorwa byo kumurika ibyagezweho.

Minisiteri y’Umuco na Siporo (MINISPOC) n’ibigo biyishamikiyeho barategura ibikorwa byo kwizihiza umunsi w’Umuganura 2014, biteganyijwe kuva ku itariki ya 30 Nyakanga 2014 kugeza ku ya 01 Kanama 2014.

Ku munsi wa mbere w’Umuganura, Tariki ya 30 Nyakanga 2014, nibwo ibikorwa bitangira, aho bibimburirwa n’umutambagiro (Carnival) hamurikwa ibyagezweho no gufungura imurikabikorwa kuri Stade Amahoro.

Gahunda y’umutambagiro (CARNIVAL) – Tariki ya 30/7/2014

Umutambagiro (Carnival) mu mihanda yo muri Kigali
–  08h00 : Guhurira kuri Club Rafiki (i Nyamirambo)
–  09h00-10h00 : Club Rafiki-Onatracom
–  11h00- 12h00 : Rubangura - Kigali city market
–  13h00-14h00 : Giporoso square -Total –Tigo – Airtel - Petit Stade

ABITABIRA UMUTAMBAGIRO

1. SYTRAMORWA (Koperative y’Abatwara Moto)
2. FERWACOTAMU (Koperative y’Abatwara Moto)
3. NAYOMBI (Rwanda Development Board)
4. URUKEREREZA NATIONAL BALLET (MINISPOC)
5. Acrobats (Centre des Jeunes Gatenga)
6. RYSKA (Urubyiruko rw’Ababakoranabushake bo mu Karere ka Kicukiro)
7. JOC (Koperative y’Urubyiruko rwahagurukiye Umurimo)
8. CPR (Koperative y’Abasana amapine-ABAPINERI)
9. KARANI NGUFU/UKWEZI
10. IMBARAGA ZACU
11. COMEJOGA
12. GASABO INGENZI (Koperative y’abakora ubukorikori)
13. CAPLAKI (Koperative y’Abakora bagacuruza Ubukorikori)
14. INGUNGURU TWITEZE IMBERE (Koperative y’abakora ingunguru)
15. RED ROCKS (Ubukerarugendo bushingiye ku Muco)
16. OPEN LANDS (Ubukerarugendo bushingiye ku Muco)

Umunsi w’Umuganura usobanura iki?

Tariki ya 1 Kanama mu Rwanda ifatwa nk’umunsi w’Umuganura aho ubusanzwe mu mateka ari umuhango wahoze mu nzira z’ubwiru.

Uyu muhango wari ufite akamaro ko gusangira no kwishimira umusaruro mu gitaramo cyiswe icy’umuganura. Uyu muganura ariko wagiraga n’undi mumaro wo kuzirikana umwami nka Nyir’uburumbuke bakamutura urutete rw’imyaka yeze.

Uyu muhango wakomeje gukorwa no mu yindi myaka yakurikiye ubutegetsi bwa cyami.

Aha ntibasubiragamo imihango yose yakorwaga mu gihe cy’umwami kuko wabaye nk’uhindurirwa inyito n’ibyakorwaga muri wo.

Wasigaye ukorwa mu rwego rwo kwishimira umusaruro, Abanyarwanda bagahurira mu ngo z’abakungu bagasangira ibyo kurya bakanywa inzoga.

Muri iki gihe umuganura usa n’uwibagiranye ndetse na benshi bakunze kuvuga ko batazi uyu munsi hari n’abadasobanukiwe ibyawo.

Bamwe mu bakuze bakunze kuvuga ko kuba uyu munsi utakizihizwa biterwa n’ ubutaka bugenda buba buto kandi butakirumbuka ndetse n’imico igenda ihindura abantu kuba ba nyamwigendaho bityo ntibabashe gusangira ngo bishimane n’abaturanyi.

Mu mateka ariko uyu muhango w’umuganura wigeze guhagarikwa na Rezida w’u Rwanda mu mwaka wa 1925 kubera gutinya imbaraga uyu muhango waherezaga umwami.

Izo mbaraga uyu muhango wahaga umwami harimo kumugira Nyir’uburumbuke ndetse n’ububasha ari na we watangaga kororoka.

Nyamara muri iki gihe uyu muhango usa n’utagikorwa mu Rwanda kandi nta mategeko awukuraho.

Ibi bitera kwibaza niba hari aho bihuriye n’iterambere cyangwa niba koko bihura no kugunduka k’ubutaka n’izindi mpamvu zavuzwe haruguru.

Biramutse ari iterambere nticyaba ari icyo gushyigikirwa kuko iterambere rikwiye kujyana no kubumbatira Umuco n’amateka y’Igihugu.