Inkomoko y’insigamugani ‘Aravuza iya Bahanda’

Yanditswe na Nsanzabera Jean de Dieu
Kuya 2 Ukwakira 2019 saa 08:16
Yasuwe :
0 0

Uyu mugani bawuca iyo bumvise umuntu uvuza induru acura imiborogo nta jambo yatura ngo avuge; niho bavuga, ngo “Aravuza iya Bahanda !” Wakomotse kuri Bahanda ari mu rugerero rw’i Mututu mu Mayaga ya Butare; ahayinga umwaka w’i 1700.

Uwo mugabo Bahanda ari mu rugerero rw’i Mututu, hari ku ngoma ya Cyilima Rujugira. Umunsi umwe, urugerero ruterwa n’Abarundi; barutera abarurimo bagiye gucurangisha ku Bisi bya Huye bigishwa n’umurundi. Ni nabwo gucuranga byadutse mu Rwanda.

Mu rugerero hari hasigaye Migisha na Mazi na Bahanda. Urugerero rutewe, Mazi arahunga; yuriye urugo umurundi amufata amaguru. Mazi amutera umugeri aramucika.

Urwo rugo rwari rwubakishije imiyenzi. Mazi acitse uwo murundi amata y’imiyenzi amugwa mu ntoki. Umurundi ariyamirira ati “Bana b’abarundi sinababwiye ko nzabatanga umubisha uva amata mu mataba ya Mututu”. Ubwo Mazi ariruka ageze i Muyange akebuka abagenzi, ati “Bahungu, uko mureba ubu ndiruka ?” Bati “Cyane” Iwabo hari i Buguri bwa Kanyinya na Remera mu Rukoma. Akomeza i Buguri, ubwoba bumucisha ku rugo arambuka ajya i Runda na Gihara, agira ngo ni ho iwe. Niwo mugani bavuga bati “Yaruciyeho nka Mazi”.

Inkuru imaze kumenyekana ibwami y’uko Mazi yagize ubwoba bumucisha ku rugo, Cyilima amubuza kuzasubira mu rugerero ukundi; amugabira kujya atora abana b’inkoko baraguriza abatabazi. Na we Migisha rero bari kumwe, asigara arwana n’abarundi ababuza kujya mu rugo. Ubwo umurundi, abwira abandi ko yabuze umuriro wo gutwika urugerero, umunyarwanda avana igiti gifashwe mu gicaniro akijugunya mu muharuro w’urugerero, ati “Ngaho noneho rutwike dore ubonye umuriro”.

Umurundi wunamye ajya kwenda umuriro Migisha agahamya, undi wese ugize ngo arunama kuwenda Migisha akawumutsindaho. Abarundi batinya kongera kuwegera; ariko bararinda. Migisha arangurura ijwi, ati “Zingambuga rya Kamarampaka ndi imfizi y’ikirushya ya Byintare; ye Ndirira nimurebe ngo ndaba Kizimya cy’urugo rwa Cyilima mwo kanyagwa mwe”.

Na we Bahanda ubwo yagiye akurikiranye na Mazi, avuza induru ndende, arinda arenga ibisi bya Huye. Ariko ntavuge icyo ayivugiriza. Bigeze aho, umwe mu bahungu, bacurangishaga ati “Iryo jwi ni rya Bahanda”. Nibwo bamukurikiye, biruka ngo barebe uwo ariwe.

Ab’impayamaguru bamufatira ku gisi cyitwa Kigasari. Bamubaza akabamama akavuza induru yiruka. Hanyuma baramufata, bakeka ko yasaze. Amaze gutururukwa, ababwira ko ibintu byacitse mu rugerero. Abahungu barahurura bagenda biruka , bageze i Mututu, basanga Migisha yabujije abarundi kugera mu rugo ngo banyage inka z’urugerero. Urugamba ruranzikana rucura akabunda rukomanya impembe, rushengera intwari rwiyegura abatinyi, baruteye amazi aragaruka, Abanyarwanda barahangaza Abarundi baraneshwa.

Nuko aho batabarukiye, iyo nduru ya Bahanda bayihimbaza mu bitaramo ihinduka umugani baca iyo umuntu arwaye akavuza induru ataka nta cyo avuga nka Bahanda, bati “Aravuza iya Bahanda”. Kubera ibyo rero, Bahanda uwo Cyilima amugabira ubushumba aba umutahiza w’inka, akajya avuza urwamo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza