Kurara imbere ku mugabo, ivure ku mugore: Ingingo y’umuco itavugwaho rumwe

Yanditswe na Iradukunda Serge
Kuya 15 Mata 2020 saa 02:06
Yasuwe :
0 0

Kuba umuco nyarwanda utemerera umugabo kurara ivure, ahubwo ukahagaragaza nk’umwanya w’abagore ni ibintu abantu badakunze kuvugaho rumwe ndetse bamwe bakagaragaza ko bikwiye guhinduka cyane ko bigaragara nk’ibipfobya umugore.

Hamwe muhabyukiye izi mpaka ni ku rubuga nkoranyambaga rwa Twitter aho uwitwa Iliza Nelly yabajije abamukurikira uwabwiye abagabo ko aribo bagomba kuryama imbere.

Iki kibazo cya Iliza cyakuruye impaka mu bamukurikira,ibintu byagaragazwaga n’ibisubizo batangaga.

Bamwe bavuze ko umugabo agomba kuryama imbere kugira ngo arinde umutekano ndetse abe yiteguye guhangana n’uwabatera.

Mu bashyigikiye iki gitekerezo harimo Danny wagize ati “Ikindi ni uko umugabo ari umutware w’urugo iyo hagize igitera urugo ahita ajya kurwana ngo atabare urugo kandi umugore we ahita yirukira ku rukuta yihisha”

Azzah we yagize ati “Ni ukugira ngo bacunge umutekano w’urugo.”

Uretse aba bavuga ko umugabo aryama imbere kubera impamvu zo kurinda umutekano w’urugo, abandi barimo Nsanzurwanda Leandre bagaragaje ko biterwa ahanini n’uko abagore bakunze kuryama mbere y’abagabo. Ati “Buri igihe abagabo baryama nyuma y’abagore.”

Uwitwa Icyeza we agaragaza ko afite inzozi zo kuryama imbere “ Nanjye njya mbyibaza?? Gusa numva rimwe nzaryama imbere nkumva icyo ambwira.”

Ku bandi barimo Innocent bagaragaje ko byose bishingira ku myumvire ko ubu yaba umugore cyangwa umugore buri wese yaryama aho ashaka. Ati“Iyo niyo yari imyumvire yanjye mbere...aho ariho hose waharyama.”

Umwe mu bagore bubatse waganiriye na IGIHE ariko ntiyifuze ko amazina ye ajya hanze, yavuze ari uburyo bwo gupfobya ubushobozi bw’abagore hitwajwe kubarindira umutekano.

Yagize ati “Icyo gitekerezo abakizanye sinzi icyo bari bagamije ariko njye kuri ubu mbona ari ukudupfobya, kuki twe tutaryama imbere nk’abagabo, ibyo bavuga ngo baba bagira ngo igikomye babe aba mbere gutabara natwe twabikora.”

Uyu mugore asanga hakwiye kubaho ubwumvikane hagati y’umugabo n’umugore buri wese akaryama ahamunogeye ndetse yumva yishimiye.

Impuguke mu muco n’amateka by’u Rwanda, Nsanzabera Jean de Dieu, avuga ko uyu mugenzo wari ufite agaciro gakomeye mu muco Nyarwanda kuko wagaragaza ihame rya ‘umbere inyuma nkubere imbere aho “mu gihe umugabo ari kurwana n’ibikomeye umugore akaba ari guhisha abana cyangwa abacisha mu cyanzu ngo bahunge.

Ati “Mu gihe umugabo ari kwakira abashyitsi ku irembo, umugore akaba atunganya mu ruganiriro.”

Nsanzabera avuga ko uku kuryama imbere ku mugabo bituruka ku nshingano ahabwa n’umuco nyarwanda zo kubungabunga umutekano w’urugo.

Mu muco Nyarwanda umugabo wararaga ivure yagaragaraga nk’umunyabwoba ndetse agafatwa nk’ikigwari gitinya kujya aho rukomeye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .