Hagiye kumurikwa igitabo gihishura amabanga y’imiryango ishaka icyubahiro igahishira abana bahohotewe

Yanditswe na Twarabanye Venuste
Kuya 29 Mutarama 2020 saa 12:09
Yasuwe :
0 0

Igitabo cyiswe L’oncle Gynécologue kivuga umwana w’umukobwa wahohotewe inshuro ebyiri ariko agatereranwa n’umuryango we, washakaga kurinda icyubahiro cyawo kigiye kumurikirwa mu Mujyi wa Kigali.

Ni igitabo Numuhire Caroline yanditse mu myaka 10 ishize ubwo yatangiraga amasomo ye ya kaminuza. Umwanditsi nta bushobozi cyangwa ubundi bufasha yari afite ariko amahitamo y’ingingo cyibanzeho ishingiye ku nkuru ndende yatangariwe na benshi bijyanye n’ubuhanga cyandikanye.

Inkuru mpimbano ikubiye muri L’oncle Gynécologue ivuga ku mwana w’umukobwa watewe inda n’umusore bakundanaga yajya kwipimisha kugira ngo amenye uko ahagaze, agasaba ubufasha nyirarume witwa Mathias akahahurira n’ibyago birenze ibyo yari afite kuko amufata ku ngufu.

Ntarindwa Diogène wamamaye nka Atome mu gusetsa ni we uzafasha Numuhire kumurika icyo gitabo muri Kigali.

Uyu munyarwenya ubihuza no kwandika avuga ko atari asanzwe aziranye na Numuhire ahubwo na we yakuruwe n’ubuhanga buri muri icyo gitabo ahitamo gushaka inzira yo gusakaza ubutumwa bukirimo ku bantu benshi.

Ati “Ku myaka ye ni ibintu bidasanzwe, ni igitabo cyandikanywe ubuhanga ku buryo ugitangiye agisoma kugeza akirangije. Yacyanditse ku buryo kigutera amatsiko ugashyirwa ari uko ukirangije. Sinari muzi naramumenye numva ari uwo gushyigikirwa kugira ngo atabyihererana.”

Yakomeje avuga ko inkuru yuko Numuhire yacyanditse azayigarukaho mu imurikwa ryacyo izafasha n’abandi kugira umuhate wo kwandika.

Ati “Njyewe nahuye n’uwo mukobwa ambwira ibyo yanditse ndamubwira nti ‘ibyo bintu ntubyihererane kandi hanze aha hari abandi bana bafite impano zo kwandika kugira ngo bamenye ko hari uwababanjirije bamufatireho urugero biba ari byiza. Kumva ko ari igitabo cyanditswe n’umwana w’umukobwa nta bundi bushobozi uretse ko ari uko yiyumvagamo iyo mpano. Numvise ari ikintu cyo gushyigikira.”

Igikorwa cyo kumurika icyo gitabo giteganyijwe kubera kuri Westerwelle Start up Haus Kigali mu nyubako ya Fair View Building ku Kimihurura guhera saa Kumi n’Ebyiri z’umugoroba wo ku wa 29 Mutarama 2020.

Numuhire yavukiye muri Butare mu 1988. Yize ibijyanye n’Iterambere ry’Icyaro n’Ubuzima mu yahoze ari Kaminuza Nkuru y’u Rwanda. Yananditse ibindi bitabo birimo "Mirror Of Stolen Hearts’’

Yabaye Umuyobozi wa Generation Rise, umuryango wita ku burezi bw’umukobwa umufasha kugira ubumenyi bumuganisha ku ntego z’ubuzima, kwitinyuka, kwigirira icyizere no kuvugira mu ruhame.

Kumurika icyo gitabo biri mu bikorwa by’uruhererekane Ntarindwa yise L’Atomiom byo guteza imbere imishinga y’indashyikirwa y’abakiri bato mu buryo bukwiriye.

L’Atomiom izabanza kwibanda ku kumurika ibitabo mu bikorwa byiswe "Scène Littéraire’’ bigamije gukundisha Abanyarwanda kubyandika no kubisoma ariko nyuma izafata n’ibindi bikorwa.

Biteganyijwe ko mu mezi ya mbere bizibanda ku bitabo byanditswe ku Kwibuka Jenoside yakorewe Abatutsi mu 1994 ariko bikazajya binareba ku zindi ngingo zitandukanye zirimo imibereho myiza na siporo.

I Kigali hagiye kumurikirwa igitabo gihishura amabanga y'imiryango yirengagiza abana bayo bahohotewe ikarengera icyubahiro cyayo
Ntarindwa Diogène wamamaye nka Atome ni we wateguye igikorwa kizamurikirwamo igitabo "L’oncle Gynécologue"
Numuhire yavukiye muri Butare mu Ntara y'Amajyepfo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .