Iki gitabo cyanditswe na Hategekimana Richard, cyamuritswe kuri uyu wa Gatandatu tariki 30 Nzeri muri Intare Arena i Rusororo.

Muri uyu muhango witabiriwe cyane, hasobanuwe amateka yaranze ubuzima bwa Tito Rutaremara haba ubuzima bwe bwite ndetse n’ubwa Politiki, dore ko ari umwe mu batangije umuryango FPR Inkotanyi wagize uruhare mu guhagarika Jenoside yakorewe Abatutsi ndetse no kubohora u Rwanda.

Uyu muhango kandi wahujwe n’uwo guhemba abanyeshuri biga muri za Kaminuza bahize abandi mu marushanwa yo gusoma ibitabo bitandukanye, hagamijwe guteza imbere umuco wo kwandika no gusoma mu Rwanda.

Hategekimana Richard yavuze ko yanditse iki gitabo ku buzima bwa Tito Rutaremara, nyuma yo kuganira na we agasanga ari umwe mu banyabigwi b’inyangamugayo u Rwanda rufite.

Yavuze ko no mu gihe yamukoragaho ubushakashatsi, benshi bamugaragaje nk’umuntu utuje kandi w’umunyabwenge.

Ati “Benshi icyo bahuriyeho ni uko Tito Rutaremara ari umugabo ushoboye ariko unashobotse. Afite ubumenyi n’indangagaciro nzima, agashyigikira ukuri. Hari abandi bantu tujya tugira ukabona barwanya ibyiza, Tito we rero ni wa muntu ukunda ibyiza akabishyigikira, agashyigikira abakora neza.”

Ubuhamya bwatanzwe kuri Tito bunagaragara mu gitabo harimo ubw’ubuzima bwe muri politiki nk’ibijyanye n’urugamba rwo kubohora u Rwanda, ubuzima bwe bwite nk’ibijyanye n’urushako, abana n’ibindi.

Hategekimana yavuze ko yizeye ko iki gitabo kizafasha abato gukura bitwara mu buryo butuma u Rwanda rukomeza kuba ubukombe.

Ati “Abakiri bato birabigisha kurangwa n’indangagaciro nziza zirimo kuba umuntu nyamuntu, gukura bakunda igihugu n’abanyarwanda byose bigamije iterambere ry’u Rwanda.”

Tito Rutaremara yavuze ko kuba hasohotse igitabo kivuga ku buzima bwe ari byiza, kuko bifasha abandi gukurikiza inzira nziza yatumye igihugu kigera aho kigeze ubu.

Ati “Amateka y’igihugu ni ay’abantu bose, buriya ni nayo mpamvu nshima bariya bandika ibyo bagiye banyuramo muri Jenoside kuko buriya ibyo buri wese yanyuzemo sibyo undi yanyuzemo. Iyo usomye ubuhamya bwa buri umwe nibwo wumva ibyabaye mu Rwanda.”

“Ni kimwe n’ubuzima busanzwe. N’iyo yaba ari umunyeshuri wize akarangiza akerekana ingorane yanyuzemo agatera imbere, cyangwa akagera aho ananiwe […] niyo makuru y’igihugu. Uyafite ku bantu benshi bikwereka uko igihugu gihagaze.”

Umubyeyi witwa Cécile wagize uruhare mu gufasha Tito Rutaremara kurera benshi mu bana b’imfubyi babaga babayeho nabi, yamuvuze ibigwi, agaragaza ko ari ishema kuba yanditsweho igitabo.

Ati “Nshimire uyu mwanditsi ko yakoze icyo abandi batabashoje gukora, yakoze byinshi byiza, yatuvugiye ibyo tutashobora kuvuga. Uyu ni umuntu mwiza cyane, kuko kugira ngo muntu nkanjye aze nyuma ya jenoside yabuze abana, yongere amureme yarakoze cyane.”

Iki gitabo ‘Hon Dr Tito Rutaremara, Inkotanyi cyane Ntatezuka’ cy’amapaji asaga 400, cyatangiye kugurishwa mu nzu zicuruza ibitabo hirya no hino muri Kigali.

Abantu batandukanye bari bitabiriye

Umuhanzi Mariya Yohana ari mu bitabiriye imurikwa ry'iki gitabo

Umuyobozi Mukuru w'Inama y'amashuri makuru na za Kaminuza (HEC), Dr Rose Mukankomeje yari ahari

Umuhanzi Mariya Yohana ahabwa umwanya muri uyu muhango

Tito Rutaremara yagaragaje ko kwandika amateka ari ingenzi ku buzima bw'igihugu

Umunyamakuru Barore Cleophas ari mu bayoboye ibiganiro

Hategekimana Richard yatangaje ko kimwe mu byatumye yandika kuri Rutaremara, ari indangagaciro nziza yamubonyemo zabera abandi urugero

Aha Barore yabazaga Hategekimana ibibazo bitandukanye kuri iki gitabo

Uyu muhango wabereye kuri Intare Arena i Rusororo

Mbonimana Gamariel ari mu bitabiriye uyu muhango

Umunyamakuru Barore ubwo yari ayoboye ikiganiro

Dr Muligande Chales yaje mu imurikwa ry'igitabo kivuga ku buzima bwa Tito Rutaremara

Abarimo Rucagu Boniface (ibumoso) bari baje mu imurikwa ry'iki gitabo

Iki gitabo cy'amapaji asaga 400 cyageze ku isoko

Tito Rutaremara yashimiwe umuhate we mu gushyigikira ubwanditsi mu Rwanda

Aha Tito Rutaremara yaganiraga n'umwe mu bo yigishije mu mashuri mu myaka yo hambere

Zeno Mutimura umwe mu batangiranye Politiki na Tito Rutaremara yamuvuze ibigwi

Rutaremara asuhuza Prof Rwigamba Balinda wari witabiriye

Nsanzabaganwa Modeste akurikiranye imurikwa ry'iki gitabo kivuga ku buzima bwa Tito Rutaremara

Imiryango itandukanye ikora ku bijyanye n'uburezi by'umwihariko mu gushishikariza abato gusoma, yashimiwe

Dr Kabera Callixte uyobora East African University Rwanda ashyikiriza umwe mu bashimiwe icyemezo cy'ishimwe

Prof Rwigamba Balinda ashyikiriza icyemezo cy'ishimwe umwe mu bashimiwe

Urubyiruko rwahize urundi mu bijyanye no gusoma ibitabo rwashimiwe

Amafoto: Kwizera Herve