Iby’ingenzi bikubiye mu gitabo ’Iyororoka ry’Abanyarwanda, inkomoko y’imiryango migari’

Yanditswe na IGIHE
Kuya 13 Nyakanga 2020 saa 04:12
Yasuwe :
0 0

Nyuma y’iminsi Umusizi Nsanzabera Jean de Dieu, inzobere ku muco n’amateka y’impitabihe ku gihugu cy’u Rwanda n’Ubuvangazo, atangaje ko agiye gushyira ahagaragara igitabo yise ’Iyororoka ry’Abanyarwanda, inkomoko y’imiryango migari’, kuri ubu iki gitabo cyashyizwe ahabona.

Ni igitabo gikubiyemo amateka y’ibisekuruza by’Abanyarwanda, mu miryango migari babumbiyemo.

Iki ni igitabo kigiye kuva imuzi imyororokere y’Abanyarwanda n’imiryango migari babarirwamo, ari na yo yabaye imvano y’inkomoko y’imiryango migari y’Abanyarwanda dufite ubu, ndetse n’ibarirwa mu bihugu by’ibituranyi by’u Rwanda nka Uganda, u Burundi, Repubulika ya Demokarasi ya Congo, Tanzania, Kenya n’ahandi.

Ukurikije imyubakire y’ibisekuruza by’Abanyarwanda, usanga yubakiye ku bigwi, ihiganwa rishingiye ku murage n’intego bihaye kugeraho mu kubaka umuryango n’igihugu by’umwihariko.

Na none bigafatira ku mico mbonera y’ubumuntu n’ubumana babaga barafashe nk’ikirango cy’umuryango ukomoka kwa naka, ari nayo mpamvu kenshi inyito y’umuryango uyu n’uyu ufite izina rifite icyo risobanuye mu mibereho y’uwo muryango n’umurage w’icyate bahawe mu mushinga wo kubaka u Rwanda.

Dukurikije ibirari by’amateka y’u Rwanda kuva mu ntango y’u Rwanda kugeza ahasaga mu 1912 ubwo hashyirwagaho imipaka, mu Rwanda hari imiryango migari igera kuri 26, hakaziraho n’indi yagiye ibyarwa n’iyo y’imiryango migari itabarika yiswe inzu z’imiryango migari, mu mateka y’u Rwanda.

Iyo miryango migari uko ari 26 ikomoka ku bicumbi bikuru by’imiryango migari, byagiye bisimburana mu gutura u Rwanda. Ibyo bicumbi bikuru by’imiryango uko ari bitatu nibyo dusangamo Abasinga, Abazigaba n’Abanyiginya.

Abasinga bakomokwaho n’imiryango migari icyenda, Abazigaba bakomokwaho n’imiryango migari itatu, Abanyiginya bakomotsweho n’imiryango migari icumi, nyuma hakaziraho imiryango y’Abashi n’Abahavu bakunze kuba mu Ntara ya Kivu y’Epfo (Ahahoze ingoma y’Idjwi n’u Bunyabungo) ndetse n’imiryango yabaye iy’Abanyarwanda biyigwiririye y’Abasigi n’Indara.

Uko imiryango migari yagendaga yororoka, ari nako bene yo babyara ibihangange byagize uruhare mu mushinga wo kubaka u Rwanda, niko hagenda havuka andi matsinda abakomokaho yiswe inzu z’imiryango migari, mu bucukumbuzi bwakozwe, hakaba harabonetse izigera kuri 200.

Imiryango migari y’Abanyarwanda yavutse ihereye ku gisekuruza cy’umuntu w’igihangange wakoze ibikorwa by’indashyikirwa mu mushinga wo kubaka u Rwanda, bimwamamaza bigatuma aba igihangange, abamukomokaho bagafata izina rye bakaryitirirwa.

Hari imiryango migari kandi ikomoka ku murage abantu aba n’aba bahawe na ba Sekuruza, uko barushaho kuwuzirikana ari na ko barushaho kuvuga uwawubaraze, niko izina ry’uwo mukurambere wabo rigaruka.

Imiryango migari kandi yagiye ikomoka ku ihangwa ry’ibihugu. Abaturage bafashe ubutaka mwimerere, bakabukonda, bakabuhangaho igihugu bakagiha izina. Iryo zina kenshi ryabaga ari intego ya ba nyir’igihugu bihaye kuzageraho mu iyubakagihugu bashoboraga kwitirirwa ikabaviramo ubwoko bw’umuryango mugari.

Imiryango migari kandi yagiye ikomoka ku nshingano zo gukorera mu matsinda, cyane mu mushinga wo kubaka u Rwanda. Abahawe inshingano iyi n’iyi nk’icyate cyabo mu mushinga wo kubaka u Rwanda, bibumbiye mu itsinda ryo mu muryango wo kwa naka, ni bo bagendaga bororoka bakavamo umuryango mugari ukomoka kwa kanaka, umukurambere wabo wahawe inshingano bagomba kwitaho mu kubaka igihugu.

Imiryango migari y’Abanyarwanda izwi neza inkomoko y’ayo ni Abasinga, Abarenge, Abongera, Ababanda, Abenegwe, Abanyakarama, Abungura, Abahunde, Abasita, Abazigaba, Abahinda, Abagesera b’Abazirankende n’Abanyiginya.

Hari kandi Abasindi, Abashambo, Abega, Abaha, Abakono, Abatsobe, Abahondogo, Abashingo, Abacyaba, Indara, Abasigari, Abashi n’Abashi b’Abahavu.

Nyuma y’aho imipaka ishyiriweho kuva mu wa 1910-1912, u Rwanda rwasigaranye imiryango migari 22, imwe muri yo yagiye muri Congo nk’Abashi bo muri Kivu y’Epfo habarirwaga mu Bunyabungo, Abashi b’Abahavu babarirwaga ku Idjwi n’Abahunde bo muri Kivu ya Ruguru babarizwaga mu Buhunde, naho muri Uganda bakatirayo Abahinda b’Abanyankole.

Iki gitabo kibumbye amapaji 250, kiragurishirizwa mu nzu zigurisha ibitabo nka Librairie Caritas na Librairie Ikirezi z’i Kigali na Caritas Icyizere y’i Huye.

Iki gitabo gifite umwihariko ukomoka ku bushakashatsi bwakozwe na Nsanzabera Jean de Dieu, aho yatondetse intondeke y’iyororoka ry’Abanyarwanda mu bisekuruza byabo zigizwe n’intondeke eshatu zihereye ku bicumbi bikuru by’imiryango, imiryango migari n’inzu z’imiryango.

Mu gihe abandi bamubanjirije bo bari bafite intondeke ebyiri gusa zigizwe n’imiryango migari n’inzu z’imiryango, zagiye zikurura urujijo ruhanitse mu kumenya byimazeyo inkomoko y’imbumbe y’imbaga y’Abanyarwanda, no kumenya inzego z’ibisekuruza byabo.

Iki gitabo kiraboneka ahantu hatandukanye hagurishirizwa ibitabo mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .