• Kibumbatiye ubumenyi bw’ibanze ku muco n’imigenzo Nyarwanda
• Umuco Nyarwanda : ‘Umuco utatse ibyiza"
• Usangamo ibango ry’umunezero no guhuza urugwiro mu rukundo
• Harimo Inyurabwenge, ubucurabwenge, ubuvanganzo n’ikibonezamvugo

Igitabo cyiswe "Manners in Rwanda: Basic Knowledge on Rwandan Culture, Customs, and Kinyarwanda Language "ugenekereje bivuze " Imigenzereze mu Rwanda"

Ubumenyi bw’ibanze ku muco n’imigenzo Nyarwanda, ndetse n’ururimi rw’ Ikinyarwanda", Umwanditsi Uwanziga yibanze ku muco nyarwanda na bimwe mu by’ingenzi biwugize, akavuga ku nyurabwenge y’Abanyarwanda, ururimi, imihango n’imigenzo, ndetse no ku rurimi gakondo rw’Abanyarwanda “Ikinyarwanda”.

Uwanziga yanditse iki gitabo mu buryo bunogeye umusomyi, mu mvugo irimo ubuhanga n’ubusizi butuma utangiye kugisoma yagikomeza kugeza akirangije.

Ni igitabo gikoze mu buryo bukurura Mukerarugendo ukibonye, kuko kimusobanurira byinshi ku gihugu aba atemberamo, u Rwanda.

Iki gitabo kigaruka ku cyo umwanditsi yise "Umuco utatse ibyiza (colorful culture), akavuga uburyo Abanyarwanda bafite umwihariko mu muco n’imigenzereze byabo, akanashimangira uburyo Ikinyarwanda ari ururimi rwiza, rukungahaye, kandi rusobanutse.

Si igitabo cyakwiyambazwa na mukerarugendo gusa, ahubwo n’abandi b’ingeri zinyuranye bagikoresha, nko kuba hari Abanyarwanda badasobanukiwe byinshi ku mihango n’imigenzo y’igihugu cyabo no kuba hari abanyamahanga bakeneye kugira ibyo bamenya ku mico y’Abanyafurika, iki ni igitabo cyabasobanurira.

Joy Nzamwita Uwanziga wanditse igitabo Manners in Rwanda’

Imvumburamatsiko y’igitabo

Iki gitabo cyanditse mu rurimi rw’ Icyongereza ariko hari n’ibice biri mu Kinyarwanda.
Mu buryo bwimbitse, kivuga ku mibereho ya buri munsi y’Umunyarwanda, uhereye mu bihe byo hambere, imyubakire, imiturire, imyizerere, imyambarire, imikino, guhahirana, uburyo bw’itumanaho,ihererekanyamakuru n’ibindi.

"Manners in Rwanda" kivuga kandi iby’imigenzo yubahwaga ikaziririzwa, uburyo bwo kunywana n’agaciro k’igihango mu muco w’Abanyarwanda.

Umwanditsi Joy yibanda ku bikorwa by’ubupfura buri wese akwiye kwitwararika (do’s) n’ibyo agombwa kwirinda kuko bifatwa nk’umugayo(don’ts).

Mu muco Nyarwanda kandi hahozeho kubaha amasano n’ibisanira, bigashingirwaho mu mibanire y’ingeri zinyuranye. Iki gitabo kigaragaza impamvu zabyo, uburyo imiryango yashakanaga hakaba n’indi itarashakanaga, kikanatanga ubusobanuro n’inkomoko kuri amwe mu magambo y’Ikinyarwanda yahanzwe biturutse ku mpamvu zihariye.

Usangamo ibango ry’umunezero no guhuza urugwiro mu rukundo

Mu gihe ibijyanye n’urukundo mu ngeri zinyuranye zarwo zirimo kurambagiza, urushako, guhuza urugwiro kw’abashakanye, gutera akabariro n’ibindi bifitanye isano bikunze kugirwa ubwiru na benshi, Umwanditsi Joy Uwanziga abiva imuzi akabisobanura mu buryo butaziguye, bikumvwa n’ubifitiye amatsiko agasobanukirwa.

Umwanditsi agaruka ku migenzo inyuranye ikorwa kuva umukobwa arangwa (umuranga) kugeza ashyingiwe, n’ibyakorwaga byose hagati aho (Gufata irembo, gutebutsa, gusaba no gukwa,...).

Ku bijyanye no kubaka urugo no gutera akabariro, Umwanditsi agaragaza umwihariko wo gutera akabariro bya kinyarwanda, akanagaragaza imwe mu myiteguro iba yarakorewe umwana w’umukobwa kugira ngo ategurwemo umugore uzanyura umugabo we mu buryo bwimbitse mu gihe cyo gutera akabariro. Anagaruka ku ruhare rwa buri wese mu kunyura uwo bahuje urugwiro.

Inyurabwenge, ubucurabwenge, ubuvanganzo n’ikibonezamvugo

Mu bukungu bufubitswe n’iki gitabo "Manners in Rwanda" harimo ibijyanye n’Ikinyarwanda nk’ururimi, ubugenigeni n’ubukorikori, inyurabwenge ry’Abanyarwanda biciye mu migani, ibitekerezo, n’ibindi.

Ni igitabo kinagaruka ku bucurabwenge bugaragaza amasekuruza y’abami n’abagabekazi, urukurikirane rw’abo n’icishirizo ry’ibihe babayeho. Umwanditsi avugamo amateka y’abami batwaye u Rwanda; kuva ku Bimanuka kugera ku Bami b’Umushumi n’ab’Ibitekerezo, n’ibindi.

Gusoma iki gitabo cy’impapuro zigera kuri 350 si uguta umwanya ahubwo ni ukwiyubaka, ni ukongera ubumenyi no kunyuzwa mu ishuri ry’umuco, ururimi n’amateka, utavuye aho wicaye.

‘Manners in Rwanda’ kiri mu bitabo byiza by’ukwezi kuri Amazon

• Iki gitabo cyaje ku mwanya wa 41 mu bitabo byiza byo muri Afurika yo Hagati ku iguriro ryo kuri Internet ‘Amazon’.

• Cyatanzwe muri magazine icukumbura ibitabo yitwa ‘New York Review of Books’ aho biteganyijwe ko kizasohoka mu nomero yayo (magazine) yo ku itariki ya 9 Nyakanga 2015.

• Kigaragara ku rubuga rwa Good Reads rugaragaza uko ibitabo bihagaze, abasomyi bakabasha kubiganiraho. Binyuze kuri uru rubuga, Amakopi atanu ya Manners in Rwanda yabashije gupiganirwa kuri urwo rubuga, atsindirwa n’abasomyi batanu ku buntu.

• Inzu y’ubwanditsi yatunganyije iki gitabo ‘Inkwater Press’ yatanze amakopi yacyo abiri mu isomero ry’igihugu muri Leta Zunze Ubumwe za Amerika (American Library of Congress). Mu gihe gito kikazaba cyemejwe nk’igitabo kigaragara muri iryo somero.

• Kizaba kiri mu imurika Mpuzamahanga ry’ibitabo i Frankfurt riteganyijwe kuva tariki ya 14 kugera kuya 18 Ukwakira 2015 i Frankfurt . Niryo murika ry’ibitabo rinini ku Isi. Mu mwaka utaha wa 2016, kizaba kiri mu maserukiramuco atandukanye harimo irizabera mu Bwongereza, i Paris, mu Buholandi, i New York n’ahandi.

Usibye kuba kigaragara kuri Amazon nka rimwe mu maguriro akomeye ku Isi, kiboneka kuri ebay.com, readings.com (muri Australia) , Bol.com, alibris.com, lehmanns.ch n’andi. Ushobora kandi kukibariza mu iguriro ry’ibitabo aho ariho hose ku isi, icyo usabwa ni ukubaha numero yacyo mpuzamahanga (International Standard Book Number), ndetse n’izina ry’umwanditsi nk’uko bigaragara ku gitabo.

Mu Rwanda, kizajya kiboneka muri Librairie Ikirezi, ku Iguriro ry’ibitabo ryitwa Ecel bookshop ryoku cyicaro gikuru cya MTN Rwanda, no muri Simba Supermarket.

Ushaka kumenya amakuru arambuye ku gitabo ’Manners in Rwanda’, wa kanda hano ugakurikira kuri Facebook