Tanzaniya yahagaritse Ikinyamakuru The East African ku wa Gatanu tariki ya 24/01/2015, kigishinja gusezerera umukuru w’igihugu no kuba cyitariyandikishije nk’ibindi binyamakuru.

Ishyirahamwe ry’ Abanyamakuru mu Rwanda (ARJ), ritangaza ko icyemezo cyafashwe n’ ubuyobozi bw’ iki gihugu, ari ihohoterwa.

Mu kiganiro Gonzaga Muganwa Umunyamabanga Nshingwabikorwa wa ARJ yagiranye na IGIHE, yavuze ko inama nkuru y’ itangazamakuru muri Tanzaniya yahagurukira iki cyemezo kigayitse.

Gonza ahamya ko icyemezo cyo guhagarika ikinyamakuru The East African, ari urugero rubi ku bindi bihugu ikindi kandi na byo bihagaritse iki kinyamakuru byaba ari ikibazo.

Ati: “Kuba The East African ihagaritswe muri Tanzaniya ntibivuze ko ihagaze mu karere k’Ibiyaga Bigari, kuko ni ikinyamakuru gikomeye kandi gisomwa n’ abantu batandukanye.”

Ishyirahamwe ry’ Abanyamakuru mu Rwanda rirasaba Leta ya Tanzania ko yashyiraho uburyo bwo kujya ihamagaza umunyamakuru akisobanura ku nkuru yanditse kuruta uko yahagarika ikinyamakuru.

Ikinyamakuru The East African gihagaritswe nyuma yaho umuyobozi wacyo Christopher Kidanka, yahamagajwe n’inzego z’iperereza agahatwa ibibazo ku wa gatatu w’iki cyumweru.

Umuvugizi wa Leta ya Tanzaniya Mr Mwambene Assa ashinja The East African gusebya igihugu, no kugaragaza uruhande Tanzaniya ihagazeho kuri FDLR.

Abinyujije ku rubuga nkoranyambaga rwa Twitter, Ladislas Ngandahimana umukozi ushinzwe itangazamakuru muri Minisiteri y’ubutegetsi bw’ igihugu, yavuze ko nubwo The East Africa yahagaritswe, itazahwema kuvuga uburyo ibonamo FDLR.